[校園][純愛]《身旁的那一個》: 第九十八章
老實講丫，
中六中七嘅生涯，
喺我腦海嘅印象真係唔算好深
冇乜時間參與活動啦
淨係溫書操卷
跟住做下自己嘢
其實就係咁過，
至於我同嵐嵐
冇呀已經冇聯絡
正如佢所講，
佢應該轉咗電話，
而我就真係冇佢電話number
我哋嗰陣仲興用facebook，
好耐以前已經add咗佢做friend
咁佢冇block咗我
我仲可以見到佢online，
不過可能真係時差問題
我用緊嗰陣好少見到佢online
其實我唔係特登睇㗎，
只係喺我右手邊friend list嗰度
有show到佢個名出嚟咁就見到
呢兩年我學得最多嘅嘢，
唔係a level嗰啲考試技巧，
而係明白到一個事實，
就係唔會有一個人一直喺你身邊陪住你
我同佢就算以前再熟都好啦，
原來只要大家唔搵大家
咁已經令到我同佢疏遠咗㗎喇
大個咗體會得更加深就明白呢樣嘢，
點樣friend嘅朋友，
往日再累積更加多嘅感情
只要有一刻冇聯絡大家，
久而久之個關係就會凍結咗
咁佢都算好㗎啦
起碼喺Qooza講明先
我亦都唔敢打擾佢呀
所以一路都冇問愷晴同埋Teresa，
究竟佢依家點
當然我成日覺得，
人係會慢慢習慣
今日未慣聽日未慣都好，
總有一日會適應現狀
我到依家都係咁認為，
佢係我人生入面其中一位好重要嘅人
你哋話我垃圾廢柴都好啦，
我都唔敢講我有冇鍾意過佢
我真係唔知道，
但我好肯定佢對我嚟講，
一定係一位好重要嘅人
唔單止係中學生涯，
遺憾嘅係，
唔可以再同佢嘅故事一路延續落去
再責怪自己遲鈍都於事無補，
倒不如向前看啦.
轉眼間已經過咗好多個春與秋，
我亦都由當初著住校服嘅中學生
搖身一變成為今日冇既定裝束嘅上班族
過咗咁多年，
轉變真係一件好平常嘅事
我唔好講我啦
淨係講依家呢個環境，
兩三年前有邊個人會估到，
戴口罩出街係一個常態
已經唔講今時今日去旅行同以往真係天淵之別
短短幾年間已經顛覆晒所有嘢，
何況係差唔多十年呢
我知道，
睇緊嘅你哋可能對我呢個人冇乜興趣
不過循例上都講下啦
最後我條友負碌入咗u
唔係三大嚟嘅
應該會比連登仔屌我垃圾
至於係邊間?
咪就係隔離有條隧道嗰間囉
嗰條隧道去港島嘅
明就明唔明就算喇
我呢啲廢柴目標梗係唔係first hon
合格畢到業就算
係呀要求好低㗎咋
至於海狗佢就入咗city，
我同佢自從中學畢業之後都好少見
不過慶幸嘅係，
我同佢每次見面，
都唔會有所謂成長嘅隔膜
每次個氣氛都係好樂也融融
大家談下往事又傾下現況再講下將來咁樣，
我同佢都明白到
當環境唔再一致嘅時候，
的而且確唔容易再好似以往咁經常見面
大家都有各自嘅生活
不論讀u定係出嚟做嘢都好，
所以我成日都同佢講，
去到今時今日仲維繫到真係好難得
雖然少見但感情冇變
而愷晴嗰方面，
講你都唔信，
我哋咁啱係同一間u
都係o camp嗰陣先知
梗係啦，
因為中六中七我都已經好少同佢傾計
雙方冇乜交流，
既然分咗手身份咁尷尬
我又唔知關唔關心佢好
索性唔問佢a level考成點喇，
誰不知o camp嗰日見到佢當堂嚇一跳
佢都好驚訝，
可能大家啱啱入去嗰陣都冇乜朋友啦
我已經係佢最熟嗰個，
因緣際會下，
我同佢再一次拉近距離
今次就真係唔係男女朋友啦
或者經過年月嘅洗禮，
地方環境又轉變咗
昔日嘅隔膜喺呢刻已經不復見
原來分咗手之後真係可以做返朋友
去到今時今日都仲有同佢keep contact
甚至乎佢對上一個男朋友都係問我點樣溝佢
因為個男仔知道我同佢熟，
所以就問我應該點樣入手
去到最後就成功咗
當然佢兩個仲拍緊拖嗰陣我就識做嘅
盡量都唔會做電燈膽，
你話好似最近佢單身咁
咁梗係唔怕見面啦
過咗咁多年，
大家都清楚依家個關係去到邊個位
真係變咗一對好friend嘅朋友
唔會有非分之想
我同佢都係咁諗，
佢就勁啦變咗Hazel姐
因為佢入到u諗住改返個英文名喎
一路用到依家出嚟做嘢，
佢同以前唔同晒喇
外向咗好多，
又眼尖嘴利喎
有時連我都要忌佢三分叫佢做Hazel姐
佢條友就話唔好咁講啦
傲嬌
擺明就鍾意聽啦
至於你哋最冇興趣嘅我
讀u嗰陣都識咗個女仔拍過一兩年拖，
都算係和平分手嘅，
點解分手
都係大家生活步伐唔一致囉
佢覺得我掛住做嘢，
而我亦都問心，
已經盡量抽時間陪佢
呢個問題都講過幾次
大家達成唔到共識就分手
呢次之後我都冇拍拖喇，
因為兩次拍拖我都發現
我最享受嘅時間，
就係一個人寧靜嗰陣
當女朋友去咗食飯/煲劇/沖涼/瞓覺嗰一刻
我可以唞下就覺得好舒服
兩次拍拖都係咁，
我呢啲人都係鍾意自己多啲
咁就費事害人啦
好喇講完咁多個，
講到最後，
點都要講下鍾小姐
自從佢離開咗香港之後
我同佢真係冇再見過，
可能你哋會問，
你哋中學嗰班，
唔係會間唔中出嚟食飯聚會嘅咩
我想講係有嘅
啱啱畢業嗰排我哋呢班同學見得比較密，
咁啱嗰排鍾小姐仲喺外國
自然返唔到嚟見啦
去到後期佢可能已經返咗香港嘅時候
大家出嚟做嘢，
基本上可能真係一年先見得一次
唔係咁易夾到時間，
咁就冇辦法啦喇.