[校園][純愛]《身旁的那一個》: 第九十六章
到依家隔咗咁多年，
我都仲好記得嗰日搭巴士返屋企嘅心情
就係好心急想睇佢嘅Qooza究竟講咩，
快啲消除呢一刻嘅疑問，
第一次切切實實了解咩叫做心急如焚
返到屋企即刻換衫洗面，
之後開電腦去返佢個Qooza
一打開，
又係我之前click入去嘅畫面
都係叫我輸入密碼，
唔同嘅係，
今次我唔係撳右上角嘅交叉
而係喺密碼嗰度輸入mch0425呢七個字
load緊嗰陣係最緊張
因為唔知係咪真係見到一啲我想見嘅嘢，
同時又會好期待究竟係咩呢
咁當然，
loading呢啲嘢好快嘅啫
好快就入咗去佢個blog
嘩原來好多篇
各位唔好意思啦，
我真係打唔晒咁多篇，
盡量講返一啲故事有關嘅嘢就算喇
原來我都好耐冇click入去佢個Qooza睇，
佢個icon都係上次我見到嘅嗰張相，
即係我喺海洋公園幫佢影嘅個人照
跟住我未睇佢嘅內容，
就去咗相簿嗰度睇
相就唔多，
都係得五張，
不過全部都有我份
第一張係我同佢喺跳樓機前面影嘅，
第二張就係我同佢喺學校禮堂影
第三張同埋第四張個背景都係喺學校
一張就係我哋喺當年中一嘅班房門口影，
另一張就係喺中五嘅班房門口影
兩張都係last day影
而最後一張，
就係我farewell佢，
請佢食飯嗰日影嘅
都係佢揸機我同佢selfie
嗰陣我都有啲奇怪點解淨係我
就算我再蠢呀，
喺嗰一刻我都知咩事
咁多年會唔會啲人都冇講錯，
其實佢真係鍾意我
當然，
跟住我去blog嗰度，
成件事就一目了然
唔止咁樣，
原來我仲知道好多事情嘅真相，
係我諗都冇諗過嘅
「去到中三要揀科喇，
嗰日miss都有搵過我，
佢同我講話我兩科都幾好，
當然今次呢個試文科嗰邊會高分少少，
不過都只係一兩分嘅分別，
佢問我有冇諗住邊科，
嗰刻我都答唔到佢，
返到屋企都有問過家姐應該點揀，
佢話如果你兩科都咁叻，
咪睇自己興趣囉，
跟住嗰晚我就諗，
其實兩科我都唔係好有興趣，
我反而諗到一個人，
我知道佢揀理科，
佢話佢文科完全讀唔掂，
咁呢層我都知嘅，
事關佢文科啲功課都係抄我嘅，
諗諗下咁不如我都揀理科啦，
我唔敢將呢個決定同其他人講，
因為選擇嘅原因連我自己都覺得好魯莽，
希望係啱嘅決定啦.」
「出咗結果，
連續第四年同佢同班，
分班前其實我都有啲緊張，
因為揀咗同一科，
其實唔一定會同一班，
我哋學校中四中五文科商科理科各自兩班，
好好彩今次我同佢繼續係同一班，
其實都唔止佢，
仲有一班friend啦，
其中有個就係佢讚過好靚嘅，
唔知我哋呢兩年會點呢，
要好好把握最後兩年嘅時間，
讀埋呢兩年我就會去英國嗰邊，
我同佢講過㗎，
不過唔知佢記唔記得呢，
點都好啦仲有兩年時間，
要享受埋呢段日子.」
「我同佢入咗班會，
我諗返都有啲衰，
係我特登叫miss叫佢入嚟，
唔知佢呀好似有啲嬲咁樣，
所以最後都帶咗上次提到佢讚過好靚嘅女仔，
亦即係愷晴，
去睇下佢罰抄成點，
再送包檸檬茶畀佢，
其實佢從來冇同我當面講過話鍾意愷晴，
但係我有意無意講起愷晴嗰陣，
佢畀我嘅感覺就係佢對愷晴有好感，
只係唔知點樣引入，
所以最後好傻，
就叫咗佢兩個連埋我三個，
一齊食lunch，
特登等佢兩個坐對面，
呢啲嘢佢傻下傻呀，
可能好緊張，
應該唔知㗎喇，
