[校園][純愛]《身旁的那一個》: 第八十六章

考緊嗰陣

我先發現原來我之前諗嘅嘢係多餘

只要你做足準備嘅話，

基本上考緊嗰陣係冇時間諗其他嘢

淨係驚寫唔晒做唔切





緊張嘅感覺完全冇，

亦都唔會在意個考場入面有幾多個人

一心只會諗住圍繞住試卷嘅嘢，

考試內容就唔講喇

第一應該都好悶





第二就係我都已經唔記得晒

對於考試嘅記憶，

唯一記得嘅就係我哋嗰陣嘅安排

我記得phy chem bio三科，

我哋成班係一齊考，





不過就唔係返我哋中學

好似係去區內另一間

至於主科中英數嗰啲呢，

我哋嗰班就打散晒

話說考中文reading卷嗰日，

嵐嵐嗰間學校同我嗰間學校只係隔咗一條街，

所以嗰日我哋就一齊食lunch

至於愷晴，





考咗咁多科，

我同佢嘅地點次次都唔近

所以嗰排就冇乜點見，

不過呢方面大家都有共識嘅

所以就冇嘢啦

況且其實我哋都係考到5月頭就完晒所有卷

佢都話忍一個月冇得見啫，





而事實上嗰個月真係好快過，

眨下眼就考完最後一科，

我唔係誇張㗎其實真係好快

可能嗰陣生活好緊湊，

變相冇乜度日如年嘅感覺

起身溫書食嘢溫書

跟住又食嘢跟住溫多陣再沖涼，

沖完涼溫多陣就瞓覺





嗰個月都係咁過，

唔知你哋嗰陣考完試係點啦

我記得我考完嗰刻淨係想休息

冇出去玩到通宵達旦，

可能我個人始終都係比較摺

最享受嘅時刻都係一個人

愷晴有問我考完嗰日出唔出嚟見面





老實講我真係唔想，

因為真係好攰

我唔知你明唔明，

嗰件事未完呢，

你就算點辛苦都好，

依然可以一路撐落去

但係一完左，

唔知點解你就會成個人崩潰

所以我就話休息一日先，

咁當然我梗係唔會咁講啦

我咁講陣間用乜嘢畀佢話，

原來你唔想見我乜乜物物

老實講我覺得佢會體諒嘅

不過費事啦，

有得包裝就梗係包裝

講嘅說話盡量都修飾過，

我自己咁多年嘅經驗就係咁

唔好話對住男仔女仔喇，

費事畀人話歧視，

我嗰陣淨係話愷晴你都好攰啦，

休息一日先，

聽日出嚟見咪得囉

使乜咁急我哋考完試大把時間

最後佢都欣然接受

誰不知聽日出嚟就發生咗啲意想不到嘅事，

真係好嘅唔靈醜嘅靈.考完試翌日我哋就出咗嚟啦，

我哋出嚟真係行街嘅啫

佢唔鍾意戶外活動，

亦都對睇戲冇乜興趣

同埋嗰陣五月都開始有啲熱，

我哋呢啲懶人就梗係決定行商場嘆冷氣算數

行下啲超級市場

再藉啲意話要獎勵佢過去嗰一個月咁努力，

今日佢買嘢返屋企補倉嘅費用

就由我津貼啦咁樣

之後愷晴就好開心㗎啦

當然，

佢買嘢返屋企補倉算係咩錢啫

都係幾舊水啫，

即使嗰陣我冇正職只係得part time

不過老豆老母話唔使我畀家用

part time嗰啲錢真係落晒自己袋

而我本身消費慾又唔高，

所以儲埋儲埋都仲有少少錢嘅

咁好正常丫，

買完再行一陣就送佢返屋企趕食飯

誰不知去到佢屋企樓下，

就發生咗啲特別嘢，

我咪話平時我哋走嗰陣都係攬一陣講拜拜嘅

跟住就散水，

今次就唔係喎

攬完之後，

佢突然想錫我

跟住嗰下我做咗一個我依家都覺得罪無可恕嘅行為

就係我推開咗佢，

我女朋友想錫我，

我推開咗佢，

嗰下係我本能反應

因為一切嚟得太急，

我嗰陣冇時間去思考點解我會咁

記得嘅片段就係我上面講嗰啲，

我推開完之後，

我同佢兩個企喺度呆望大家

冷靜咗十秒到，

我先打破呢個咁尷尬嘅氣氛

我:「唔好意思呀……」

愷晴:「冇嘢

好啦我返去先啦拜拜」

之後佢就好快咁衝咗入去佢嘅屋苑，

而我亦都返屋企

一個人行返去嗰陣，

我喺度諗點解會咁

嗰陣嘅我其實忽略咗佢嘅傷害，

我冇諗過，

原來我呢個行為係可以對佢造成好大嘅打擊

當時嘅我真係太愚蠢，

錯得好離譜，

之後返到屋企我先WhatsApp返愷晴

我特登冇提呢件事，

當平時咁，

話我返到啦沖涼先，

之後嗰晚佢淨係覆單字

我已經覺得出出地事，

只不過我當時真係唔可以喺佢面前重提舊事，

係我講唔出口，

我最懦弱嘅就係咁，

傷害咗人仲要唔敢去面對

淨係識逃避又或者婉轉，

呢單嘢我嗰陣就連嵐嵐都冇講過

因為實在開唔到口，

過多十年我依家喺度同大家講返出嚟，

嗰種內疚感仍然記憶猶新.