男友出軌，我決定送26頂綠帽比佢: A ：Anson Lo (3)

「難忘既唔係碗米線，而係陪你食米線果個人。我估係你初戀。」佢好篤定咁話。

雖然只係識咗短短幾個鐘，但佢好似好了解我，睇穿我內心既真正諗法。

我覺得我同佢之間好似產生咗一絲連繫。

姐姐捧住兩碗米線過黎。

Anson將抹乾淨既筷子遞比我，然後除低口罩。佢五官精緻，長著一張娃娃臉。





食色性也，其實佢都幾好樣。

Anson對我燦然一笑：「無令你失望吧？」

大家都話，同網友見面涉及風險。第一大伏係真人同頭像完全兩回事，二係遇著中出即飛既騙子。

我簡直好彩過中六合彩。

「如果你係女仔，一定......」





「一定係校花吖嘛！」佢好開心搶住咁話。

「係呢，點解你會用交友App既？」我一邊食，一邊試探咁問。

「同ex散咗差唔多一年，覺得係時候move on，想識下人。」

都幾長情。

「咁...你約過幾多個女仔呀？」我扮哂隨意咁問。





「約過兩、三個啦。但係同佢地都冇咩火花，行街睇戲食飯咁樣咯。」

「點先叫做有火花呀？」

「有傾唔完既話題。我講既野，佢都可以接得上，咪有火花咯。」

我個心砰砰咁跳，佢講到咁，我好難唔對號入座。

唔知道，佢會唔會覺得同我有火花呢？

......

「琴日話過要陪你重溫舊夢。」

我地係海邊，風係我耳邊吹到呼呼聲，空氣透著海水獨有既鹽味，啲浪一層又一層咁拍黎岸邊。





我地一人拎住一枝雪糕，靜靜咁望住海面。偶爾有船隻來往，拖住一串串既貨物，緩慢而笨重。

「世上有幾多個人，可以同佢地既初戀一齊？」佢望住個海，好似望緊啲我見唔到既往事。

我望住佢既側影，等佢講埋落去。

「我同我既初戀就係呢度分手。」佢回應我既視線，同我解釋。

「我可不可以問點解呀？」我相信透過一個人既過去，可以了解到佢係個點樣既人。

「你俾我拖住你隻手，行完呢一段路，我就話你知。」佢好似個講條件既細路仔，露出自以為狡猾既神情。

「即係要我扮演你既初戀情人啦？」我撥好凌亂既頭髮，無答可以，亦都無答唔可以。





Anson碌大隻眼，好似狗仔咁同我賣萌。可惡，我對可愛既生物完全無抵抗力。

於是我們就拖手啦。

「我第一眼見到你，就覺得你同我既初戀好似。長發飄飄，中意著白裙，一樣咁清純可愛，令人好想保護照顧佢。

個傻妹屋企好有錢。有錢到佢買名牌，就好似落街買條菜咁輕易。

每個月，我都會買一樣名牌送俾佢。雖然係半個月既糧，不過佢中意咪得。

後來佢中意咗另一個人。我冇怪過佢。我希望果個人會好好對佢，比到想要既野佢，過得比同我一齊既時候開心。」

行到盡頭，Anson拎咗隻戒指出黎。

「個傻妹永遠行到一半，就扭計話攰，唔肯行啦。所以我同佢從來未行完呢條海濱，亦沒機會比呢隻戒指佢。」





戒指係夜空中閃耀著光芒。我的心漏了一跳。如果佢下一秒同我求婚，我要不要代佢前任應承？

「雖然佢已經唔係我身邊，但係每次經過呢度，過去既甜蜜同幸福都會重新浮現。」

講各自的感情事，好似一下子拉近咗距離。因為信任，先會傾訴內心既秘密。

「對唔住。」我都唔知點解要講，可能因為係我帶佢黎海邊，可能因為我無意中勾起佢既傷心事，可能我太似佢既前任。

「傻妹，點解要講對唔住。」佢拍一拍我既頭，呢個動作，呢個暱稱，都令我諗起丁家岐。

夜晚風涼，天光悠長。天上有三四粒星，零零散散。我主動將個頭挨埋去Anson個膊頭，感受到佢既體溫。

我合埋眼睛。





佢抱緊我。我覺得好有安全感。我地雖然唔係情侶，但係做緊情侶先會做既事情。

Anson輕輕咁玩弄我既頭髮，捱近我隻耳仔，低聲咁話：「呢頭有好多酒店。」

我以為自己聽錯，愕然咁望住佢。好似去完迪士尼樂園，搭地鐵翻番去現實世界。

我突兀地推開佢。「我仲未準備好。」

「同你講笑咋，傻妹。」Anson收埋隻戒指，鬆開我隻手。「時間唔早啦，我送你翻去啦。」

唔知係咪我錯覺，佢既語氣好似有啲敷衍。

佢陪我行去車站，已經冇哂之前果種親密。個氣氛仲幾尷尬下。係唔係頭先推開佢果下，令佢誤會我唔中意佢？

我想解釋，但千頭萬緒，唔知點講好。

臨上車前，Anson係褲袋拎出一個信封：「送俾你，當係留念。」

我接過，同佢講再見。上咗巴士，我拆開黎睇。

係麥當勞既Anson Lo鏡仔卡。

後面痴住咗張memo卡，有一排清秀既鉛筆字：「下一次係條街見到我，可唔可以同我打個招呼？唔好當我係陌生人：）」

我拎住部電話，禁出禁入，以為係無網絡，或者WhatsApp故障。

但係都等唔到佢既訊息。

原來佢陪咗我成日，最終目的都只係想同我上牀。

睇黎呢次係我地第一次見面，亦係最後一次見面。

就黎瞓著既時候，終於有一個電話打黎。不過唔係Anson，係阿瑩。

我失望咗半秒。

阿瑩既聲音帶住慌亂：「你快啲上Secret，丁家岐出咗事。」