咁我同佢係朋友應該要幫丫嘛，
最後仲特登提早走等佢兩個獨處，
走嗰陣一個人喺附近行，
我都唔知自己點解要咁做，
真係好傻，
但係我知道我同佢嘅關係，
由始至終都只係好朋友，
佢都親口有講過，
畀多幾耐時間個上限都唔會變，
倒不如順水推舟啦，
咁愚蠢嘅嘢可能係呢個階段先做得出，
希望佢成功啦.」
「愷晴都同我講返，
原來佢都覺得嗰次佢哋單獨食飯感覺幾好，
話佢個人好搞笑啦，
咁就好喇，
佢有好感嘅女仔個反應都唔錯，
我初頭都有啲驚㗎，
唔知佢對住一個唔算好熟嘅女仔會點，
平時口沒遮攔講多錯多，
不過依家聽返愷晴佢講，
睇嚟佢哋嗰日都幾成功，
之後呢我哋學校有個晚會，
今次miss話搞啲新意思，
一男一女隨機分組，
用抽籤形式決定，
邊個抽到相同顏色嘅籤就為之一組，
之後佢個傻仔原來冇買西裝，
就叫咗我同佢買，
我自己對男仔著西裝就唔會特別鍾意嘅，
不過出去買嗰陣見到佢著西裝，
又真係幾好睇喎，
佢好信我呀因為我話邊件就邊件，
其實個男仔叫得個女仔揀衫，
正常都會令到人諗多咗，
但係我知佢呢個人好奇怪，
唔可以用常理推測，
佢揀我只係因為覺得身邊冇乜邊個眼光信得過，
同埋同我friend啱傾，
就係咁多冇其他，
係呀最後我都買咗蛋糕請佢媽咪食，
佢媽咪成日都送畀我，
我都唔好意思，
次次見到佢好唔情願拎嘢就覺得好搞笑.」
「多得佢個傻仔自爆，
我先知原來佢抽到綠色，
我有樣嘢冇同佢講，
其實我都係抽到綠色，
我抽到嗰刻都試咗一笑，
真係唔知有緣定冇緣喇.
佢有同我講過，
佢話唔知會抽到邊個一組，
跟住我問佢，
想唔想同愷晴一組，
佢冇正面答我不過我覺得佢想，
所以我又做咗一次好蠢嘅嘢，
就係我同愷晴對調咗支籤，
我同佢話我抽到賓仔，
可唔可以同我調呀，
咁愷晴都話得，
所以成件事就圓滿結束，
講起賓仔，
其實我一啲都唔鍾意佢，
雖然佢有時好煩，
但係我真係好佩服佢對自己鍾意嘅人咁勇敢，
起碼我自己已經唔得.」
「最後一切如常，
佢如願以償同愷晴一組，
我都同咗另一個男仔一組，
睇見佢好驚訝個樣，
應該都唔知件事嘅真相嘅，
咁就最好啦，
跟住喺入面覺得有啲嘈，
同埋著高踭鞋搞到隻腳有少少痛，
我就出咗去啦，
嗰陣都覺得自己點解要咁傻，
明明係一組但自己放棄咗，
但係我諗到如果佢知道佢嘅partner係愷晴，
咁佢應該會好開心，
可能因為咁啱所以就放棄咗個機會，
明明諗住打扮得好啲畀佢睇，
最後自己放棄咗機會，
冇得怪嘅自己選擇，
跟住無啦啦佢出咗嚟，
仲知道我整到隻腳幫我買膠布，
睇見佢跑住去買個樣，
唔知點解頭先悶悶不樂嘅情緒就冇咗，
我好開心原來佢記得我呢個好朋友，
同埋好記得佢叫我以後唔著高踭鞋，
唔知點解嗰陣我唔識駁嘴，
淨係識點頭同埋知道，
好啦我記得嘅以後就唔著高踭鞋.」
「真係畀佢激死，
我同佢講咁多次，
唔想畀到假希望賓仔，
點知佢竟然借我過橋叫賓仔幫佢做嘢，
我真係有啲嬲，
不過佢條友最後竟然過嚟同我講對唔住，
我冇同佢講呀，
其實佢講對唔住嗰下已經冇嬲喇，
跟住仲要扮晒嘢拎盒薄荷糖出嚟，
真係服咗佢.」
「學校搞咗個義工足球團，
我特登叫咗愷晴陪我參加，
因為我知道佢會鍾意，
不過今次唔好彩呀，
佢竟然整到隻腳，
咁嗰陣得我一個知道佢住邊度，
所以就扶住佢返去啦，
有段時間我仲拖住佢隻手，
