[校園][純愛]《身旁的那一個》: 第一百零四章(終章)

我同佢如期喺禮拜六出嚟食飯

老實講食之前我有問過佢，

依家我同佢兩個單獨食，

會唔會唔係咁方便

係佢話唔會





同時間佢男朋友亦都知呢件事，

佢話雙方互信嘅程度好高

如果連信任都冇嘅話，

同呢個人一齊落去都冇意思

每日擔驚受怕唔知佢去咗邊





到頭嚟咪盞自己辛苦

況且依家都係舊朋友食飯，

又唔使諗到咁多，

既然佢冇問題

咁我都搵唔到唔出席嘅理由





最後我哋去咗旺角食大勝丼

第一我同佢之前都分別食過呢間，

覺得唔錯

同埋佢返咗嚟之後都搬咗，

就佢方便於是去旺角食

以前佢成日都就我，

時代唔同喇到我就返佢一次啦

況且旺角返觀塘搭小巴嘅話又唔係好遠





冇耐就決定咗，

就慢慢等待禮拜六嘅來臨

話說我同佢有返聯繫之後

其實冇乜特別溝通，

唔會好似讀書嗰陣咁，

私底下兩個係咁chat

都要避忌下啦係咪先





都係嗰句，

始終身份唔同咗

但係嵐嵐佢就開咗個group，

有佢啦我啦同埋愷晴三個

佢加我入去嗰刻，


腦入面嗰啲舊片段即刻湧現

唔係講笑，





真係咁誇張

諗返起差唔多十年前，

我哋三個成日喺msn開三人會議嗰啲片段

隔咗咁多年，

好多嘢都唔同晒

但係估唔到我哋三個會再次有個共同嘅group，

咁多年經歷咗咁多嘢

去到最後又兜返轉頭，





都係我哋三個

唔好講咁多廢話喇

直接講禮拜六啦，

嗰日我哋好快就去到食嘢嗰度，

等咗一陣就有位

我:「嵐姐今餐唔好同我爭

我請」

嵐嵐:「嘩你轉死性呀

咁鬼度縮嘅東哥

竟然會請人食飯」

我:「爭你嘅我一定還」

嵐嵐:「記性仲好咗好多喎」

我:「我記得嘅

唔好意思呀遲咗還畀你，

希望你唔好介意」

嵐嵐:「真係唔係好慣你講嘢咁客氣」

我:「屌，

食你就食啦咁多嘢講

話咗請你就請你咪撚咁婆媽

咁樣o唔ok」

嵐嵐:「咁樣先至係巫澤軒」

跟住我望住佢笑

的而且確，

大個咗就等於同成熟世故呢兩個詞語

連成一線咁，

好難再好似以前咁

有咩就衝口而出

想講就講，

不知不覺學識咗包裝呢回事，

係今日見返舊朋友先至放鬆一陣

都唔係完全放鬆晒㗎，

有啲嘢都要避忌下

不過點都好過平時囉，

都係嗰句啦要求唔好咁多

因為你根本就冇話事權.


