[校園][純愛]《身旁的那一個》: 第九十九章
我同鍾小姐依家唯一有聯繫嘅平台
淨係得返Instagram啫
我同佢以前用得最多嘅msn，
幾年前已經收咗皮，
至於Qooza同埋Facebook
我都唔知而家仲有冇人用
Facebook都話仲有老一輩嘅人會玩，
Qooza你依家出去同後生仔講，
佢哋都唔知咩嚟
咁點解我會有佢Instagram呢
其實真係多得愷晴，
話說早兩三年，
有一次我見到佢upload咗張相
嗰張相係佢同埋鍾小姐selfie，
caption都係話好耐冇見終於返嚟之類啦
之後就tag埋鍾小姐，
就係咁我就有佢ig
跟住諗咗好耐，
究竟撳follow掣去睇下佢近況好唔好
大個咗，
就會諗多咗好多無謂嘅嘢
冇咗細路仔嗰種想做就做嘅衝動同埋決心，
最後算啦大方啲咪試下撳，
佢應該仲記得我個名掛，
撳完之後就去沖涼，
沖完涼出嚟就見到佢accept咗，
同埋見到佢follow返我
放心，
我雖然毒撚不過都唔會ff
呢啲都係基本禮貌啫
我同佢本身就識嘅，
咁依家我follow咗佢，
佢咪禮尚往來follow返我
好平常嘅啫我又唔會諗多咗
跟住就撳入去，
睇下一個曾經熟悉嘅陌生人，
咁多年嘅生活係點
Instagram就係有呢度好
好多開唔到口但係又想知嘅嘢，
總有啲情況佢會幫到你
首先，
佢個樣基本上冇乜點變
仲係瓜子面眼大大，
唔笑個樣依然係咁西
同以前一樣，
我都係覺得佢呢個樣最靚
頭髮微曲，
染咗少少啡色，
見過好多舊同學畢咗業之後都走晒樣
佢就真係仲keep到
見到佢咁多張相，
冇乜邊張出現過男仔
有嘅話都係一班人合照，
第二就係，
佢都仲咁鍾意關心妍同埋陳柏宇
因為見到佢有睇佢兩個嘅演唱會，
關心妍嗰次仲係特登去澳門睇
睇睇下就發現，
愷晴真係冇鳩吹
原來佢再早幾年已經返咗嚟香港，
睇到呢度我就諗，
照計佢要搵我應該一早搵咗
出到嚟聚下舊都得啫
但佢冇咁做
應該有佢自己原因啦
可能你哋會問，
既然呀你有佢ig
你哋dm咪得囉
再唔係你哋用WhatsApp咪得
我唔知大家明唔明啦
一個好耐冇見嘅朋友，
無啦啦打開話框
對我嚟講係真係一個好難嘅事
何況對方仲係佢，
我真係唔知點講出口
唯有一路拖囉，
我都唔識做其他㗎啦
講得好聽啲就隨緣，
講得難聽啲其實即係等運到
有一點必須要承認，
我就係同鍾小姐依家嘅關係
只係網絡上嘅朋友.
唔好意思講得長氣咗，
終於都返嚟開頭講嘅事
為免大家搵
我而家喺度講多次啦
就係我有兩位舊同學，
Davis同Manus今年會拉埋天窗
請晒一班舊同學飲
原本諗住上年嘅，
可惜撞正疫情高峰
就延遲到今年先擺酒
之後Davis就叫主席幫手
約晒一班舊同學出嚟，
到時就派帖再順便聚舊食飯
最後佢哋揀咗禮拜五
所以故事入面嘅序章，
主席就打咗畀我講呢件事喇
最後我覆咗佢冇問題
禮拜五應該出到嚟，
同佢講埋我唔使ot架喇
會準時到，
但係好老實講，
我都唔知到時有邊個出嚟
主席條撚樣淨係話一大班人，
我又費事問得咁詳細啦
好似查家宅咁又唔係咁好
跟住唔知有心定係冇意，
主席喺group嗰度就叫我哋報數
睇下有幾多人，
方便book枱，
順帶一提嗰間嘢喺旺角
黃店嚟嘅幾好食
喺呢度就唔開名費事畀人話打手，
睇緊嘅你哋有興趣我先加密講
唔係講呢啲嘢講返重點先
主席講完之後，
其實我喺lock screen已經睇咗
之但係我覺得第一個覆好柒
同時間最遲覆我又覺得好柒
所以我等啲人講咗先
之後我先再講，
跟住我覺得差唔多時機我就覆
覆完之後就去咗食生果
食完返嚟就見到個group多咗好多個message，
咁多個message之中我淨係留意到一個，
仲有邊個
咪又係鍾小姐
佢覆嘅嘢好簡單
淨係話佢會嚟，
就係咁喇冇其他
對我嚟講，
人大咗，
唔會再有咁多胡思亂想嘅機會
因為冇乜嘢會令自己在意，
當自己都冇興趣嗰陣又點會嘥時間精神去諗呢
但係今晚，
我終於再獲得呢個機會
好難用一兩個詞語去形容我嘅心情，
夾硬講嘅話就係好複雜
因為連我自己都唔知係咩心情
每個人都會有自己嘅困惑，
未必會拎出嚟同身邊嘅人分享
但係夜闌人靜一個人嘅時候，
就一定會問自己
好老實講，
我從來都冇諗過，
我會因為就快見到佢而感到期待
咁多年我都唔明點解我同佢會搞到咁，
經過咁多年，
唔知佢變成點呢
我自己知道自己期待啲乜，
純粹係見返一個好耐冇見嘅朋友
就係咁多冇其他
聽愷晴之前去買router嗰陣講，
佢依家有男朋友
去到今時今日，
好多嘢都已經塵埃落定
要強求都唔係呢一刻強求，
我由始至終最希望嘅都係得一樣
就係大家好似可以以往咁樣，
坐喺度傾下計，
哪怕只係一句好客套嘅問好
都已經心滿意足.