嗰陣我唔識緊張呀，
因為見佢整親，
淨係想佢快啲冇事已經冇諗咁多，
而我相信佢都係，
因為我見佢拖得好自然，
睇佢都係冇諗咁多，
最後仲上咗佢屋企，
跟住扶佢落去睇鐵打，
仲畀個醫師話係佢女朋友，
係真就好啦，
可惜唔係啦.」
「我哋一班人去咗唱k，
其實我覺得佢唱歌真係幾好聽，
佢成日話自己難聽，
其實一直以嚟我都唔覺，
仲有呀，
今日賓仔係咁揀埋啲示愛表白嘅歌，
諗深一層其實我覺得佢好勁，
我講咗咁多次對佢冇意思，
佢都仲係咁堅持，
咁大膽同佢鍾意嘅人分享佢自己嘅心聲，
我可能真係一世都學唔識，
呢樣唔識都唔緊要，
最傻嘅係，
我又扮屋企有事要早啲返屋企，
我feel到佢兩個對大家都有啲意思，
但係大家都唔敢行前一步，
既然係咁不如順水推舟啦，
真係好傻呀，
但係如果我幫到佢嘅話，
呢份傻都係一份理所當然嘅傻，
明明我走咗之後，
買咗杯嘢飲喺公園坐，
根本就冇嘢做，
我一路坐一路說服自己，
咁樣係啱嘅，
係囉，
講講下就得㗎喇.」
「愷晴同我講咗，
話對佢有啲好感，
佢有問過我應該點做，
自己好朋友問我點追男仔，
而嗰個男仔係我鍾意嘅一個好朋友，
但係我知道佢本身都係對愷晴有好感，
就算愷晴冇出現嘅話，
佢都唔會鍾意我，
我哋真係識得太耐喇，
可能已經冇咗個火花，
所以我嗰陣就同愷晴講叫佢放心，
唔使特別緊張，
做返自己就得㗎喇，
佢走唔出你手指罅，
之後我就同佢講愷晴想約你去迪士尼啦，
點知佢話佢唔想去，
話想玩海洋公園多啲，
其實第一下我有啲掙扎，
明知自己好朋友鍾意佢，
我仲同佢單獨出嚟見面，
之後諗返就冇嘢嘅清者自清，
係嗰陣覺得好似唔係咁好啫，
最後都畀佢說服咗，
同佢去咗海洋公園，
佢條友仲拖住我隻手，
嗰下我都嚇一跳，
當然佢未講嗰陣我都知，
佢純粹係因為驚，
諗住搵個人倚靠下，
先至拖住我隻手，
就係咁啦冇其他，
絕對唔會諗多，
呢次好好玩，
唔知點解，
我覺得呢次應該係我同佢最後一次去，
下年嘅今日已經考緊CE，
考完過多幾個月我都已經走，
所以我好珍惜呢次同佢去玩嘅機會，
係咁影相，
佢問我點解係咁樣都冇同佢解釋，
真係辛苦晒佢呀，
同埋佢好驚玩跳樓機，
好多謝佢呀咁鬼驚都陪我玩，
玩完佢都話呢次係最後一次上去，
跟住喺跳樓機前面影嗰張相，
我覺得好靚呀，
最後就送咗隻企鵝公仔畀佢做生日禮物，
佢對眼見到公仔簡直係發咗光咁，
呢次玩得好開心，
咁已經夠㗎啦，
起碼有一次.」
「有日佢同我講話，
話愷晴約咗佢去迪士尼，
跟住佢話部相機壞咗，
我見佢好似束手無策咁，
咪諗住借部相機畀佢囉，
希望啱佢用啦，
我最後冇問佢哋玩成點呀，
呢啲嘢費事問啦都唔關我事嘅，
係估唔到原來佢條友買咗禮物畀我，
攞嚟裝護膚品嘅袋，
佢仲好強調係自己買，
真係服咗佢，
呢個袋我一定會好好保管，
最後原來佢搵到我Qooza，
佢叫我畀佢睇，
但係唔好意思呀呢一刻仲未有勇氣，
可能遲啲先畀啦，
所以我拒絕咗佢，
佢呢個人有樣嘢好就係唔會逼人，
唔知幾時先至夠膽畀佢入嚟睇下我嘅廢話呢.」
「好搞笑喎最後我同佢做咗天才表演嘅司儀，
我未做過㗎，
真係有啲唔自然，
始終要對住一大班人，
好奇怪喎佢叫我上到台望住佢，
佢話咁就唔驚㗎喇，
反正都係咁咪試下囉，
結果真係喎，
