男友出軌，我決定送26頂綠帽比佢: 萬聖節之夜（上）
最後一堂係歷史課，四個女仔坐埋一齊，梗係開心事台吹水啦，唔通聽書咩。
「朝代幾許更选，人的劣根性永遠都存在，所以權鬥同陰謀都系會一而再再而三咁出現，好啦請同學揭去第246頁......」
你問我點解會選修歷史？無架，因為我見到數字會頭暈，智力亦唔足以處理一大堆物理算式，咁咪淨翻文科可以揀。
「阿婷，星期日係萬聖節喎，星期日你有咩節目呀？」坐前面既詩韻擰轉頭問我。
魚蛋同阿瑩異口同聲咁幫我答:「咪陪阿岐咯」。
「哼！有異性無人性！」
聽到呢個重色輕友既指責，我不由得露出甜蜜既微笑。
阿岐係我男朋友，佢大我一歲，我地系籃球場上一見鍾情，曖昧左兩個月，就一齊左啦，話咁快就四年。
同其他情侶唔一樣，我們從來唔會吵架，亦都未試過分分合合，每一日都好似初見，十號風球都分唔開我地。
隔離位既魚蛋用手指篤我既頭：「你自己數下啦，上次溜冰你無黎，上上次詩韻生日你又唔出現，上上次話唱K又臨時放我地飛機，再上上上次......」
唉，呢d叫戀愛大過天，魚蛋未拍過拖，佢系唔會明架啦。
阿瑩及時打斷左佢：「得啦得啦，你數到天光都未數完。你望下你本書先啦聰明！」
魚蛋以為自己本書拿反了，望都唔望就將課本顛倒過來。點知望真d，發現依家先真正拿反了。我們幾個不由得哈哈大笑。
我趁機對阿瑩投去一個感激的眼神。
我突然醒起，今個星期日阿岐要入南丫島，陪佢阿嫲過生日，無人陪我，於是我主動提出：「不如星期日出去玩啦！」
一聽到個「玩」字，詩韻即刻好興奮：「係吾係落老蘭？」
阿瑩第一個舉手贊成：「好呀好呀！」
「老蘭有無魚蛋食架？」
詩韻反左佢一個大白眼：「無架，不過有小鮮肉食，鐘意既仲可以食埋洋腸。」
「咁我都去！話唔定會遇到真愛！」魚蛋托住個腮，發佢既春夢，系春秋大夢先啱。
下，玩到咁大？我以為係去行街，食個晚飯，十一點前翻到屋企果隻。
去玩係我提出既，突然反口話唔去，好掃興啫。阿瑩似乎睇穿我的為難，佢推推我手臂：「我們都唔會玩得太夜，星期一要翻學丫嘛。」
見我仲係猶豫不決，她又話：「你係咪驚阿岐唔比你去呀？」
「我地去影下相打下卡，感受下節日氣氛，你唔飲酒都得架。」
「妖，我識果度既人，無事架。」詩韻加入游說大隊。
「多一個人，咪可以互相照應嘛。」
「咁......好啦！」我慢慢地回答。
「耶！美女團重出江湖，缺一不可！」
下課鈴聲響起了。
老師前腳一走，丁家岐已經孭住個斜孭袋，拎住個籃球，靠在門框，擋住哂所有人既視線，含笑望住我。
似足擺好姿勢等人影相的男模。
「喂，你個騎士黎接你啦！」
佢好chok咁撥一撥額前既碎髮，做左個「請」的動作。我又羞又臊撲入佢懷裡。
全班人都望住我地，然後一齊起哄，又拍哂手掌，大聲到隔離班既人都跑黎湊熱鬧。
呢種感覺令人又討厭又享受。
「走啦走啦！」我一枝箭咁沖左出去。
「傻妹，你個書包都唔要啦？」丁家岐走過去，幫我拎出黎。出左校門，我們好自然咁拖左對方隻手，十指緊扣。
「今日唔講野既？」
「琴晚溫書溫到好夜丫。」我打左個呵欠。
他掐了掐我臉頰：「咁辛苦？我出左糧，請你食野。」
「好似有間新開張既小食店。」
「不過好多人排隊。」
「你想食咪排咯。」佢好豪氣咁拋左個錢包過黎。
我知呢d係佢做私補賺番黎既錢。佢請我食野，為我付出，我接在手，甜在心裡：「你養我呀？」
「我唔養你養邊個？」 佢拍拍我個頭。
我地買左兩個白糖砵仔糕、同埋佢最中意既章魚小丸子，仲有一杯奶茶。
「好甜。」
「梗係啦，我請你架嘛。」
叮叮兩聲，佢低頭check WhatsApp。
我好隨意咁提起：「係喎，星期日同詩韻佢地行街。」
「去邊呀？」
落蘭桂坊玩，應不應該同佢講呢？
唔講好似有心隱瞞咁，內心好有負罪感。但係講左，佢應該唔會俾我去。我應該點同我班姊妹交代呢？
「你應該唔會學人去蘭桂坊吧？」見我唔答，佢突然抬起頭，皺了皺眉頭。
我心虛咁望住佢，第一次對佢講大話：「哈哈，點會呢，都係旺中葵廣果d。」
佢鬆了一口氣：「老蘭果度好多鹹豬手，男人會乘機抽水架，特別系你呢d天真無邪既受保護動物。」
「佢地會做咩架？」我一臉無知咁問。
丁家岐將外賣盒放埋一邊，露出個不懷好意的壞笑。
「你做咩野呀？」
佢扶住我條腰，俯身一野錫落黎。佢既肌肉完全壓在我身上，貼到實一實。我紅都面哂心跳加速，覺得渾身滾燙。
係呢個時候，突然有個阿伯行過，搖哂頭大大聲咁話：「宜家d後生真係傷風敗俗，睇到都眼冤。」
之前既浪漫氣氛已經蕩然無存。
丁家岐對我吐吐舌頭： 「就係咁啦。不過果度既色狼唔會有我咁靚仔。 」
翻到屋企，我攤係沙發。
去？定係唔去？呢個問題一直係我腦裡面轉黎轉去。好煩惱呀。
最後我拎出一枚銀仔，決定交俾天意。
估唔到，呢個決定會令到我的生活翻天覆地。