[校園][純愛]《身旁的那一個》: 第九十五章

通常拍戲咪成日會製造啲驚險鏡頭嘅

即係關鍵時候先嚟塞車嗰啲呢

然之後男主角一落車就起勢咁跑

最後女主角準備轉身入閘嗰剎那，

男主角咁啱趕到





跟住就無聲仿有聲，

簡簡單單一個擁抱已經勝過千言萬語

我想講呢，

現實好少有呢啲情況

大家真係唔好睇戲睇上腦





我去機場嗰程巴士相當順利

基本上都冇塞車，

我仲記得攞到車嗰陣啱啱先一點

跟住諗到係喎

確認下佢喺邊個位置先





但係我又唔想畀佢知我已經到咗機場，

話明驚喜呀嘛係咪先

跟住就即刻WhatsApp佢

我:「你都就走我就好口啲啦

嵐嵐，

祝你一路順風

知你就嚟上機唔騷擾你啦

你去到未」





其實我梗係知佢去到啦

佢搭三點嗰班機，

而依家都一點

我咁樣問係想引佢自己講佢依家做緊咩

佢條友肯定話，

「你都傻嘅我已經喺邊度邊度啦

你就未去到」





一定係咁，

跟住我等咗一陣啦見佢未覆機

我就周圍行

睇下見唔見佢嘅蹤影，

又或者佢班朋友甚至乎佢屋企人

事關我認得佢家姐同埋伯母

以前初中家長日見過

佢家姐又係師姐





唔多唔少都有啲印象，

斷估成家人都會嚟送機掛

咁都冇就抵我輸

所以我嗰陣嘅目標，

就係以上我所講嘅人物

細個就係咁㗎啦，

不知天高地厚，





以為所預期嘅嘢就一定會發生

不厭其煩再講多次，

真係錯得好緊要.


跟住行下行下，

我真係唔見嵐嵐

斷估唔會咁快入閘掛，

我已經去埋食肆嗰層睇

完全見唔到佢

跟住就睇返電話啦，

見到佢仲未覆我

都唔知咩事

算啦唔好掛住睇電話

成日頭耷耷

陣間佢喺我隔離行過都唔知，

所以嗰陣就將個電話收埋喺褲袋，

繼續留意周邊

結果都係一無所獲，

嗰陣開始有啲心急啦

事關我喺度搵佢，

都搵咗成半個鐘

仲係見佢唔到，

就連佢嘅親戚同埋好朋友都唔覺眼

之後算啦，

冇驚喜咪冇驚喜

打咗畀佢先

點知冇人聽喎

識佢咁耐好少會咁，

基本上都秒覆

不論電話定WhatsApp都係，

我嗰陣估佢可能係同佢嘅親朋戚友道別

大家喊苦喊忽，

跟住我就即刻衝去大堂嗰邊

去客運大樓嗰邊，

結果都係唔見佢

我唔知大家明唔明，

有時自信過頭

去到最後發現世界原來不像你預期嗰刻，

就會比平時更加焦躁

我嗰陣就係呢個感覺，

終於開始驚，

唔係見唔到掛

同埋有啲後悔自己做呢個決定

早知早幾日立心請假

又或者呃住佢先，

等佢知道我今日會嚟送機

不過要後悔都唔係呢個時候

真係搵唔到先算啦，

依家仲有啲時間，

要努力埋先得，

當然都係嗰句，

努力唔一定有回報

喺成長路上，

大家總有唔同嘅渠道去認識呢句說話

深信好多人都有同樣嘅體驗，

聽嘅時候唔知道呢句說話有幾沉重

要自己試過先知，

而嗰陣嘅我，

係第一次對呢句說話感受得咁深

點解我會咁講，

係因為喺我努力搵緊嗰陣就收到個WhatsApp

嵐嵐:「臨上機前最後一個text嘅人一定係你，

我走喇，

唔好意思頭先冇望電話

唔知道原來你搵過我

呢五年入面多謝你呀巫澤軒

收到你嘅祝福

你都要喺香港好好加油，

我深信我哋有一日會再見

希望你可以等我喺呢段時間好好磨練下自己，

可能你睇緊嗰陣唔知我講咩，

咁係好正常嘅，

因為一直以嚟好多嘢都唔知點同你講

拖下拖鞋搞到我走嗰陣先夠膽

Qooza pw:mch0425，

入面有好多一直以嚟我都冇同你講過嘅嘢

係呀我特登唔WhatsApp同你講，

因為你想問我嗰陣，

我都唔知點答好

所以就擺咗喺一個以後都唔會再update嘅Qooza

唔好意思呀今次自私一次，

好喇我走喇，

拜拜喇巫澤軒」

佢走咗喇，

今日嘅我都係畀唔到驚喜佢，

係有少少失落嘅

第一係因為想見而見唔到，

計劃咗嘅嘢做唔到

第二就係來自頭先我所講嘅，

付出完但係冇收穫

歷練越多就會越覺得呢樣嘢普遍

當然啦嗰陣除咗失落之外，

佔據住我嘅仲有一連串疑問

好想快啲返去睇下佢個Qooza，

究竟入面內容係咩，

今日先發覺，

原來機場係好大

任我來來回回，

始終都係緣慳一面.


緣慳 但是人非草木 並不會太易慣