見到佢條友一輪嘴係咁噏我就覺得好搞笑，
慢慢就適應咗喺個台上面，
今次呢個經驗好好玩呀，
自從初中之後都冇試過得我同佢兩個合力做一樣嘢，
所以由排緊去到台上，
整個過程我都好享受.」
「佢買咗iphone，
不過冇買case喎，
之後佢諗住買嗰陣搵咗我，
我就帶佢去咗我買依家呢個用緊嘅case嗰間，
不過最特別唔係呢樣，
而係佢記得我生日，
我知佢忙呀多嘢搞，
所以今年生日佢同我講生日快樂已經好開心，
點知原來佢記得自己同我講過，
今年送份禮物畀我，
最後佢帶咗我去一間琴行，
自彈自唱一首生日歌畀我聽，
我嗰下好開心好感動，
同埋好驚喜呀，
因為冇諗過係呢份禮物，
我真係好感激好多謝佢，
最後我仲叫佢拍咗兩條片，
因為好想記錄呢首咁特別嘅歌，
佢都話之後再彈，
都唔會好似今次咁驚喜，
所以好想將呢份回憶珍藏，
擺喺我部電話度，
等我日後可以拎出嚟回味，
呢啲嘢我冇同佢講呀，
對住佢好多嘢都好難講，
我都知自己好懦弱.」
「我哋班搞咗個活動呀，
全部去miss屋企玩，
不過嗰日我有啲煩，
因為Oliver同我表白，
其實一直以嚟身邊都有人同我講佢鍾意我，
其實我都feel到係嘅，
不過我都刻意去保持返同佢嘅距離，
都係嗰句啦唔想畀無謂嘅希望佢，
同佢一齊溫書一早做嘢，
我覺得佢係一個好好嘅team player，
不過我真係唔鍾意佢，
所以佢同我表白嗰陣我都唔知點，
最後我都拒絕咗，
有時我都諗，
點解自己都仲係咁在意身邊好熟悉但係冇可能嘅嗰個，
而忽視咗一路以嚟都對我好好嘅人，
但係我真係唔想因為佢哋對我好就接受佢，
咁樣只會害咗佢哋，
可能係我太天真啦，
所以其實嗰日我心情都有啲複雜，
跟住走嗰陣我都係自己一個，
坐低諗住飲杯嘢，
點知之後又見到佢，
佢過咗嚟呀，
同埋佢呢次就好醒喎，
佢feel到我有啲唔開心，
講咗好多嘢畀我聽，
同埋最後佢畫咗一幅好似小學生嘅畫畀我，
係佢先有呢個能力，
好容易就令到我開心返，
我知佢同愷晴發展得好好，
跟住落嚟我都要開始淡出，
兩個都係我好朋友，
我唔想破壞到佢哋，
所以我同佢單獨出嚟嘅機會買少見少㗎啦，
要珍惜.」
「愷晴同我講咗喇，
佢諗住聖誕嗰期約佢出嚟同佢表白，
兩情相悅嘅話
呢個結果都係遲早嘅事，
佢哋拍拖之後，
我知道我同佢唔可以好似以前咁，
放學得閒去食嘢啦，
大家嘅接觸，聯繫一定會少咗，
啱㗎喇都要開始慣，
反正跟住考CE都唔得閒，
過多陣我都會去英國，
提早適應可能係好事，
希望佢兩個一齊開開心心啦，
我講真㗎，
我最希望真係呢樣嘢.」
「佢兩個真係拍咗拖，
結果好合理亦都好圓滿，
之但係睇住自己鍾意嘅人同第二個拍拖，
唔多唔少總係有少少少少嘅失落，
當然我唔會對住佢哋表露出嚟，
因為我根本就冇得怪人，
我識咗佢五年都冇咁做，
除咗自己又可以怪邊個呢，
不過我好想臨走之前玩唱歌比賽，
想自私返一次，
就係喺佢面前透過一首歌，
去表達我一直以嚟想講嘅嘢，
雖然我知佢好大機會唔明，
聽唔到弦外之音，
但係我淨係想自私一次，
揀返一首我好鍾意嘅歌唱，
歌名有兩個讀音係我同佢個姓，
咁啱歌詞嘅內容亦都係我自己嘅心聲，
好多嘢就咁講真係講唔出，
唯有透過呢個方法去表達啦，
希望愷晴唔好介意啦，
我真係完全冇諗過做咩，
只係自私呢一次，
就係咁冇其他.
