男友出軌，我決定送26頂綠帽比佢: B : 007 ! 機關槍 ! (4)
「呢個係我男朋友，佢叫丁家岐。」我將丁家岐隻手捉到實一實，有啲怕羞。
「呢個係陳子俊，我既青梅竹馬。」
果陣時我都無諗咁多，我淨係覺得兩個都係我好珍惜好重視既人，想當然要介紹佢地俾對方認識。
陳子俊一向自來熟，佢舉起手上既膠袋，入面裝住三枝啤酒：「我知道有個好地方！」
「你點買到架？」丁家岐問。
陳子俊呢啲成日趁大人唔係度、偷偷飲番杯、順便帶壞埋我既慣犯，當然無得去「不得向未滿十八歲人士出售酒精類飲品」既便利店買酒。
「士多老闆同佢阿爸係朋友。」我代佢答。
「原來係咁。」
「唔好同我講，你未飲過酒喎。」陳子俊有啲看輕丁家岐。
電視劇既男主角，只要擔住枝煙，拎住枝酒，再擺番個生無可戀既自閉樣，就會瘋魔萬千少女。
於是大家一致認為，飲酒係威係型係大人，唔飲酒就係小朋友。
「你估個個係你咩，千杯不醉。」我幫丁家岐解圍。
「扮咩純情姐，你都唔差。」
「又會係咁，我飲一杯就醉。」
「係一大杯。」
丁家岐望住我地鬥嘴，淡淡然咁講咗句：「咁睇下等陣邊個飲得多。」
陳子俊一馬當先，行咗去前面探路，我挽實丁家岐隻手：「唔駛理佢，佢講下架炸。」
「哦。」
「做咩呀？」
「我都唔知原來你飲酒。」丁家岐既語氣，好似有啲嬲。
我撅起嘴：「你唔中意，最多我以後唔飲囉。」
「咁就乖啦。」
其實我唔覺得飲酒有咩問題，都係飲個氣氛啫，亦唔代表我係一個壞女仔 。當然，我無講出口。
停車場後面，有個遊樂場，可能因為比較偏僻，又長期無人打理，所以無咩人會黎呢邊。
陳子俊吹咗個好響亮既口哨：「今晚包場，山頂既朋友你地好！」
自然無人應佢。
陳子俊將啤酒蓋扣係石泥牆既邊緣，用力一按，個蓋就蹦一聲跳咗出黎。
「拎住！」佢遞咗兩枝過黎。
我推搪：「我唔啦，今日黎m啊。」
陳子俊將目標轉向丁家岐：「咁你呢？」
我啤住佢：「做咩姐你？丁家岐都唔飲酒既。」
「男仔講緊野，女仔唔好插嘴。」
唔知陳子俊今晚發咩神經，好似有人踩親佢條尾，對住邊個都起哂角。
「算啦，唔識飲就唔好勉強，我自己飲。」
陳子俊一口氣飲咗半枝。
丁家岐拎起另一枝啤酒，骨碌骨碌咁灌落去。
滴酒不沾既佢，居然用咗唔到三十秒，就隊哂成枝酒。
我同陳子俊都睇到o哂嘴。
「咁有料，飲埋婷婷果份啦。」
「怕你呀。」
其實飲到最後，睇得出佢應該係死撐，因為佢皺哂眉頭，好似飲緊天下最苦既涼茶。
「好啦，唔好飲啦，你贏哂。」陳子俊終於出聲。
好快，酒勁上頭，丁家歧塊面一直紅到耳根，企都企唔穩，要我扶住。
陳子俊拍拍旁邊既空位：「過黎，我地玩真心話與大冒險。」
丁家岐搖搖擺擺咁坐咗過去。可見佢已經醉到連阿爸阿媽姓咩都唔知道。
「酒後吐真言，試下佢對你係唔係真心先。」陳子俊偷偷地同我講。
「你知唔知我係邊個？」
丁家岐意識模糊咁望住陳子俊，吐出三隻字：「唔知道。」
「咁呢個呢？」陳子俊指著我。
「我條女。」
「點解中意佢？」
「佢夠清純聽話。」
「姐係唔識反抗，容易控制？」
「係。」
「如果佢唔聽話呢？」
「我會調教到佢聽話為止。」丁家岐攬實我條腰，嘴唇無意識係我後頸蹭磨：「因為佢係我既人。」
男仔對話既尺度真大，聽到我都面紅埋一份 。
「最想同佢做咩？」
「瞓覺。」丁家岐毫不猶豫咁回答，跟住瞓咗落我膊頭，全身既重量壓哂落黎，郁都唔郁。
「......」
「佢應該真係眼瞓啦。」我好溫柔咁摸一摸丁家岐啲頭髮。
「咁送佢番屋企啦。」
「丁家岐！」叫咗佢十幾聲，先有反應。
我同陳子俊一左一右扶住佢。
「仲未恭喜你拍拖。」陳子俊難得正經。
「多謝。」
「你地點開始架？」
「佢成日係我身邊陪我，日見夜見，咪係埋一齊囉。」
陳子俊沉默咗一陣，好似係度諗緊野。
「開心啦？」
「好似發緊夢一樣。」我燦然一笑。
行到丁家岐屋企樓下，丁家岐突然捉住陳子俊既衣領，作勢一個拳頭揮過去：「呢個女仔係我既，唔好同我搶。」
陳子俊不甘示弱，推咗丁家岐一下：「如果你對佢唔好，我實整死你。」
丁家岐失去重心，跌坐係地上，同我扭計：「佢推我！」
「駛唔駛等埋你？」陳子俊問我。
「我陪多佢一陣先。」
「咁我走先，你地慢慢。」佢行咗幾步，突然回頭。
「做咩呀？」
「希望你會幸福。」今晚佢好似好感觸，可能關酒精事。
「你都係。」
陳子俊無再停留，影子係地上漸行漸遠。
丁家岐醉眼朦朧咁望住我。
「你見好啲未呀？」我扶住佢。
「頭好暈。」
「梗係啦，你頭先當水咁飲。」
丁家岐挨埋黎，枕係我身上：「我唔中意佢。」
「呷醋啊？」
「係。」佢直認不諱：「我唔想你再同佢見面。」
人有好多面，而係唔同人面前，就會展現出同對方最相似既一面。
我有種感覺。丁家岐唔中意既，係我同陳子俊一齊時，所展現出既另一面。
佢中意我做番乖乖女。
我心入面有個秤。如果要取捨，稱一稱，丁家岐又的確比陳子俊重要。
「好啦，咁我應承你。」