[校園][純愛]《身旁的那一個》: 後記

大家好，

我就係呢個故事嘅男主角東仔，

首先好多謝大家一路睇咗咁耐，

講真嘅，

就算係我本人，





其實都唔覺呢個故事有好大嘅趣味性，

因為過程入面，

基本上係缺少咗青春呢個環節，

至少我呢個男主角唔會為咗個女仔做好多傻事，

同典型校園愛情故都幾唔同下，





所以見到你哋一路咁支持，

對故事嘅發展有咁多嘅討論，

其實我真心覺得好開心，

一路睇，

一路見到你哋係咁喺度估邊個係女主角，





實不相瞞，

其實丁仔當日聽我講嗰陣都係咁，

佢啱啱開始聽嘅時候，

佢都有問過邊個係女主角，

嗰陣我特登冇同佢講，

因為我唔想佢知道邊個係女主角的話，

就會特別用更多嘅筆墨去描寫嗰個人，

但我有同佢講，





聽聽下又或者寫寫下你就會知架喇，

事實上我每次諗返起同佢講我中學生涯嗰陣，

根本就離不開嵐嵐呢個人，

呢方面我唔講咁多喇，

因為故事入面都講咗好多我個人嘅感受，

喺度就不再重複，

至於第二個問題，





就係究竟嵐嵐甚至係愷晴，

佢兩個究竟有冇睇呢個post呢，

講真嘅，

我係曾經有諗過畀佢兩個睇，

不過最後都冇咁做，

你知啦，

男人老狗有時真係好奇怪，

寧願對住一班唔識嘅人抒發自己感受，





都唔想同一啲自己好熟嘅人講，

驚麻煩到佢哋好，

講完唔知點面對佢哋又好，

所以諗諗下都係唔好喇，

呢度當係我哋三個人之間嘅一個小秘密，

有好多嘢真係唔知點直接同佢兩個講，

既然係咁就不如唔好畀佢哋知啦，





尤其是係嵐嵐啦，

老實講，

係佢男朋友信得過佢同我，

我先會同佢keep contact，

如果唔係都驚佢男朋友誤會，

破壞到人就唔好啦，

好彩今時今日嘅我，

已經冇呢個能力去破壞，

我係講真㗎唔係悔氣說話，

不過出嚟食飯見面嘅話就真係唔算多，

始終大家都難夾時間，

不過最近中秋我都有送月餅畀嵐嵐，

佢條友鍾意食奶黃月餅，

我就買咗盒望月同埋Valerie畀佢，

都係聽丁仔介紹咋，

始終我唔算好迷奶黃月餅呢樣嘢，

我估佢收到都開心啩，

送完畀佢冇幾耐佢就喺signal同我講話好好食，

叫我下年再買喎，

佢個反應同讀書嗰陣我請佢食蛋糕一模一樣，

過咗十年都係冇變，

其實咁都好心滿意足，

至於愷晴我唔係唔肯送，

而係佢自己都唔鍾意食，

佢叫我唔好買添，

最後去到呢度，

大家唔好嫌我煩，

因為我真係想再次多謝你哋，

用你哋寶貴時間去睇呢個冇乜驚喜嘅故仔，

不論你哋係狂屌巫澤軒好,

抑或係支持鍾曉嵐都好，

都好感激你哋，

其實我同丁仔原本係想用「鍾巫艷」做故事名，

不過我同佢都覺得，

咁樣嘅話即係同大家講咗個結局冇分別，

仲邊有癮呢，

於是先唔用呢個名，

至於鍾曉嵐同巫澤軒嘅故事就去到呢度喇，

希望大家唔好好似我咁戇居，

一直忽視左身邊對你好嘅人，

我就係遲咗太多次，

成個人版畀你睇，

唔好怪我叔叔語重心長講咁多廢話，

好啦真係完結啦，

再見喇咁多位.