其實我想間中崩潰脆弱如戀人
垂在你兩臂中低得不需要身份」
「有時真係好奇怪，
佢兩個鬧交就搵咗我，
我見到佢咁煩惱梗係幫佢啦，
有時我真係好羨慕愷晴，
因為我都好想有撒嬌呢個權利，
都係嗰句啦自己揀嘅冇得怪，
幫鍾意嘅人氹返另一個女仔係咪好平常?
我唔知道呀，
不過一直以嚟都係咁，
每次佢有咩煩惱都係搵我，
好彩佢拍咗拖之後都冇唔記得我，
咁就已經好好唔可以再強求咁多，
last day嗰日呢我同佢都影咗兩張相，
呢兩張相我一定會好好保管，
因為我中學生涯離不開嘅就係呢個人，
就算我同佢只係一對好朋友，
我都好開心識到佢，
Oliver嗰日都有搵我影相呀，
佢都好大方，
冇畀之前表白失敗嘅事影響咗
原來連佢都睇得出我拒絕嘅原因，
偏偏就係佢唔知道，
好奇怪，
點都好啦中學生涯去到呢度，
或者唔算十全十美，
但係我已經無憾㗎啦，
係呀我要求好簡單.」
「佢呢個人真係大頭蝦，
考試竟然都唔記得帶notes，
好彩只係oral，
影響冇咁大嘅，
不過佢無啦啦打過嚟真係嚇死，
嗰日係咁嘅，
話說朝早我出咗去幫家姐做嘢，
佢返工唔得閒咁就叫我幫手，
七八點就出咗去，
晏晝先返嚟，
返到屋企第一件事梗係沖涼跟住就休息啦，
我搞掂出嚟之後，
就聽到電話響，
原來係佢喎，
佢諗住叫我去佢屋企樓下等auntie，
跟住幫佢拎notes去佢考嗰間學校，
算啦返到嚟再沖過啦，
頭我都冇吹我就去咗佢屋企樓下，
太趕急喇真係冇時間，
好彩最後好順利，
咁就得啦，
不論咩關係都好，
好似今日咁幫到佢，
其實就已經夠，
可能我真係好傻啦，
不過都唔爭再多一次啦.」
「最後一篇喇，
開返個blog睇，
原來都隔咗一段時間冇update，
最後愷晴同佢分咗手，
愷晴之後有搵過我，
話覺得佢心目中嘅首選係我，
而唔係自己，
我話唔會啦，
點知愷晴好肯定，
佢話佢依然係咁鍾意東仔，
係呀，
最後一篇就開返個名啦，
但係佢真係接受唔到自己男朋友最鍾意嘅唔係佢，
既然係咁就長痛不如短痛，
就選擇分手，
同埋原來愷晴都知道我一路都係好鍾意佢，
基本上好多人都睇得出，
佢當面同我講嗰陣，
我即刻同佢解釋我真係冇介入，
佢話佢知道，
所以佢完全冇將分手呢個責任擺咗喺我身上，
佢亦都冇怪東仔，
話我哋三個其實都冇話邊個做錯，
分手呢個責任唔應該淨係怪落一個人，
好多謝佢咁體諒，
佢仲叫我不如臨走試下同佢表白啦，
佢覺得我先係東仔首選，
但係太遲喇，
我好快就走，
得返一個月多少少時間，
都改變唔到啲咩，
與其大家咁辛苦long d，
不如都係放棄啦，
同埋依家一齊，
對佢亦都好唔公平，
臨走同佢講跟住真係拍拖嘅話時間又少，
我自己只會更加唔捨得，
可能真係時間唔啱啦，
又或者根本就係我冇爭取過，
有呢個結局其實都好正常.」
「唔好意思呀，
上一篇明明話咗係最後，
結果又打多次，
點解無啦啦打多篇廢話呢，
係因為我下定決心，
喺我上機之前嗰刻就會同你講，
我個Qooza嘅密碼係咩，
唔知到時你會唔會睇啦，
畀咗你先啦，
反正寫完呢篇就真係唔會再update，
因為呢篇我諗住畀你睇嘅，
所以今次我就直接形容稱呼你做『你』，
係呀，
係得你㗎咋，
冇其他人會睇到，
所以你唔好會錯意喇，
其實有時我都唔知佢鍾意你啲乜，
我啱啱識你嘅印象係，
正常樣，
唔係特別高唔係特別靚仔，
