男友出軌，我決定送26頂綠帽比佢: 萬聖節之夜（下）
我個腦一片空白，阿瑩係我隔離，個嘴開開合合，應該係同我講緊野。我無理到佢，我只係中咗邪咁望住果對男女，移唔開目光。
我望完又望，希望係自己眼花認錯人，又或者係我太掛住佢，所以先出現幻覺。
但唔係，我呃唔到自己。
就算佢化咗灰，我都認得出。
畢竟，我愛左丁家岐1307日，佢隻鞋會打兩個結，佢既耳環係一隻十字架，佢kiss既時候中意成個身壓落黎，我知道得一清二楚。
震驚、不敢相信、妒忌、生氣、絕望、心死......全部情緒湧哂上黎，我唔知應該點形容呢一刻既心情好。
男朋友出軌，女朋友無意中撞到正。電視劇爛俗既情節，居然會發生係我身上。
根據電視劇既發展，女主會有以下兩種正常反應。
第一種，女主角傷心欲絕咁走咗去，男主角係後面追，一邊大叫：「你聽我解釋！」
女主角掩住耳朵：「我唔聽我唔聽！」然後俾車撞到飛上天，三百六十度轉一圈後跌翻落黎，陷入昏迷或者直接死亡。
第二種，女主角殺氣騰騰咁沖埋去，黎手一巴掌拍落去：「你個狐狸精勾引我男朋友！」跟住姐妹甲乙丙丁幫手扯頭髮。
我諗我應該係發咗神經，因為我居然走埋去，拉一拉丁家岐既斗篷，然後攤開手掌，面露微笑咁問：「Treat or trick?」
丁家岐呆呆咁望住我，個樣好似見到鬼。我覺得成件事好好笑。萬聖節黎扮鬼扮馬，點知遇到真既鬼，哈哈哈哈哈哈哈，原來女朋友比鬼仲得人驚。
諗咗半日，佢一句野都講唔出。最後，佢只係捉住我既手：「凱婷。」
我見佢無野講，冷笑咗一聲，甩開佢隻手，轉身走咗去。
我穿過狂歡既人群，穿過熱鬧既街道，經過光線過剩既商店，行過一個又一個巴士站。我唔知自己行緊去邊，我只係想揀一條見唔到盡頭既路，一直行落去。
個心真係好痛，痛到好似撕裂開。我想喊，偏偏一滴眼淚都流唔出。
被最信任既人背叛，就好似係架沉船上，睇住海水一寸一寸漫入船艙，浸到我條腰，浸過我既喉嚨，而我咩都做唔得。
佢同我講過既情話，可以同其他女仔講；他錫過我，亦錫過其他女仔。
點解要咁樣對我？腦裡有成千上萬個原因，可能我唔夠靚，可能我身材唔夠好，可能係我唔夠風情萬種，可能係我太純情，唔肯同佢上床，可能我地想要既野唔同，我俾唔到想要既野佢。
我唔知自己點樣返到屋企。
我打開手機。有153個未接電話，阿瑩11個，魚蛋8個，符詩韻3個，其餘全部係丁家岐打黎。我開啟飛航模式，確定無人睇得見我上線，先禁入去睇WhatsApp。
魚蛋：
「我地知道發生咗咩事。」
「丁家岐佢呢個賤男唔係人。」
「佢襯唔起你，你值得更好既男仔。」
阿瑩：
「翻到屋企未呀？」
「聽日我地4個一齊食lunch好嗎？」
「如果你想傾下，隨時搵我。愛你。」
詩韻：
「知道你想一個人靜下，但係下一次可唔可以講聲先？知唔知道我地好l擔心你。」
我的眼淚刷一聲流下黎。要佢地擔心，我都好過意唔去。其實我係好應該報聲平安，但我亦知道，就算我今晚做咩都好，佢地聽朝都會原諒我。所以，就俾我任性一晚啦。
我深吸一口氣，鼓起生平最大既勇氣，點開丁家岐既訊息。
丁丁：對唔住。
丁丁：我唔想解釋或者否認啲咩，我犯咗個好大既錯誤，我知道錯咗就無得番轉頭，亦都知道無論我做咩去彌補，都唔可以磨滅對你造成既傷害。我.....對唔住。
我打咗幾句野，覺得矯情又刪咗，最後只係好平白咁打咗一句：我以為愛情係排他既，係兩個人既事。
丁家岐即刻上線。
丁丁：從來只得你同我，我心裡面淨係得你一個，我只係一時鬼迷心竅。
我：我信過你。
丁丁：我發誓，以後唔會再同你講一句大話。
我：咁你同我講，你同佢見過幾多次面？
丁丁：今次係第二次。
其實我唔應該問落去。問完我又會唔高興，好似玩緊自虐。
我：幾時開始？
丁丁：暑假。
我：點解你會中意佢？
丁丁：我同佢無感情，只係玩下。
我：咁你做咩同佢kiss？
丁丁：kiss唔代表咩。
我：咁你又同我kiss？
丁丁：......
丁丁：你宜家係邊？
我：唔關你事。
丁丁：凱婷，你係我心目中無可取代。俾一次機會我，好嗎？
我望住個屏幕，望咗足足兩分鐘。
見我無回應，佢又繼續打字：
丁丁：你唔需要即刻應承，但我會一直等！等你重新接納我，等到你肯回心轉意果一日！
逃避雖可恥但有用，我索性熄埋部電話。頭好痛，我要睡覺。
......
第二朝，我雙眼又紅又腫，刻意拖到最後一秒先翻學校，明顯我係避緊佢。
丁家岐冇行過黎，但我知道佢望住我。我扮睇唔到，走去同阿瑩佢地傾計。
大家都當無事發生。
上到課室，丁家岐危機終於解除。
「今日數學突擊小測，做選擇題。」
魚蛋推一推夢遊緊既我，幫我將本數學書塞落櫃桶。
「開始！你地有15分鐘完成！」
試卷上面既字就好似亂碼，我一個字都讀唔入腦。我望下魚蛋份卷，佢數學最好，佢揀B。詩韻運氣好，成日亂撞都啱，佢選擇A。望埋阿瑩，佢同我數學一樣差，佢填D。
媽呀，究竟我們係唔係做緊同一份卷？
睇黎有d選擇只可以自己去做。
心入面有個清晰既念頭：我要報復。丁家岐對我做過既事情，我要加倍奉還比佢。
等到小息，我出現係佢班房。佢既兄弟恭恭敬敬咁叫咗我一聲「阿嫂」，知道我地有野要傾，拍一拍佢膊頭，就行埋一邊。
我定定咁望住丁家岐，係佢眼珠望到自己既倒影。
你有無愛過一個人？你有無恨過一個人？如果你有，你就會發現，愛、恨、欲，本來就係三位一體，由愛生恨，當欲望得不到滿足，就會想摧毀對方。
我前所未有咁平靜，平靜到我覺得講緊野既唔係我，而係體內某個沉睡已久既靈魂：「丁家岐，我原諒你。我地重新開始啦。」
但如果佢以為過咗琴日，我仲會係以前果個千依百順、冇咗佢就唔得既乖乖女胡凱婷，佢就錯啦。
從今日起，我都係叫胡凱婷。不過，係胡作非為既胡，壞過凱婷既凱婷。