[校園][純愛]《身旁的那一個》: 第一百零二章

落咗車

我就行過去愷晴屋企

跟住就買咗支嘢飲同埋薄荷糖

係呀，

薄荷糖依家已經變咗我嘅習慣





口氣清新啲梗係好事

特別依家戴口罩咁撚焗

以前唔使戴口罩嗰陣，

都唔想同人講嘢臭到人

特別有時食完嘢嗰陣





由讀書食到出嚟做嘢

買完之後就佗佗佻佻去愷晴屋企樓下

佢條友都冇咁快㗎喇

咪慢慢行舒舒服服，

去到嗰陣仲未見到佢





我就不嬲都唔會chur人嘅

未到咪等下先囉，

唔同佢唔返屋企咩

等多陣到㗎啦

果然不出我所料

等咗一兩個字佢就出現，

咦，

唔止佢喎





隔離仲多咗個人

我一睇已經知邊個，

眼大大瓜子面啡頭髮，

咁奇怪佢都喺度

佢依家住呢邊嘅咩

唔好意思我而家真係唔係好清楚佢嘅嘢

所以就有呢個疑問





當然，

佢兩個行到嚟我面前嗰陣，

就釋除咗我呢一刻嘅疑惑

愷晴:「東仔你企喺度

我依家上去拎嘢畀嵐嵐先

順便拎埋畀你

檸檬茶啱唔啱」

我:「你叫我過嚟就係畀檸檬茶我」





愷晴:「係呀」

我:「屎啦

我返屋企都有得飲啦」

愷晴:「唔好咁多廢話喇

我上去先」

跟住佢就一支箭衝上屋企，

於是就得返我同鍾小姐兩個獨處





真係好耐冇試過喇，

一個之後我同佢嘅空間

相隔咁多年，

再次有呢個機會

原來嗰刻你係咩反應都冇

任你平時再多口，

喺嗰刻都會鴉雀無聲

最後，

都係佢首先開口

嵐嵐:「好耐冇見喇」

我:「係呀好耐喇真係

差唔多十年喇，

鍾小姐」

嵐嵐:「乜我唔係嵐狗嵐畜咩

巫澤軒」

我:「係喇

嵐嵐」

可能睇緊嘅你哋唔明，

其實我好驚喺我面前嘅呢個女仔

早已經唔係我認識嗰個

畢竟過咗咁多年，

有時唔好話其他人

連我自己都可能同讀緊書嗰陣有好大分別

咁其他人變咗，

又有咩出奇呢

但係單憑我而家面對面望住佢講咗幾句，

我直覺呢個人

仍然係我認識嘅鍾曉嵐

嵐嵐:「自從畀你講完之後

我就再冇著高踭鞋」

跟住我望一望

係喎，

真係平底鞋嚟

我:「估唔到你咁記得」

嵐嵐:「你講嘅嘢我一直都好記得

其實我返咗嚟好耐㗎喇」

我:「我知呀，

我有聽愷晴講」

嵐嵐:「本來諗住返嚟即刻搵你嘅

點知嗰陣你有女朋友

本來有女朋友見面都冇問題丫

但係我知道嗰陣嘅自己，

仲未放低你，

所以就冇搵你囉」

我:「我知呀

所以我都唔敢煩你，

我覺得你唔搵我

一定有你嘅理由」

嵐嵐:「其實愷晴問過我好多次

點解返到嚟唔見你

佢仲話大家單身嗰陣，

不如隔咗咁多年試下」

我:「咁呢啲佢又冇同我講喎」

嵐嵐:「我同佢講，

我話你呢個人根本就唔鍾意拍拖

你記唔記得你以前同愷晴一齊嗰陣，

成日搵我訴苦呀」

我:「又唔係訴苦

講下啫」

嵐嵐:「我覺得，

如果同你一齊嘅話

我就會成為你同其他人訴苦嘅對象

可能連你自己都唔覺，

其實你係唔鍾意拍拖」

我:「我知道呀

你講中咗，

我真係呢啲人」

嵐嵐:「所以唔好啦

就算我好掛住你，

好想見到你，

同你講下我嘅近況咁多年嘅生活

我都寧願忍住唔見你住

喺我仲未放低嘅時候，

你當我好煩啦，

唔想喺你心目中破壞咗我僅餘嘅形象」

我:「你放心

我以前講笑啫，

你形象不知幾好」

嵐嵐:「係咁呀

多謝晒呀」

跟住愷晴無啦啦出咗嚟

愷晴:「畀你嘅嵐嵐

呢個就你嘅東仔」

我&嵐嵐:「唔該」

跟住相視而笑，

愷晴:「好啦我沖涼先喇

拜拜喇兩個」

我&嵐嵐:「拜拜」

愷晴入返去之後，

我:「送你返屋企」

嵐嵐:「好呀

我搭巴士」於是我就送佢去巴士站，

今晚做咗好多好耐冇做過嘅嘢

依家唔同以前啦，

唔好再有咁多機會

仲有得做嘅話，

就要好好珍惜

