男友出軌，我決定送26頂綠帽比佢: A ：Anson Lo (2)
Anson：喂喂，起咗身未？
我：起咗啦：）
Anson：幾驚你瞓醒咗就唔記得我
我：點會？發夢都見到你
Anson:教主既魅力沒法擋：p
Anosn:今日有啲凍，記得著多兩件衫。
我：你估到係邊未？
Anson：有啲頭緒，希望無估錯。
Anson : 我落街跑個步先，等陣見啦！
我：嗯，等陣見啦！
我係被窩望出窗外，今日天氣晴朗，有風吹過，無落雨，係適合出街既日子。
WhatsApp又震咗兩下。
見到丁家岐個名，心頭湧起一陣罪惡感，不過好快又消失。取而代之既，係復仇既快感。
丁丁：今日要練籃，陪唔到你：（
我：唔緊要啦，你去忙啦
丁丁：今次有咩懲罰呀？
我：罰你請我飲奶茶
丁丁：下星期一買俾你
我：隔咗兩日，計埋利息，我要飲兩杯
丁丁：你個為食妹飲得落咩
我：飲唔落架 所以你要幫我飲
丁丁：好啦
丁丁：掛住你
我：我都係
打呢句野既時候，我面上毫無表情，內心一啲起伏都無。
我除底手上面既情侶戒指，啪一聲擺落梳妝枱。
既然你后宮佳麗三千在先，就唔好怪我紅杏出牆在後。
帶著少少忐忑又期待既心情，我提早黎到尖沙咀碼頭。
我去到麥當勞對出，見到廣告牌上空蕩盪。奇怪啦，明明前幾日黎都仲有。唔通Anson Lo既巨型廣告牌已經到期，被人拆咗落黎？
我等咗一分鐘、兩分鐘、三分鐘......要唔要同佢講聲呢？但係我又唔想破壞呢個遊戲。
就係我內心糾結既時候，離遠見到有個男仔，著住米白色針織衫，手上拎住部手機，栗子啡既頭髮，被陽光照耀得閃閃生輝。
佢目光係我身上停留咗一秒，就步伐輕快咁行過黎。
雖然未見過佢既樣，但憑感覺，我就知道佢係Anson Lo。
佢收埋手機，對我揮揮手，笑起上黎眉眼彎彎：「凱婷！」
我無掩飾內心既驚喜，明知故問：「你點搵到我架？」
「你既提示太明顯啦。」Anson 對我調皮地眨眨眼：「可惜已經拆咗。」
「租一塊廣告牌要成十萬，可以掛足三個月都算係咁。」
「宜家既fans真係有錢。」Anson好似好感慨。
「粉絲為愛瘋狂的能力，真係唔可以低估。」我身同感受咁回答。
「為咗偶像，可以去到幾盡。」Anson笑住咁話。
「你講我呀？」我好認真咁諗咗一陣，「我可以捱三個月麵包，可以通宵排隊等幾個鐘，可以受盡冷風吹。」
為咗見上一面，毫無保留咁付出，你講過既每一句說話，我會記得好耐；你開心我會陪你笑，你難過我會陪你喊。可以光明正大咁叫你老公，同其他情敵打得頭破血流。
總之係呢個夢幻世界入面，永遠冇心碎同失望。
世界上無完美既愛情，大概追星係最接近愛情既一種境界。
「年少輕狂呀。」
「講到你好似好老咁。」
「我係老過你。」佢舉起咗5隻手指。
我以為佢要同我give me five，一個手掌拍咗過去。
佢哭笑不得咁解釋：「我既意思係我大你五歲。」
我們一邊行，一邊東拉西扯，自然到好似相識多年既朋友。我無問佢有無女朋友，佢亦無問我有無男朋友。有啲野，講穿咗就無意思。
「就等我呢個老野，請你食翻碗米線，唔駛日日捱麵包咁慘。」
「你又知我中意食米線？」我好驚訝咁問。
「女仔唔係都鐘意食米線架咩？」佢好理所當然咁問番我轉頭。
呢個「女仔」，好有可能係講緊佢前任或者現任或者約會過既N個女仔。八卦係女人既天性，我決定將呢種精神發揚光大：「你每次同女仔出街都係食米線架？」
「係呀，同男仔就食大排擋。」
激死，比佢轉移咗話題添。
間間米線店都大排長龍，行咗一大圈，我提議：「不如去食三哥？附近有一間。」
「你帶路啦咁。」
「喂！埋邊果對情侶，有位啦！」姐姐對我們招招手。
我們對視咗一眼，好有默契咁無否認到。
「懶肉勿演麻辣，要實小辣。」Anson特登扮鄉音姐姐既口音叫餐。
「我都係。」
姐姐用標準到不能再標準既廣東話問：「飲咩呀？」
Anson呆咗一呆，下意識講翻純正既廣東話：「兩杯凍檸茶，少冰，無其他啦。」
等姐姐走咗之後，Anson對我吐吐舌頭：「 呢一間肯定係冒牌經營。」
望住熟悉既店面，我有片刻走神。
半年前既愚人節，丁家岐話要請我食一碗永世難忘既米線。我以為係咩隱世小店，或者貴到痴線既高級餐廳。
點知，佢帶咗我黎呢到。
我心諗：食個三哥，可以有幾永世難忘。
我去完廁所，滿心歡喜咁坐低，用筷子撩咗半日，搵極都搵唔到，我碗鴨血米線冇鴨血，得翻豆卜、芽菜同腐皮。
個姐姐行埋黎，指住丁家岐，好無奈咁同我講：「你男朋友話你要鴨血米線走鴨血。」
對面既丁家岐終於忍唔住，笑到傻咗：「愚人節快樂！」
我望咗佢一眼，眼淚好唔爭氣咁流落黎。
丁家岐話過，以後唔會再整喊我，令到我唔開心。
最後我食哂成碗米線，連一滴湯都無剩落黎。
「地球呼喚凱婷？」Anson用手擋係我面前。
「我係呢度，食過一碗永世難忘既米線。」