男友出軌，我決定送26頂綠帽比佢: 萬聖節之夜（中）
10日31日，傳說死去既靈魂重翻人世間，係條街度隨意遊走。
可能係陰氣太重既緣故，呢一日會有好多可怕既事發生。例如，古有變態拎住把刀隨機斬人；今有警察一怒之下施放催淚彈。第一次出街慶祝萬聖節，希望唔會有唔好既事發生啦！
玩還玩，始終有男朋友，我無著得太暴露，我揀咗條白色背心裙，係頭上綁咗個蝴蝶結，再插上一對天使翼。
逼黎逼去，好艱難先出到地鐵站，因為真係好多人。未見佢地，我打開WhatsApp，答答答地輸入訊息：
「我到啦！你地係邊？」次次都好似鬥遲咁，邊個早到邊個傻。
阿瑩：「tst，15分鐘後到：）」
魚蛋send左段錄音過黎：「買埋野食就過黎，有無人想食雪糕？買二送一，有西瓜味，柚子味，青提子味，木瓜味......」
我：木瓜味好呀！
阿瑩：我又要，木瓜豐胸
我：真係有用？
阿瑩：好過無呀
魚蛋：@詩韻 你要唔要豐胸呀？
「婷婷！」阿瑩飛奔過黎，俾咗我一個大大的愛的擁抱。阿瑩扮女巫，戴大眼灰色con，將頭髮盤起，兩邊各墜下蜷曲的絲縷，似足架妹。
「你做咩無化妝既？」阿瑩上下打量我。
「咪搽左蜃蜜咯。」
佢氣急敗壞咁拉我入廁所，哇啦一聲倒哂d化妝品出黎：「我知你天生麗質素顏都靚，但係d燈光咁勁，會照到你冇哂血色架。」
佢拎出一盒粉底，搽係我手臂上試色：「你皮膚白，呢隻色襯你。」
「我唔係好適合濃妝喎。」我有d擔心，對化妝既認知，始終停留係小學上台表演，老師會幫我地搽幾層閃粉，d胭脂紅到好似馬騮屎忽，當正化妝品唔駛錢。
「你信我啦，咩都唔好問，合埋眼交俾我。」
雖然半信半疑，但我都係好聽話咁一動不動。我感覺到佢係我臉上搽咗粉底、掃咗眼影，畫咗眼線，仲有夾咗睫毛。
「得啦！」佢打咗個響指，好滿意咁望住佢既「製成品」，亦即係我。
我望下塊鏡，又好似真係同平日唔同左。
「魚蛋話佢到咗啦！」
「符詩韻死咗去邊啊？」
我們好有默契咁一齊轟炸佢WhatsApp。
魚蛋：例遲小姐你幾時到？？？？？？？
阿瑩：例遲小姐你幾時到？？？？？？？
我：例遲小姐你幾時到？？？？？？？
終於見到「詩韻輸入中......」
「出左門口，你地玩住等我丫！」多數佢講得呢句，姐係代表佢仲係屋企。
「三十蚊一枝！埋黎睇埋黎揀！」耳邊傳來一陣小販既吆喝聲。
有著燈既兔耳貓耳頭飾，有南瓜袋連自家製糖果，有氣球玫瑰花。
我記得上一年情人節，阿岐都買過氣球玫瑰花俾我。唔知佢係南丫島出翻尼未呢？佢今日成日都未搵過我。
我第N次拎部手機出黎望，WhatsApp訊息都係得一個剔，應該係離島訊號唔好，所以收唔到。一日不見，如隔三秋，個心掛住掛住，玩都玩得唔安樂。
一架的士飛馳而過，又突然折翻黎，停係我地面前。
詩韻著左條高開叉的銀色晚禮服，有前有後又高又瘦，飄逸既長髮傾瀉而下。她一撩裙襬，氣場大開咁行落車。
佢原地轉咗個圈：「望夠未？望夠就出發啦。」沿途路人都望住佢，有幾個男仔走上去想同佢搭訕，都比佢無視咗。
有個狗公唔死心，跟咗我地三條街，趕極都唔走：「我地係唔係見過面？」
詩韻翹埋對手，一臉唔耐煩：「宜家咩年代呀，仲用呢招？可唔可以有d新意？」
狗公被拒，即刻轉第二個目標，佢好真誠咁望住我：「呢位天使，不如我地做個朋友，好唔好？」
「我有男朋友啦。」我細細聲咁話。
「我覺得你講緊大話。」
我後退一步，有點不知所措，唯有拎部手機出黎扮睇。
佢得尺進尺，掂我膊頭：「你電話號碼係咩？」
魚蛋沖上黎，大大力推開佢：「佢對你無興趣呀，你走開啦！」
狗公爆咗句粗口，念念有詞：「唔玩得，學咩人出黎玩？！」
阿瑩即刻挽住我手臂：「你有無事啊？」
詩韻責怪咁問：「你做咩唔一早拒絕佢？」
「我以為佢會識趣走開，咪唔想個氣氛咁僵，好似好無禮貌。」
「你當呢度係學校？仲要講禮貌。」詩韻將我個頭擰過去。「佢對個個都係咁。」
果然，個狗公已經烚熟狗頭咁去撩其他女仔，完全無浪費一秒時間去失落。歡場無真愛，睇黎係我諗得太多。
阿瑩好好奇咁問佢：「詩韻，之前果個男仔咪幾好樣，做咩唔俾個機會人，睇下有無得發展？」
「追我既人由太子排到油麻地，個個都要應酬，我咪瞓覺都無時間？」
佢又真係無誇張。詩韻出咗名港女性格，爆粗遲到又中意發脾氣鬧人，但係佢既IG人followers不斷上升，d男仔仲越戰越勇咁扑埋去，花心思哄佢開心。
魚蛋問咗一句：「其實男仔中意咩架？」
「男仔中意咩？拎本校規出黎，叫你唔好做咩，你做哂就得啦。拉低隻襪，扯高條裙，著黑色bra帶，呢d唔駛我教啦！」
阿瑩正想講野，一陣震耳欲聾既音樂響起。
Kiss me, ki-ki-kiss me
親吻我吧 親親親吻我吧
Infect me with your lovin'
用你的愛意感染我
Fill me with your poison
用你的毒藥迷惑我
Take me, ta-ta-take me
帶我走吧 帶我離開這裡吧
Wanna be your victim
甘心成為你的獵物
Ready for abduction
準備好做你的囚鳥
紅、藍、黄、綠，各种高純度的色彩，投射係每一個人既頭上。
燈光酒色下，一對男女忘情地接吻。魔女身穿黑色透視上衣，迷你短裙，有一雙化了煙薰妝的大眼睛，嘴唇紅到可以滴血。
而同佢接吻、戴住半邊面具既死神，正正就係丁家岐。