男友出軌，我決定送26頂綠帽比佢: A ：Anson Lo (1)
以前既人用交友App，約得出黎都係直奔主題：牀上見。但係疫情之後，交友App反而越黎越盛行，出黎傾下計食餐飯，啱傾咪直落，唔啱咪搵下一個。你情我願，要既就係快樂，玩既就係心跳。
一件事，當大家都做，就唔會有人企係道德制高點指責你。
我下載咗Tinder，填咗啲基本資料，打開相簿，諗住擺幾張相上去。
想要搵幾張獨照都幾難，因為絕大部分都係我同丁家岐既合照。一年前、兩年前、三年前......我既回憶全部都係佢，我既人生同佢息息相關。如果刪哂啲相，我諗我既相簿會空咗一大片。
我將我同佢既相鎖起黎，眼不見為淨，佢係我宜家最唔想見到既人。
最後，我揀咗一張係生日蛋糕前許願，一張企係旋轉木馬前、笑得好燦爛既正面相，一張係日本郊外玩仙女棒，仲有一張係中環街頭既側影擺拍。
咁就大功告成啦！終於黎到戲肉，就係識！男！仔！
Tinder廣告上面全部都係帥哥美女，但現實又係兩回事。
呢個咁毒撚，向左碌；呢個好書呆，向左碌；呢個好矮，我唔要同矮過我既男仔出街，向左碌；隻狗好得意，但個主人唔得意，向左碌；呢個身材幾正，有八舊腹肌，不過望落似player周圍flirt 女，向左碌。
揀揀下，我覺得自己好似揀緊餐牌，揀飲擇食到一個點，望落好吃先食，無計啦，我係樣貌協會既會員嘛，太樣衰我過唔到自己果關，會食唔落飯架。
有幾個同我配對成功，好快就有人主動搵我傾計，不過講既野都差唔多。
「hi」
我：「hi」
「你好有女神氣質。」
我：「thx。」
「食咗飯未？」
我：「食咗啦：）」
「要唔要出黎食甜品？」
依家就黎11點，傾唔夠兩句，約出黎會做咩，大家心照啦。
我已讀不回，轉同另外一個人傾。
「番工定係番學？」
我：「仲讀緊書。你呢？」
「你估下。」
見我冇咗影，佢又問：「拍過幾次拖？」
我：一次。你呢？
「你估下。」
其實係我太誠實，定係呢度既人太多心眼，試探完之後又要故作神秘，名又假年齡又假，仲要一問三不答，驚死被人起底。
我黎呢度唔係為咗玩你猜我猜。
於是我又再繼續碌，碌咗一堆男仔既頭像後，視線停留係一個名字上。
Anson Lo。22歲。
佢既頭像只係得個背影，連樣都無。
我當然唔會天真到以為教主用交友App黎識女朋友，但係可能因為佢同我偶像既名一樣，我有種莫名既親切感。
我中意教主既程度，係連丁家岐都會呷醋，扁哂嘴咁問我：「如果我同Anson Lo同時跌咗落海，你會救邊個。算啦，你都係唔駛答我，你一定救教主。」
我毫不猶疑咁Like咗佢。直覺話我知，我同佢會有故事。
果然，不出3分鐘，我地就匹配成功。
Anson:做咩用真名呀？好易俾人起底架。
呢個開場白好似有d意思。
我係名字果欄填咗wht。係喎，完全冇諗過問題。
我：多謝你提醒我呀！：）
我：咁Anson Lo係唔係你真名?
Anson:我話係真既都無人信我：（
我：哈哈。
Anson: 等我估下你叫咩名先。
Anson: 唔通你就係傳說中既壞過凱婷既凱婷？
我：俾你發現咗添xd
Anson:有無證據呀？（一個掩嘴笑既表情）
我：我可以連續吸兩枝煙！我係全香港最最最最壞既女仔！
Anson:仲唔俾我捉到你！
Anson:睇黎我地兩個都係名人！
我：係呀，全港七百萬都識我地！：）
Anson:咁凱婷願唔願意同教主見個面？
我一向都有穩定既朋友圈，唔係太中意識新朋友，因為了解一個人需要時間，連同我日見夜見既丁家岐，都有我唔知既一面。更何況未見過面既網友。
我對未知、無把握既人同事都有種抗拒，因為唔知會係驚喜定係驚嚇。相比起冒險同變動，我更想過可以一眼望到底既平淡生活。
例如，由校服著到婚紗，然後一齊白頭偕老，到八十歲都要手拖手。
不過出於賭氣，我一口應承。
可能見網友同整紋身一樣，都係需要一啲沖動。會唔會撞到熟人、萬一真人貨不對辦、見面冇野講好尷尬、如果佢係想呃我出黎上床.......諗得太多，就會冇咗回事。
Anson:你最中意香港邊個地方？
我:尖沙咀。
Anson：呢個地方對你黎講，一定有很多回憶吧？
我：同埋有行唔完既街，有得吹下海風食下雪糕。
Anson:咁聽日尖沙咀等？陪你重溫舊夢。
我：好呀。地鐵站等？
Anson:不如我地黎玩個遊戲。
我好戒備咁問：咩遊戲呀？
Anson:你比個提示我，我黎搵你，睇下我地有無緣份。
哦，我鬆咗一口氣，仲以為係咩性虐變態遊戲，睇黎係我諗得太唔純潔。不過我又有啲擔心。
我：萬一搵唔到呢？
Anson:萬一搵到呢？我對自己既智商有信心，你都要對我有信心：）
我：咁係最熱門既打卡地點見Anson Lo啦！
尖沙咀有好多個打卡地點，K11商場、1881海軍總部、藝術館......睇下你點搵到我。
見陌生人既緊張，不知不覺中，好似比遊戲既刺激沖淡咗。