[校園][純愛]《身旁的那一個》: 第九十七章

睇完之後其實我個腦一片空白，

我冇諗過佢係咁鍾意我

亦都冇諗過，

我同愷晴之所以可以拍拖，

某程度都係多得佢推波助瀾





我以為佢淨係幫我

原來喺我唔知嘅時候

佢做咗好多嘢

我永遠都記得我睇完佢個Qooza之後係咩反應，

係咪好傷心





唔係喎，

因為我知佢一步一步邁向其中一個夢想

就係出國讀書探索下呢個世界

可能係有啲可惜嘅

就係我從來冇珍惜過我身邊對我好嘅





其實我都有啲嬲自己

點解咁都留意唔到，

明明喺學校根本就離不開佢

就算我拍緊拖嗰陣，

我同佢聯繫一路都維持緊

偏偏我就發現唔到我身邊嘅佢

真係好失敗，

仲要大把人同我講過，





我都視若無睹

根本就係自己問題

我到呢刻我都唔知我係咪鍾意佢，

我淨係知冇咗佢嘅話，

我諗我會好唔慣

平時有咩事我淨係識鍾曉嵐，

依家





佢喺英國喇

我冇諗過我係佢嘅陰影

一直以嚟我真係太蠢呀

好耐好耐之後有兩個人同我講返，

佢話我一係食懵咗

一係就打丁打到癡呆

如果唔係，

根本就唔會留意唔到身邊最緊密嗰個嵐嵐





海狗，愷晴，

你兩個叻喇

之後我同老母講，

我話嵐嵐已經走咗

去咗英國讀書，

佢第一句就鬧我

點解咁遲先同佢講





係囉，

我都唔知點解成日都咁遲

做咩都係慢人半拍，

不過遲早都要適應㗎喇

因為連我都唔知幾時先可以再見返佢

佢咁有決心，

我嗰陣淨係希望佢一路順風平平安安就得

同佢一樣，

我都好期待下次再見嘅一刻

學佢話齋，

即使係簡簡單單寒喧幾句

我都心滿意足.


冇咗嵐嵐，

我諗大家應該對我嘅生活冇乜興趣㗎啦

不過都要簡單講幾句嘅

希望你哋唔好介意啦

話說我哋去到中六，

又點止嵐嵐一個離開咗呢間學校丫

仲有幾個熟悉嘅面孔都唔喺度

其中一個就係我之前講過嘅Betty

佢唔夠分原校升讀，

仲有幾個人嘅，

不過之前冇喺呢個故事出現過，

咁就唔講喇

我同愷晴嘅關係點

冇呀大家變返未識嗰陣咁囉

平時小息佢好少會過嚟我呢邊

我都明嘅，

又未至於完全冇傾過計嘅

不過唔會有太多嘅交集囉，

我估佢啲朋友例如係Teresa，

應該知道我同佢分咗手

只係冇講出口啫

我同海狗講咗呀，

出奇地佢覺得好正常

海狗:「我不嬲都話你兩個唔長㗎啦

我唔係咒你哋」

我:「威喇威喇」

海狗:「應該一齊嗰個你又唔一齊

全世界都睇到係得你睇唔到

依家冇喇唔喺度喇」

我:「唔使你講我都知」

海狗:「咁你有冇搵愷晴問下人哋喺英國嘅近況呀」

話說我冇同海狗講我之前睇嵐嵐Qooza嗰件事

所以佢唔知嵐嵐暫時同我斷咗聯絡

我:「冇呀等佢settle好先啦」

老實講其實我都想問愷晴嘅，

我真係唔係驚尷尬，

而係我覺得愷晴唔會講

因為佢都係聽嵐嵐主意

當然啦除非係一啲好大鑊嘅嘢，

既然佢好朋友咁有決心，

以我識嘅愷晴，

同埋佢兩個嘅關係嚟講

佢應該會尊重嵐嵐嘅意思

所以我應該問唔到咩㗎喇

同埋講真，

叫我問我又唔知想問啲咩，

我唔係老套呀我講真㗎

平平安安係最緊要，

依家咁睇，

可能冇消息就係最好嘅消息.