呢餐飯我同佢一如以往咁

都係有講有笑，

佢講下佢咁多年喺英國嘅事

我又同佢分享下，

佢唔喺香港嗰陣

我哋呢班人有咩變化

嵐嵐:「我早兩個月撞返賓仔

放工見到佢」

我:「點呀佢見到你仲有冇扯旗」

嵐嵐:「我q知咩

我唔係你呀東哥，

我唔清楚其他人身體情況㗎」

我:「咁點呀佢仲有冇咁戇鳩」

嵐嵐:「冇呀成個人同以前唔同晒

佢無啦啦多謝我

我都嚇咗一跳」

我:「嘩無啦啦講多謝

肯定有伏」

嵐嵐:「佢話大個就明白，

我以前唔鍾意佢，

直接拒絕係對佢最好嘅做法

係以前細個不解點解咁強硬」

我:「依家我都明嘅，

冇意思就真係唔好對人拖拖拉拉

唔鍾意好正常

唔使驚唔好意思拒絕人，

太仁慈其實對雙方都唔好」

嵐嵐:「係呀，

我不嬲都係咁覺得

可能有啲人會覺得我好蠢，

有兵收都唔收

咁我寧願俾人話蠢囉，

我都唔想搞到人」

我:「係，

唔好話邊個啦

淨係講我都係

其實我以前處理你同埋愷晴，

都係做得唔好

去到依家我對住佢都有啲唔好意思」

嵐嵐:「都過咗咁耐

佢又好我都好，

根本就冇怪過你

佢要怪你呀，

佢就唔會一路同你friend到依家啦」

我:「咁我都知道

佢都有同我咁樣講過」

嵐嵐:「其實可能我都處理得唔好㗎

咁但係冇辦法，

因為我哋都冇能力時光倒流

返去再做一次，

既然係咁唔需要咁執著丫

見返你，

可以同你好似依家咁

嘻嘻哈哈食餐飯

其實我真心覺得好開心.」

我:「咁我都係

我又唔係好執著嘅不過講開又講啫.」

嵐嵐:「咁就好喇

等陣先有電話」

跟住佢就講電話，

講講下佢問一問我

嵐嵐:「我男朋友上嚟畀啲嘢我o唔ok呀

因為佢陣間有嘢做

我諗住我哋食完飯嗰陣，

同你分開咗之後佢先過到嚟旺角，

點知我同你食耐咗

佢又早咗到

所以咪諗住叫佢上嚟畀嘢我囉，

你o唔ok」

我:「ok呀冇問題」

跟住佢就講返電話

叫佢男朋友上嚟，

一收線就同我講唔好意思，

我:「痴線有咩唔好意思」

嵐嵐:「都係唔好意思嘅，

我同你兩個食飯叫埋我男朋友上嚟畀嘢我」

我:「痴線梗係冇嘢啦」

嵐嵐:「咁就好喇」

冇幾耐佢男朋友就上咗嚟，

睇相就睇過

真人都係第一次

斯斯文文咁，

整體個感覺好nice

我唔理係咪扮出嚟啦，

總之個感覺舒服就得

我:「你好呀你好呀」

嵐嵐男朋友:「你好呀東仔，

終於見到你真人」

我心諗點解咁講呢

奇奇怪怪咁

不過嗰一刻就冇講啲乜，

扮聽唔到算

我:「埋單啦費事阻住你哋

呢餐我嘅」

嵐嵐:「多謝」

跟住我就出咗去埋單，

呢一餐終於請得出，

隔咗差唔多十年先還禮

係就係遲咗㗎啦，

我亦都唔係第一次遲過人

不過算啦，

當事人都唔介意就得啦

等緊𨋢嗰陣，

嵐嵐收到個電話，

我唔知係屋企上網丫定係電話上網

總之佢就是示意後樓梯嗰邊講一講先

叫我同佢男朋友兩個落去等佢先

咁冇嘢丫咪落去囉係咪先，

落到去地下，

我哋兩個大男人就傾下計

可能佢驚尷尬啦，

事關係佢撩我先嘅

嵐嵐男朋友:「終於第一次見你真人呀東仔」

我:「其實我都覺得奇怪，

啱啱你咁講不過費事問啦」

嵐嵐男朋友:「你知唔知，

我聽過呢個名好多次㗎啦

亦都一早見過你㗎喇，

不過就唔係真人」

我:「下」

我心諗你冇follow我ig㗎喎，

點會見過我呢

嵐嵐男朋友:「嵐嵐佢有冇同你講

其實我識咗佢好多年㗎啦

初頭我都係咁食白果，