不過就極度冇品，
同埋覺得你好多嘢都好奇怪，
簡直係一個怪人，
後尾又莫名其妙熟咗喎，
我聽好多人講過，
其實好多時鍾意一個人嘅時候都係不知不覺，
又咁好彩我同你五年都同班，
我唔講咁多廢話啦，
我估你都有睇頭先我之前打嗰啲嘢，
同你一齊嘅回憶真係太多，
無論你鍾唔鍾意我都好啦，
即使我同你最後唔可以開花結果，
不過我都覺得大家用好朋友嘅身分陪伴咗五年，
呢一刻回望返轉頭都係喜多於悲，
或者我哋錯過咗一齊嘅時機啦，
後尾大家太熟太近，
反而冇咗做情侶嗰種火花，
老實講，
如果重新嚟過，
我諗今次我會積極啲，
不過冇如果嘅，
我唔知愷晴佢講得啱唔啱啦，
佢話你嘅首選係我，
我承認，
我好想佢講嘅係事實，
之但係去到呢個地步都冇咩所謂啦，
我同你唔會再好似之前咁，
喺同一個地方生活，
你都知啦，
我好早就同你講過我會出去讀書，
事實上呢個都係我嘅夢想，
細細個就會覺得出去讀書好好玩，
好想見識下呢個世界，
大個咗就多咗一個原因，
就係唔想再活喺你嘅陰影之下，
我唔知你會唔會覺得我好誇張，
亦都唔知你會唔會明白，
就係當你好鍾意一個人，
但係你知你同佢係冇可能，
都不特止，
仲要生活喺同一個圈子，
其實真係唔算太舒服，
由你未拍拖教你點做，
去到你拍拖，
你同你女朋友鬧交，
你問我點做，
平時分享你同你女朋友嘅生活，
我試過一次喇，
的而且確唔係好容易接受，
不過有時我會怪自己，
都係我自己問題，
其實唔關你事，
喺你角度，
你淨係同你個好朋友分享一啲生活嘅事，
其實你冇錯，
我有無數次諗過，
我唔想做你嘅好朋友，
我係想做你嘅女朋友，
差一個字，
偏偏呢個字對我嚟講好遙遠，
就算我同你點近點熟，
大家幾了解對方都好，
我都好難攞到呢個名銜，
今次就係愷晴，
下次唔知係邊個，
我聽得一次聽得兩次，
我唔知幾時我會頂唔住，
所以我臨走前有諗過，
我不如趁呢段時間放開你，
唔好意思呀，
可唔可以畀我自私一次，
如果我一路喺香港，
根本我就唔捨得同你斷絕來往，
咁啱我同我媽咪一早傾好咗會出去讀書，
所以我就想趁呢段時間，
等你唔喺我身邊嗰陣，
我可以藉此將你暫時拋諸腦後，
等我唔使無時無刻都諗住一個，
冇結果嘅人，
所以喺我未放低你之前，
我都唔會再見你，
亦都係因為咁，
就算英國嗰邊放聖誕假都好，
除咗有突發事情，
如果唔係我都唔返嚟香港，
我真係唔敢見到你，
因為我相信未放低就同你見面，
又或者繼續聯繫嘅話，
我一定會前功盡廢，
但係我應承我自己同埋應承你，
我同你係一定會再見，
唔好意思呀今次我自私咗，
去到英國我就會同你斷聯絡㗎喇，
希望你唔好介意我今次自把自為，
好啦我差唔多出發去機場喇，
我見你冇同我講，
可能你都唔得閒過嚟㗎喇，
唔緊要啦我明白嘅，
反而如果你喺度我都唔知點算好，
我只會更加唔捨得離開香港，
但係我又好想喺走之前再望真啲你，
因為今次一別之後都唔知幾時再見，
但係老套啲嗰句啦，
我永遠都係咁期待將來同你再見嗰刻，
不談往事，
只係寒暄問暖，
咁都已經好滿足㗎啦，
麻煩你呀死人頭，
記住我呀，
唔係第日見到都認唔返，
我係鍾曉嵐，
係你中學時期一個，
鍾意咗你好耐但係又唔敢同你講嘅好朋友，
好喇我走喇
拜拜啦巫澤軒.」
拜拜喇鍾曉嵐，
唔好意思今日我喺機場但係搵你唔到，
所以唔可以同你親口講.