《😭你無法知道大數據年代擦不上榜努力寫作的作家在哭😢》完☑️☑️☑️: 😥😥😥😥😥😢😥😥

人氣，顧名思義，就係人頭數；何謂人頭，只要你做到一個偽credential出嚟，轆一轆自己篇文就人氣+1，喺你哋嘅層面嚟睇，人氣係逐篇文計，即係你有三篇文，就三篇文人氣各加一；但從網站層面計，你貢獻嘅總人氣都只有一，因為只係一個身份，但呢樣嘢已唔關你事。

咁如果你得一條友，可以點突破得一人氣嘅困局呢？你可以選擇買多部電話，買多張電話卡，再裝個乖乖嘅瀏覽器，又去自己篇文轆一轆，咁就又加一；但我相信大家都有屋企人嘅，咁就攞晒老竇老母家姐細佬啲電話去睇自己篇文，咁就…死得啦，你都明知而家啲家姐細佬係絕對唔會俾你掂佢部電話；況且，就算一家十口都係得十人氣，幾時得嚟儲夠五六十上榜…

喺呢個四面楚歌嘅時候，我哋就要善用公用資源，你張電話卡得一個IP，屋企寬頻又得一個IP，可以點搞？其實通街都係IP，例如美心星巴克有IP，中信M記有IP，公共圖書館有IP，以至公屋大堂，商場，港鐵站都有IP，因為呢啲地方都有WiFi Access point，好好記住你家居寬頻送嗰個街外WiFi Hotspot Access密碼，咁只要你去到每一個港鐵站login WiFi，就可以用一個新IP；如果你搵到幾個同學仔交換呢啲Access，就可以每個港鐵站同商場係咁換PCCW，CSL，HKBN，HGC…

但咁係唔夠嘅，因為Google Analytic除咗會認IP，重會認瀏覽器，所以，你可以裝多幾個瀏覽器，放定啲setup檔，安全起見每用完一次睇自己篇文就鏟瀏覽器，再重新裝過，換個新IP再人氣+1；聽完係咪覺得好熱血呢，成件事就好似玩pokemon GO咁，假設你有四個WiFi Hotspot Access，行十間商場用晒所有公用IP，咁你就有40人氣，加埋十個八個街客，至少都上到榜40。

聽到嚟呢度，係咪覺得充滿希望又好絕望呢，擦一日就OK嘅，擦多幾日你可以考慮下做兼職速遞員，又或者踩住架單車做食物熊貓，個回報好可能大過自己篇文上top 10。吓，你唔信？我同你講呀，人氣作家呢啲虛名嚟㗎咋，我自己呢條躝癱就唔計啦，嗰啲所謂香港知名網絡作家，如果你知佢搵幾多錢，嚇死你呀…如果唔係沙X亞就唔會俾人話食足N年軟飯啦，你估空穴來風咩？就算係出咗上百本書嘅梁望峯先生，都話呢個年代寫書連譚仔阿姐都不如…就知情況有幾唏噓…咁唏噓，咪因為多得我呢啲一分錢都唔收，又肯不停寫嘢娛樂大家嘅PK仔，加埋網海上面嘅小說早就睇之不盡，重有邊個咁傻仔去三中商買實體小說？





講就咁講，但我係非常敬重梁望峯先生嘅；雖然我唔係佢fans，連佢嘅作品我都未試過睇完一整本，亦唔覺得佢寫得非常出色；不過我絕對認為梁先生係香港現代小說其中一位最重要嘅作者，各位小朋友喺書局見到不妨買返一本放屋企，就算唔買都去圖書館借嚟睇。

下章講Google AdSense。