原本我唔知佢鍾意邊個㗎

直至有一次無意中我見到佢銀包有你啲相

我就知點解佢一直都唔應承我」

我:「放心我識做嘅

今次純粹係咁耐冇見食餐飯啫，

大佬唔好誤會」

嵐嵐男朋友:「你唔使咁敏感

冇事冇事，

我純粹同你講返啫

我以前好羨慕你㗎知唔知呀」

我:「下

羨慕啲咩呀」

嵐嵐男朋友:「只要係關於你嘅嘢，

嵐嵐以前全部都好重視

就連你送畀佢嗰個裝住護膚品嘅袋

佢都一直用咗好耐

所以咪好羨慕你囉」

我:「你哋就好啦咁樣

佢連呢樣都同你講埋，

坦坦白白好緊要呀」

以前賓仔好Oliver都好，

成日都話好羨慕我

估唔到咁多年後嘅今日，

竟然又有多個

我:「有咩好羨慕呀

最緊要係依家丫嘛

我對佢冇嘢㗎放心啦

而且佢依家身邊嗰個係你」

嵐嵐男朋友:「細個唔識諗丫嘛

我嗰陣覺得你好犀利

而且嵐嵐都有同我講

今日約咗你食飯

所以真係唔使咁敏感呀東仔，

連自己女朋友都唔信

咁不如唔好拍拖啦」

我:「你兩個講啲嘢一樣」

嵐嵐男朋友:「有機會再傾呀

同你都幾好傾」

我:「好呀.」

講下講下嵐嵐都落咗嚟，

見佢好似整緊個銀包

行到過嚟就一路講一路整

嵐嵐:「你兩個講咩呀

講到笑口噬噬」

嵐嵐男朋友:「冇呀冇呀」

我:「梗係講你啲衰嘢啦

點樣唔要面r我呢條水魚嘅著數囉」

嵐嵐:「唔該你唔好捏造事實

從來都冇咁做喎，

至於你有冇咁做呢

我就唔知喇」

我:「我對住你一定冇囉

我呢啲咁好品」

嵐嵐:「一定係咁啦」

我:「定係你心中有鬼呀

見我哋笑口噬噬就以為我哋講你」

嵐嵐:「你知你㗎啦東哥

作故仔屈人幾叻

小心啲好」

我:「你放心啦

我講啲咩衰嘢都好，

你兩個打風都打唔甩」

嵐嵐:「多謝喎咁就」

我:「走啦

唔該你兩個唔好喺單身狗面前放閃」

嵐嵐:「唔好意思喎講耐咗添」

我:「咁好啦我走喇

拜拜兩位」

嵐嵐:「好啦我行呢邊呀拜拜」

嵐嵐男朋友:「畀完嘢你咁我都走啦

拜拜」

於是我哋就分開咗

其實有個問題頭先想問佢男朋友

不過真係好難開口，

但係嵐嵐頭先已經解答咗

因為我見佢整緊銀包嗰陣，

張相係佢同埋佢男朋友，

咁證明佢真係放低咗喇

都係好事嚟嘅

見到佢男朋友咁好，

要操心呀，

都唔輪到我操心啦

我只係佢一個舊朋友

或者我哋嘅關係好好，

我哋默契好強，

我哋好了解雙方，

之但係我哋最多都只會係好朋友

有好多嘢唔係呢個身份可以做

好似今日咁我同佢兩個食得咁開心，

其實真係好滿足㗎啦，

你見我一再講就知，

感覺舒服真係好重要

我希望佢都係呢個感覺

大家都釋懷咗，

望住佢拖住佢男朋友，

我相信佢都係咁

或者睇緊嘅你哋，

甚至乎我身邊嘅朋友，

都會覺得我同嵐嵐冇一齊過係好可惜啦

冇辦法啦咁就，

正如佢所講，

冇人可以時光倒流返去以前

與其眷戀往事

倒不如珍惜呢一刻，

唔好重蹈覆轍

又係發生咗先嚟後悔，

或者我同佢嘅故事都差唔多㗎啦

所有嘢都已成定局，

係有樣嘢講過想同佢做

大家唔好諗咸濕嘢呀

我記得以前讀緊書嗰陣同佢講過，

好想同佢睇一次演唱會

不過睇嚟都好難發生㗎喇，

冇得怪嘅，

係自己問題就係自己問題

唯獨呢樣嘢叫做美中不足囉，

分分鐘連佢都唔記得

又或者依家佢有得揀，

都唔會揀我，

咁就算啦

唔好喺佢面前重提喇


你的他怎允許 結伴觀賞雪的淚

永不開封的汽水 讓我抱在懷內吻下去