男友出軌，我決定送26頂綠帽比佢: B : 007 ！機關槍 ! (2)

「係喎，我同丁家岐好番啦！」

詩韻一記眼刀殺過黎，殺到我有啲心虛。雖然佢咩都冇講，但係我已經估到佢既潛台詞：唔好問我，感情問題一律建議分手。

「但係佢咁樣對你。」阿瑩瞪大眼睛，為我抱不平。佢睇得純愛小說多，相信一生一世一雙人，有第三者、玩曖昧、甚至有過前任既男仔，通通都要out。

「我唔捨得就咁同佢一刀兩斷。」

所以寧願互相虧欠，都要藕斷絲連。





「等陣又同佢出街呀？」魚蛋見dead air咗，加把口埋黎。

「唔係呀。」

「咁約咗邊個呀？」魚蛋好好奇咁問。

「陳子俊。」

阿瑩大大聲下咗出黎：「原來你地識架？」





「細個一齊玩過下咁咯。」拍拖之後，丁家岐唔中意我同其他男仔見面，為咗避嫌，就無再聯絡啦。

「有無機？」係詩韻既世界，男女之間係無純友誼。

我正想扮哂野咁話：痴線架你，就發現陳子俊已經企咗係門口。佢皮膚曬得黑黑，個樣比以前招積，唯一無變既，係眼神永遠都咁閃亮，透著一股不服輸的勁。

「陳子俊！好耐冇見。」其實雀躍既程度只得三分，但係我特登展現七分。

「點呀？婷婷你高咗又矮咗，肥咗又瘦咗喎。」陳子俊扯一扯我條馬尾。





「你做咩咁大力呀？痛架。」

「唔痛扯黎做咩？」陳子俊呢個哀人，完全唔覺得抱歉。

我大大力篤翻佢個頭。

「頂你，幾時變得咁暴力架。」陳子俊好誇張咁退後兩步，咁啱撞咗落.....丁家岐身上。

嗯，我特登既，我就係要呢個效果。

丁家岐係個佔有慾極強既人。就算戴咗口罩，我都可以肯定，佢既臉色變咗。

佢地望住對方，眼神帶著毫不掩飾既敵意。

有人話過，追女仔，其實係男仔之間既較量。佢高過我幾厘米，我下面長過佢幾毫米，佢（籃球）射得準過我，我口技（口語技巧）好過佢......





就係呢啲小小既唔同，造就咗男仔之間既差距。

佢地當女仔係戰利品既同時，女仔又何嘗唔係當佢地係提高身價既工具。

係一片濃烈既火藥味，我坦蕩蕩咁走向丁家岐：「今日我約咗陳子俊，有啲野要傾，同你講聲先。」

只係同佢講聲，唔係要佢批準。我唔會再好似以前一樣，咩都聽哂佢話，要我做咩就去做，唔可以做咩就唔做。

「放心啦，我唔會拐走你條女，唔好諗太多。」陳子俊有意挑機，拍拍佢膊頭。

丁家岐無理到佢，捉住我隻手，拉我埋一邊，好有宣示主權既意味：「我陪你，你推咗佢。」

我望住地板，搖一搖頭。





「一定要同佢出街？」丁家岐問多一次。

我點點頭，有啲野我想搞清楚。

「咁...好啦，我今日唔陪你住，第日先。」丁家岐居然敗陣下來，作出退讓。可能佢都知自己無資格再管我。

見到佢失望個樣，我又有啲於心不忍。

再望落去，我就會心軟。於是我逃跑咁既款，拉住陳子俊走出班房。

途中，手機響個不停，不出意外，係來自「美女團」既WhatsApp。

詩韻：婷女你真識玩

阿瑩：你地有無睇到丁家岐個表情





魚蛋：自作自受

阿瑩：婷婷你真絕 但係我愛你

我極其懷疑，就算我想殺咗丁家岐，佢地都會遞埋把刀過黎，全力支持我。

「睇緊咩呀？」陳子俊伸個頭埋黎。

「哦，無野呀。」我下意識熄咗個mon。佢一下子行得咁近，我反而唔係好舒服。

我地之間，好似多咗種距離感，同以前既感覺唔同哂。

畢竟，我對佢既印象，仲停留係佢著孖煙通既年代。





不過我都明白，回憶係死既，人係生既，無人會一成不變。

「我阿媽前幾日先提起你。佢問，以前成日同你玩果個婷婷，宜家點呀？」

「阿姨仲記得我？」我受寵若驚咁問。

「好難唔記得喎。」陳子俊撓撓頭，「每一次打完架， 掛哂彩咁返屋企，我就會話係你被人蝦，我幫你出頭。」

「成日拎我黎做藉口，」我扮哂嬲，「你阿媽肯定對我印象超差。」

「咁又唔係喎，佢幾中意你，話你斯文有氣質，望落又乖。」

「吹啦你，你阿媽幾時有見過我呀？」

「你唔記得啦？有一次，我地同其他小朋友玩角色扮演。你扮公主，我做特務。

果班咁既超人、美國隊長、蜘蛛俠同埋鋼鐵俠打唔過我，就綁架咗你，逼我投降。

投降咪投降咯，比佢地贏一場又如何。

到咗第二次世界大戰，本來打得好地地，就黎要贏既時候，突然有人一巴掌車埋黎，打到我滿頭金星。我心諗：我屌你老母呀，邊個咁大膽。

一擰轉頭，今次大獲，真係我老母。

原來有條八婆報串，話我係度撩事鬥飛，打佢個仔，所以我老母咪落黎刮我番去，順便望下你咩樣。」

佢咁講，我又好似有啲印象。

「自此之後，佢地每次見到你，就會話：007俾阿媽捉走咗，007俾阿媽捉走咗。傳到成條村都知道。」

「唉，一世英名毀於一戰。」

我地東拉西扯，不過除咗講以前，其實都無咩共同話題。可能分開之後，有咗各自既生活同經歷，中間留白咗一大片。

「係呢，我地等陣去邊呀？」

「我地去冒險。」陳子俊懶神秘咁話。