嵐嵐:「睇唔啱女仔咩」

我:「你知我有幾多嘢做㗎喇

冇乜時間呀，

返工就做公司嘢

收工返屋企就做另一行嘅嘢」

嵐嵐:「雞仔狗仔馬仔企鵝仔依家點呀

係咪仲喺度」

我:「係呀，

我保管佢哋好好

得閒就會捉佢哋沖涼」

嵐嵐:「我都好耐冇見過佢哋啦

有機會嘅影張相畀我睇」

我:「好呀

得你知佢哋存在咋」

嵐嵐:「估你唔到喎」

我:「唔知呀對住其他人好難講出口，

嗰陣對住你乜都講得

好舒服」

嵐嵐:「其實我都feel到嘅

我以前有意無意都會諗起，

可能我呢個人，

喺你心入面都有一個好特別嘅位置

就算只係一刻嘅時間

不過呢啲好難為情呀唔敢講」

我:「唔難為情

事實嚟㗎呢個」

嵐嵐:「過咗咁多年

依家講已經冇嘢喇」

我:「你都知我好八卦

依家個男朋友點識」

嵐嵐:「其實佢係喺英國讀書嗰陣識嘅

當時我嗰班好少香港人，

佢係其中一個

大家同聲同氣咁就熟咗

識就識咗好耐，

不過一齊就係幾個月前嘅事」

我:「估唔到喎

我以為啱啱識嘅添.」

嵐嵐:「咪就係因為你囉死人頭

喺我同佢讀緊書嗰陣，

佢已經話鍾意我

係我嗰陣係咁拒絕

我同佢講，

我話我依家接受你，

只係對你唔公平，

佢知道我有個鍾意嘅人

但係佢冇逼我

一路用好朋友呢個身份陪住我，

我都唔想拖累佢

所以我話如果你覺得依家咁樣陪我好辛苦嘅，

咁就唔好再勉強自己啦

點知佢真係唔介意，

係直至到早幾個月

我覺得我已經放低咗你

我喺度諗，

我唔可以再忽略一個對我好嘅人

同時間，

嗰排我對佢個feel開始越嚟越強

就係咁我就鍾意同佢一齊」

我:「恭喜你呀

有個咁好嘅男仔陪你

識咗咁耐真係戥你開心」

嵐嵐:「讀緊書嗰陣好多人追我

我個個都拒絕咗，

明知繼續喺你隔離都唔會做到你女朋友

不過諗返起真係好青春

雖然嗰陣真係好傻

之但係我到今時今日，

都冇後悔過以前所做嘅一切

天馬行空講一句丫，

如果我依家可以重新返去中一經歷多次

我諗我都會咁做，

不求回報默默耕耘

為嘅只係一個我好鍾意嘅人

就係咁啦冇其他」

我:「唔好意思呀我真係好遲鈍

有樣嘢我今日想同你講

去到大個先知，

原來我以前都鍾意過你

係真㗎，

係我以前太蠢啫

連我自己諗乜都唔知

去到你走咗我又再成熟咗，

我先知呢個事實

遲咗講畀你知添」

嵐嵐:「多謝你同我講

如果我以前聽到，

我諗我會即刻鬧你有冇搞錯呀

不過依家反而係釋懷咗

你畀個機會我知道，

我以前冇鍾意錯人

咁就已經得啦」

我:「你冇錯呀

我好多謝你添」

嵐嵐:「我以前會諗

我好想用情侶嘅身份，

光明正大咁樣渡過中學生涯

哪怕只係簡簡單單，

僕喺你膊頭

咁已經好開心

但係依家我又會諗，

如果以前同你一齊做，

咁仲會唔會好似今日咁

兩個都釋懷晒

有咩就講咩，

可以慢慢行慢慢傾呢」

我:「係囉

同埋我想同你講，

唔知你信唔信啦

你上機嗰日其實我喺機場

本來諗住畀驚喜你嘅

所以咪靜靜雞過咗嚟囉

點知搵到你個幾鐘都搵你唔到」

嵐嵐:「我信呀，

唔緊要啦其實我都冇預你會嚟

見唔見到都好啦，

我諗個結果都唔會變

不過多謝你咁有心囉」

我:「呢啲嘢想同你講好耐

終於講咗，

食唔食呀」

跟住我就拎咗盒薄荷糖出嚟

嵐嵐:「仲係佢呀

好呀多謝你」

我哋去巴士站嗰條路唔算長，

就算我哋行得再慢

條路有幾曲折都好，

始終都會去到目的地

我:「個app話差唔多有巴士，

要走啦」

嵐嵐:「好

搵日出嚟食飯」

我:「好呀邊日」

嵐嵐:「你話事囉.」

我:「下個禮拜六o唔ok」

嵐嵐:「好

食咩signal再講」

我:「好呀」

嵐嵐:「你走啦應該差唔多到㗎喇

拜拜喇巫澤軒」

我:「拜拜喇鍾曉嵐」