[校園][純愛]《身旁的那一個》: 第一百零一章

行緊去嗰陣真係百感交集

第一，

係因為真係好耐冇見過呢班人

有啲熟啲嘅，

可能一年有一兩次嘅





愷晴呢啲就唔止嘅

撞啱時間嘅話，

可能幾個月會食一次飯咁囉

但係miss嘅話，

就真係好耐好耐冇見





事實上我畢業之後從來冇返過中學

我唔係好似拍戲嗰啲男主角咁樣

因為缺少咗邊個邊個就唔返

而係事實上得自己一個嘅話，

真係冇乜意義





喺呢間中學大部分嘅時間，

身邊都總係有個人喺度

由中一開始已經係，

得返自己一個嘅話，

都唔知返去做乜

所以就一路冇返去探過miss

今日再見返佢其實真係有啲感觸

眨下眼就過咗咁多年，





佢面容的而且確比起以前

畫上咗歲月痕跡

其實唔止佢，

我哋咁多位學生都係

係無可奈何但係又不能避免

終於行到埋去，

遲咗少少循例都要講下唔好意思





我:「唔好意思呀咁多位唔好意思呀」

Miss Cheung:「東仔依家你威水啦

個個等緊你喇」

主席:「係囉呀東哥你就巴閉」

我:「巴閉就唔使ot啦

似你做老闆咁準時咩」

Davis:「我叫咗嘢食東仔你ok丫嘛

menu喺度呀你想食咩隨便落order」





我:「多謝新郎新娘

ok呀食乜都得」

跟住坐喺遠處嘅愷晴又出聲

愷晴:「係咪真係咁呀食乜都得

你喎呀東爺，

陣間餵你唔飽唔知你會唔會亂講嘢呀」

我:「我呢啲賤骨頭平時都係食餿水





唔係餿水就屎水

似你咁高要求咩Hazel姐」

跟住我聽到愷晴隔離嗰個人「嘰」一聲咁笑，

差唔多十年

終於再面對面見到佢

同睇相冇分別，

都仲係眼大大瓜子面啡頭髮

不過我個位同佢個位太遠喇

咁就冇特登行過去同佢打招呼

大佬嗰度差唔多廿個人，

我逐個逐個行埋去講咩

順便講下座位先，

我哋嗰陣一字排開佔咗五枱

每枱最多四個人，

最遠嗰枱咁啱就係鍾小姐愷晴Teresa同埋Betty

隔離嗰枱就係新娘新郎仲有兩個未開名嘅人

賓仔同埋miss佢哋就第三枱

第四枱又係冇開名嗰啲人，

不過以前都熟嘅

我嗰枱就有主席，

Miss Cheung:「東仔咁耐冇見

一嚟就講埋啲核突嘢」

我:「唔好意思唔好意思」

嗰陣心諗，

我同佢張枱隔咁遠

咁就費事過去啦，

睇下一陣有冇機會面對面傾下計啦.


