[校園][純愛]《身旁的那一個》: 第一百零三章

見完佢，

老實講今次同佢傾計真係好舒服

去到今時今日，

喺呢個階段真係好難要求好多

同佢開開心心暢談往事，





咁就已經好夠

佢固然已經放低咗

啱啱同佢傾完計我先知

我諗我都係同佢一樣

唔會再比以前嘅事束縛住，





可能好多人會覺得好可惜，

兩個默契咁好

又曾經鍾意過對方嘅人

偏偏從來冇一齊過

但係我反而覺得，





與其繼續沉迷一啲冇得改變嘅歷史

倒不如珍惜大家仲有得見嘅機會

佢有男朋友

我唔可能再好似以前咁成日同佢一齊，

環境亦都唔容許我哋

始終我哋唔係學生

唔係喺同一個空間生活，

有咩事要約真係比較困難





真係見得一次得一次

可以同佢重新聯繫返，

無論係乜嘢關係都好

我都真係心滿意足

正如佢話齋，

可能我個人真係唔啱拍拖

大家距離遠返少少





或者咁樣先至可以保存得耐啲

太緊張永遠都揸喺手嘅話

反而係物極必反

破壞咗呢件事，

所以我今晚見返佢

我真係冇任何負面嘅感覺

唔會耿耿於懷佢已經有男朋友

亦都唔會念念不忘我同佢以前一齊嘅回憶





反而係覺得鬆一口氣，

咁多年想講嘅嘢一次過同佢講晒

好想見返佢呢個願望，

亦都已經做到

既然係咁我仲有咩好介懷呢

我就係咁諗啦.


返到屋企，





我就同老母講，

話我見返嵐嵐

點解無啦啦同佢講

因為佢成日都問我嵐嵐依家點

佢唔知我同嵐嵐中間發生過嘅事

次次問我都話唔知

又話我收埋唔講

今日真係見返佢，

咪同佢講囉

我:「老母

我今日見返嵐嵐」

老母:「佢返咗嚟喇

叫佢上嚟食飯吖嘛

又或者我買啲嘢送畀佢」

我:「唔好亂嚟呀你

人哋依家有男朋友」

老母:「哎呀可惜呀

死仔你真係蠢到死」

我:「痴線無啦啦做咩鬧我」

老母:「梗係鬧你啦

搞到我冇咗個好新抱」

我:「真係short short地

話明係friend囉」

老母:「人哋當你唔係呀嘛」

我嗰陣心諗，

唔係掛連我老母都睇得出

有冇咁明顯呀

我:「你又知

你係佢咩」

老母:「你老母我都做過女人

雖然佢冇同我講，

不過有啲嘢真係好明顯

佢唔鍾意你呀，

就唔會仆過嚟拎嗰個碌屎啦」

我:「你講咩呀

咩碌屎」

老母:「你以前考試呢

唔知係a level定係會考喇，

有一次你咪唔記得帶碌屎嘅

跟住咪叫我落去拎本嘢畀佢」

我:「我記得喇」

老母:「我落到去見到佢成個頭濕晒呀

我問佢咩事佢話啱啱沖完涼，

所以話你唔識就唔識啦

你知唔知唔吹頭對女仔幾辛苦呀

你一搵佢即刻仆出嚟，

個頭濕晒都唔理」

我老母仲醒過我

有啲嘢連佢都睇到，

偏偏我懵然不知

去到呢個位我都一笑置之

以前真係有好多線索，

係我太蠢觀察力太低冇留意過

不過都係嗰句啦，

去到今時今日都改變唔到啲乜

我都唔爭在孭多條罪，

同時亦都唔會搵嵐嵐講返呢單嘢

都過咗咁耐，

我唔肯定佢記唔記得

同埋就算記得又點啫，

再係咁講舊事驚佢誤會

始終佢依家有男朋友

好多嘢要點到即止，

唔好惹人誤會，

呢方面佢做得好好呀

以前我同愷晴拍拖嗰陣，

嵐嵐點鐘意我都好，

依然係十分之克制

咁多年之後角色逆轉，

我諗呢個係我依家少數可以做嘅事

咁耐冇見講往事好正常，

但係如果keep住講就會變成煩厭㗎啦

歷史唔使係咁提嘅，

隱藏反而更顯得自己得體

都係嗰句，

見得返仲可以有講有笑

已經冇嘢好強求喇.