[校園][純愛]《身旁的那一個》: 第八十七章

去到第二朝

其實我都唔知點面對愷晴

不過第一句都要同佢講嘅，

就係早晨喇

事關我哋拍咗拖幾個月，





每日都會講早晨

多數都係我講先，

因為佢未起身

今日講嗰陣有啲糾結

始終唔知佢經過尋日之後有咩反應





算啦都係照講

過咗幾個鐘佢終於起身，

佢又冇嘢喎好似平時咁

照同我傾計

WhatsApp又唔會淨係打單字





同平時冇分別

咁都好啲，

我哋都冇特別去講尋日嘅事

之後亦唔會提返

好似有個共識咁，

雙方都選擇隻字不提，

大個閱歷多咗，

就會發現自欺欺人呢個情況係好常見





其實唔止我同佢，

應該話每對情侶，

喺價值觀上面總會有唔同嘅地方

可以傾嘅又或者夾到嘅

呢啲就梗係好啦

只不過世事好難盡如人意，

唔係每樣嘢都可以透過溝通就可以解決到





一般呢啲情況都係選擇無視

大家明知件事解決唔到，

一講就嘈，

當開始鬧交嘅話，

就會跌入萬劫不復之地

因為大家都受到情緒嘅影響而亂講嘢

慢慢就會偏離當初嘈緊嘅嗰件事，

既然係咁就唯有隻字不提





扮到好似已經處理咗件事咁，

但其實根本就冇改善到，

只係大家選擇唔講出口啫

以前細個唔識嗰陣，

成日都以為兩個人嘅問題好易解決

有咩咪拎出嚟講，

大個咗先發現其實唔得





唔係每一樣嘢都可以咁做，

衡量過如果覺得講咗出嚟唔好多過好

咁就不如唔好講喇，

咁當然，

我有呢個心態係出咗嚟社會做嘢嘅事，

故事入面我仲係讀緊書

呢方面嘅觸覺真係唔算好強

所以冇幾耐之後

又發生咗啲特別嘢.


我好記得，

考中文oral嗰陣我發生咗一單蝦碌嘢

話說我以前個miss對我哋算係好有心

連中文oral都整咗啲碌屎畀我哋

好老實講，

如果冇時間我就唔溫oral嘅

不過依家已經考晒其他科，

反正都冇嘢好做，

咁咪睇下本碌屎囉

所以我考oral之前幾日

我係有拎過嚟睇，

基本上本碌屎主要嘅內容都係關於例子

同埋有講到唔同種類嘅題目應該點講

詳情我真係唔記得，

類似係咁啦

唔知你哋依家係咪咁，

我哋嗰年考口試會分開日子嘅

同筆試唔同，

唔會全部考生喺同一日考口試

當年我身邊熟嗰啲，

就冇人同我同一日考

咁唔緊要啦係咪先，

都係照考啫，

點知我嗰日就發咗啲烏龍嘢

事緣就係咁嘅，

我嗰日早咗到考場，

因為我諗住慢慢搭車過去

所以就預多啲時間

等自己舒服啲唔使趕頭趕命，

跟住就坐喺度睇碌屎直至到開考

咁就一切妥當喇

好死唔死我竟然唔記得帶碌屎

第一下發現真係想屌死自己

不過情況唔容許我失去理智

所以我忍住先，

跟住我就計時間

如果我依家返去拎再出嚟，

就好大機會遲到，

最慘係今次考間學校同我屋企唔近

呢個先係問題

問心講，

我係咪一定要睇碌屎

其實我覺得唔係，

你話筆試就一定要啫

之但係我又唔想自己因為依家冇睇到，

而令到他日出成績嗰陣有藉口

之後好快我就諗到個解決方法，

係喎咁應該得

但係要睇下天時地利人和喺呢個時候配唔配合，

三者缺一不可

咁當然我都要主動出擊㗎，

成日都咁被動，

就算有天地人幫手都冇用，

所以我就打咗個電話返屋企

問老母喺我房枱頭見唔見到一份碌屎

頁面寫住口試乜乜諸如此類，

跟住佢話見到，

好彩，

即係話我真係冇帶出嚟而唔係跌咗

好喇既然我知道本碌屎喺我屋企，

所以我就諗住打第二個電話畀另一個人，

我嗰刻淨係諗到佢，

其實我唔想咁衰下下都係出事先搵佢

只不過當時嘅情況咁嚴峻，

我選擇咗自私多一次.