[校園][純愛]《身旁的那一個》: 第八十五章

好老實講

過咗咁多年，

我自己都驚我將會考同埋A Level啲記憶重疊咗

如果我講錯咗而你哋又發現到，

咁就希望咁多位多多包涵





我記得我嗰年嘅會考係四月開始

考咗筆試先嘅，

physic就肯定係第一科

點解咁肯定，

係因為我記得就嚟開考之前，





我就同咗愷晴去一次街

佢話呢次係考試之前最後一次

之後大家都要搏命，

咁我話好呀唔緊要啦

考咗試先啦咁





嗰次去街我就唔記得咗去邊度，

我估都應該係行陣商場

純粹想見下面啫，

同埋佢話有啲緊張

又驚考得唔好，

而本身都係係比較驚青嘅女仔

咁我作為男朋友梗係要安慰啦

講下啲廢話畀啲信心佢，





送佢返屋企嘅時候，

一路都話佢得嘅唔使驚唔好諗咁多

問心講其實我自己都驚

我都擔心考得唔好，

不過我唔想影響到愷晴

我講咗我自己感受出嚟，

咪盞搞到大家更加驚





唔知你哋同唔同意啦，

有時對住另一半，

我自己盡量都唔想釋放負面嘅能量

無謂搞到另一半

所以我從來都唔會同伴侶呻，

問心講做咗咁多年人

唔多唔少總會有好無助嘅時刻，

面對困難嗰陣都係靠自己走出困局





唔希望將麻煩帶畀另一半，

特別呢個情況，

佢自己都驚緊

咁我都無謂分享呢刻嘅感受

如果佢依靠嘅嗰個人都冇信心，

咁又點可以扶持佢呢

所以我送佢返屋企嗰段路，





主要都係講啲支持嘅說話

當然啦呢啲都有技巧嘅，

唔可以一味死讚

又唔可以正面過頭變咗正能量撚

要扮晒嘢分析完再講

仲要講埋佢以前嘅成績其實幾好

正常發揮一定達到佢要求

所以最緊要都係自己呀諸如此類

所以話，

同女朋友講說話真係唔容易.


送完愷晴返屋企之後，

係喎唔知鍾曉嵐條友點

於是就WhatsApp問一問佢咩情況，

我:「嵐姐下個禮拜就考

驚唔驚」

嵐嵐:「唔好同我講我哋嘅東哥會驚呀」

我:「喂，

你又唔好話

真係有少少緊張」

嵐嵐:「我識你咁耐

都未聽過你話因為考試而驚」

我:「屌點同呢

平時學校嗰啲範圍窄咁多

今次闊咁多，

仲要同一大班仆街同場考」

嵐嵐:「咁你即係話埋我啫」

我:「唔係唔係sorry sorry」

嵐嵐:「你條友呀認真起上嚟都唔理人嘅

我就唔信一大班人同場考對你有咩影響喇

只要你好似平時咁」

我:「希望承你貴言啦

溫成點呀.」

嵐嵐:「ok啦咪又係咁

你點呀使唔使幫幫你」

我:「唔使啦我ok嘅

有冇啲咩可以幫你打氣咁」

嵐嵐:「點解無啦啦要幫我打氣」

我:「你仲有好多個月喺香港咩

都要爭取時間，

對你呢個識咗五年嘅老友盡一點綿力」

嵐嵐:「你真係誇張

唔使啦，

我呢一刻都冇諗就快走呢個問題

淨係想考好呢個試

係喎四月尾又係你生日，

今年使唔使送嘢畀你，

定係依家有愷晴已經唔使我送」

我:「我冇同愷晴講我就快生日喎

啱啱識嗰陣應該有講過

不過跟住大家都冇深究落去」

嵐嵐:「想要咩呀快啲講啦

last一年喇」

我:「唔使啦你知我唔係好鍾意收禮物」

嵐嵐:「上年送畀你嗰隻企鵝仔點呀」

我:「佢好好呀

依家讀緊書休緊息食緊飯」

嵐嵐:「係喎你有冇同愷晴講你有四個仔」

我:「冇喎，

唔好話佢

我連海狗都冇講」

嵐嵐:「你真係呢都唔識講你

呢方面真係細路仔咁」

我:「男人係好貪玩

睇下貪玩啲乜啫」

嵐嵐:「咁都好嘅都係貪玩呢啲

你咁講嘅咁我唔送啦」

我:「唔使啦

其實你已經送咗」

嵐嵐:「下你講咩」

我:「同你咁樣傾咗陣舒緩咗心情喇，

呢份已經係禮物啦」

嵐嵐:「冇嘢呀唔使驚，

呢啲嘢難唔到我哋嘅東哥」

我:「收到晒嵐姐

好啦我都返到，

再傾啦拜拜」

嵐嵐:「拜拜」

死火，

唔記得覆愷晴

拿拿臨覆返佢跟住先沖涼.