[校園][純愛]《身旁的那一個》: 第八十三章
跟住我就返咗去繼續食
我就發現點解冇乜人喺度食嘢嘅
同埋我哋放咗學都一段時間啦，
打完比賽又要等人換衫順便佈置場
，之後食嘢，
頭先我又去球場過咗半個鐘
依家都五點幾，
點解會仲有咁多人喺度
好唔尋常
過多幾分鐘我先如夢初醒，
係喎今日last day
啲人要影相集郵所以冇咁快走，
話說我聽過有啲學校last day就好開放嘅
基本上嗰日嘅課堂都唔會教書
畀晒班同學影相，
我哋嗰陣就唔係，
都仲係做緊past paper跟住啲miss講返重點
同平時冇分別，
唔怪得啲人唔走啦
冇幾耐終於見返嵐嵐
嵐嵐:「嘩你仲喺度食緊呀
」我:「我啱啱先返嚟咋
唔使咁出奇我唔係食咗咁耐
」嵐嵐:「係喎你影咗相未呀
愷晴好似喺樓上
」我:「我都唔鍾意影相
都唔知影嚟做乜
」嵐嵐:「last day呀死人頭
影相啦屎忽鬼
」我:「你都痴線嘅
你咁樣叫我仲影相
」嵐嵐:「不嬲都咁叫
咁你行唔行
」我:「唔行
」嵐嵐:「你唔行我就畫花你件恤衫
我知你唔鍾意畀人畫你件衫呀
乖啦唔好逼我
」好多人last day，
件學校恤衫咪人畫花晒嘅
咁可能真係我呢個人唔夠青春
我嗰陣就唔鍾意嘅
雖然呢件嘢都唔會再有好多機會著，
要洗甩都唔係話真係咁難
係我本身唔鍾意啫，
因為畀人畫嘅時候，
畫嗰個人會同自己好近
我到依家都係，
如果同一個人太近我會有啲唔自然
我唔會表露出唔自在嘅樣
但係就會有啲感覺，
除非嗰個人同我好熟啦
咁真係好熟嘅咪又係得一兩個，
好彩我件恤衫最後都力補不失.
跟住我真係戇居居跟咗嵐嵐去影相
嗰陣我就真係唔驚愷晴見到
第一愷晴識我哋兩個，
知道大家咩關係啦係咪先
第二就係我同嵐嵐佢行得正企得正
我哋又唔係做乜，
去影相咋嘛
再者我同佢呢個組合，
一齊出現大把同學都會覺得理所當然
所以我就唔擔心喺學校同嵐嵐一齊行
嵐嵐:「有個地方一定要影
」跟住佢就捉撚咗我去禮堂
嵐嵐:「嗰次同你上去做所謂嘅司儀真係好好玩
你唔知你條友幾好笑喎
成日爆肚
同時我又要忍住
」我:「嗰次唔撚好意思
我唔想㗎
」嵐嵐:「又貪玩又無聊，
咁大個人都成個細路咁樣
」我:「我可以同你講，
要貪玩要無聊，
其實同年紀冇關
係喎，
我哋嘅嵐姐都係喺度拎唱歌比賽嘅獎
」嵐嵐:「係呀
我知你條友唔鍾意影相，
都費事叫你影咁多地方
不過呢度就一定要
一陣間去多兩個地方，
去多兩個啫
好唔好
」大個咗就知，
女人問乜嘢後面加句好唔好
其實都係得一個答案
你試下答唔好
跟住佢就扁嘴悶悶不樂㗎啦
當然我嗰陣就唔明呢個道理，
純粹畀面嵐嵐
佢好少咁要求，
我咪話ok囉，
最後嗰兩個地方喺邊度
就係我哋當年中一嘅班房，
同埋依家中五嘅班房，
嵐嵐:「一個係開始嘅地方
一個就係完結嘅地方
」我:「下
」嵐嵐:「我睇你都係食懵咗，
我唔似你呀下年仲有機會喺度讀
今日真係我讀書時期嘅last day
雖然我仲有機會返嚟，
溫書呀補課呀諸如此類
只不過個性質，
同今日成班人一齊真係唔同囉
」我:「哦原來係咁
我以為你講咩又開始又完結
」嵐嵐:「你咁叻仔
唔會知㗎啦.」
我:「唔怪得你好似咁感慨
係喎你唔同我哋，
遲啲啦讀完書返嚟
睇下返唔返呢度行下囉
」嵐嵐:「唔知嗰陣係咩心態呢
好難講
」嗰陣我身邊好多人因為last day而喊，
我心諗有冇咁誇張呀
當然可能係我歸屬感唔夠
而嵐嵐佢就冇喊嘅，
我成日都覺得佢一個好tough嘅女仔
我識咗佢咁多年從來冇見過佢示弱，
最多都好似係今日咁
苦笑嘅啫
今日嘅佢笑得最真摯個時刻，
就係同我影三幅相嘅時候
呢三幅相我哋都係冇乜身體接觸，
呢個係佢堅持嘅
我原本諗住大家搭膊頭，
係佢話依家我有咗女朋友，
好多嘢都要避忌
我有時喺度諗都係搭膊頭啫有咩所謂啫
算啦佢話點就點，
不過唔經唔覺，
佢講去外國都講咗年幾
去到今日卒之去到佢last day，
下年我有機會原校升讀嘅話，
都唔會再有佢嘅出現
一個陪咗我五年嘅人，
喺僅餘嘅中學生涯已經唔會再見到佢，
其實呢樣嘢好耐之前已經知
只不過係今日先將佢放大
我冇同佢講，
其實我都唔慣身邊冇咗佢
直至今時今日我都認為，
佢係我呢段經歷入面最重要嗰個人，
過程中唔算豐富亦都唔算精彩
但要回顧起上嚟的話，
根本就唔可能冇咗佢，
不過有啲男人就係咁，
就算感慨都唔會同人講
講咗出嚟都對件事又冇變，
倒不如收埋
我覺得要做嘅，
就只係祝福，
希望佢順順利利平平安安
我嗰陣唯一希望嘅，
就係我同佢兩個未來會有機會再攜手返嚟我哋呢間母校
哪怕係一次都好.