《😭你無法知道大數據年代擦不上榜努力寫作的作家在哭😢》完☑️☑️☑️: 😥😥😥😥😥😢😥😢

Google AdSense，Ad代表廣告，Sense代表佢有Sense…點都好，就係呢樣嘢令到呢間原本專心做網絡資訊科技嘅公司華麗轉身成為全球最大嘅廣告商；利用Google Search Engine嘅地位同技術，Google Analytic得返嚟嘅大數據資料；再經Google AdSense做廣告接洽，AI分派，成就現今網絡世界上一個最龐大嘅垃圾marketing現金流。

咁既然要講，就都提下兩嚿GA係點運作啦，AdSense會喺Analytic攞資料決定廣告分派，例如講飲飲食食嘅網就做餐廳廣告或潮流廣告，教學資源網就做學店廣告，而佢亦都會攞埋User data做combine，例如你search過staycation就會有鋪天蓋地嘅klook同agoda廣告，前提係當然啲firm要塞咗錢畀Google，呢間嘢係唔會做義工嘅。賣完廣告佢就會睇成效，呢樣嘢又會歸返畀Analytic做，你有無停留睇廣告，有無傻仔click入去，click完有無細閱，然之後有無攞信用卡出嚟，一切都已經盡在佢掌握之中，再gen份report出嚟。最後Google就好威威咁同啲firm講自己有幾勁，市場推廣有幾成功，然後收錢。

喺呢個環境下，每個網站都變咗一個廣告牌，而你哋都知現實中每個廣告牌都唔同價，要做嘅嘢都唔同；例如都係巴士站廣告，中環就賣名錶，旺角就賣MirrorXM記，上水就賣榮華臘腸，一樣道理。咁每個廣告牌值幾錢？嚟到今時今日呢樣嘢已經唔再係乜商業秘密，以一條賣廣告嘅YouTube片為例，假設佢係一條正常幾分鐘嘅片，中間插一至兩個廣告，當佢得到1M(Million，唔好同我彈啲潮童出嚟話M係萬)點擊，個mean rate大概係1000USD，換算做港幣呢條片個片主收入就大概係$5000到$10000呢個range(網站計法類同，會再講)。

咁點決定呢個range？如果你有地位有fans有慣性流量自然高，例如BlackPink出嚟講幾句攞1M，同一個宅男喺屋企錄歌突然爆紅攞1M係唔同；第二就係睇你類型，越腐敗就越收得多錢，例如偶像歌唱，名錶開箱，五星級酒店自助餐評測，試幾多樓可以掟壞iPhone…睇嘅人都係肯使錢嘅高消費無腦(兼爭卡數還min pay)人士；相反，做新聞，做政治財經清談，做教學資源，做兒童節目嘅片就會被歸類為低，因為都係受高等教育人士唔易受廣告唆擺，兒童無消費力等…

嚟到呢度係時候講一樣嘢，Google係一間道德高地公司，所以佢會將啲佢睇唔順眼嘅嘢加入blacklist，以YouTube嚟講即係黃標，一但拉黑咗可以好大鑊，不但而家嘅收入可以歸零，將來你想返生都未必有機會。(何謂道德？佢話係就係，睇利益，睇風氣，睇權力團體，例如你推廣一夫多妻制可以死無葬身之地，但推廣同志平權就乜事都無…)





下章再續。