始終今次呢個聚會，

我都只係一個配角

成個飯局圍繞住嘅，

就係兩位新人

一班舊同學重新聚埋一齊嘅時候，

話題當然離不開以前讀書嘅回憶啦

我不嬲都唔係啲好hyper嘅人

但係聽返呢啲往事嗰陣

全班都不其然嘻嘻哈哈

老實講我都好慶幸我哋呢班同學keep到咁耐

讀U嗰陣都識到啲朋友

聽佢哋講返先知，

原來唔係所有人都好似我哋呢班咁

畢業之後間唔中會搞下聚會等大家見下玩下

真係好彩咁多位都咁有心

如果唔係今日應該唔會有呢個飯局

我就更加冇機會見到啲好想見嘅人，

講起上嚟，

我冇刻意去遠處嗰度

唔知你哋明唔明啦，

話明偷望梗係唔想畀人知啦係咪先

之但係我又驚畀人見到喎

好奇怪㗎嘛無啦啦望到咁遠

所以我都係專注返同枱嗰啲人，

當然啦因為太遠嘅關係，

我都feel唔到有咩目光望住我

唔好意思呀我FF咗添

冇人識你呀毒撚

食到咁上下大家都停晒手

全部人都掛住傾計，

冇人再食嘢，

跟住見到miss周圍走

行埋去每個舊生身邊傾下計，

去到我嗰度

佢就問我同主席呢排點呀

我:「ok啦miss都係咁囉

冇乜特別呀返緊寫字樓

hea下hea下又一日」

miss:「點呀有冇拍拖仔」

我:「冇呀我呢啲毒男

啲女仔見到我都掉頭走

『收皮啦毒撚冇人想識你呀』，

咁樣呀miss你話慘唔慘丫

不過冇計啦自己知自己事

我都明嘅」

miss:「你真係咁多年都係咁

問你一句就講十句

同以前冇變過」

我當然冇同佢講

我返工嗰陣梗係唔係咁啦，

係今日見到一班舊同學

而我以前喺佢哋面前嘅形象亦都係咁

咁咪會講多啲嘢囉

我:「冇辦法啦見到miss你太有親切感

搞到我好興奮呀成日亂講嘢」

主席:「我以為你話好興奮做咩添」

miss:「唔識返個女仔

我就唔信你頭先講嗰啲嘢呀」

我:「咁就等miss你介紹呀

我呢啲好被動嘅」

miss:「你被動呀真係講笑咩

以前教你哋嗰陣呀，

成日都以為你同嵐嵐拍緊拖

就算未開始都只係時間嘅問題

估唔到又唔係喎聽返佢哋講」

我:「大家friend啫

啱傾咪講多幾句」

miss:「你哋兩個啲默契咁好

真係以為你哋拍拖㗎」

我:「你以為丫miss

佢眼角好高㗎，

我呢啲毒撚佢睇我唔起㗎

唔係唔係唔係，

毒男先啱」

跟住無啦啦後面有條友行過

原來係Teresa啱啱去完廁所返嚟

Teresa:「你死啦東仔又講人壞話」

我:「你唔係坐喺嗰邊嘅咩」

Teresa:「我去廁所返嚟咪經過呢度囉

跟住見到miss傾計我咪偷聽

點知你又喺度作嘢」

miss:「死仔成日都吹水」

Teresa:「係囉真係唔要得

我返去嗰邊先喇」

跟住見到Teresa返去嗰邊嘅時候，

一路講嘢一路望過嚟

我估都係話我鳩噏吹水喇，

我認識嘅鍾小姐就好大方嘅

照計就唔會嬲埋啲咁嘅嘢，

如果，

佢仲係我認識嗰個鍾小姐嘅話，

傾下傾下就差唔多

最後兩個新人講咗句下個月早啲到，

成班就散水喇

臨散之前我哋決定call Uber

邊幾個住得近嗰啲就同一架車

成班舉腳贊成啦梗係

快啲又舒服啲

最後我同埋主席，

仲有另一個同學三個夾埋就同一架車

一路搭車就一路傾計啦

不過費事咁大聲嘈到司機，

傾下無啦啦收到個message

見到愷晴搵我，

愷晴:「頭先見你哋唔到嘅

咁快上咗車」

我:「你哋搭下一班𨋢吖嘛

我落到去就秒上車嚕」

愷晴:「唔好咁快返屋企住

陣間有啲嘢要畀你」

我:「下

畀乜撚」

愷晴:「到時你咪知囉」

我:「咁邊度等呀」

愷晴:「我屋企樓下啦」

我:「好彩啫

咁我落到車都應該唔使行好耐

一兩個字就到你嗰邊」

愷晴:「一於咁話啦」

跟住我就諗，

冇理由丫

我記得我應該冇嘢擺咗喺佢嗰度

畀啲咩我呢

又唔一早講，

算啦陣間咪知囉.