[校園][純愛]《身旁的那一個》: 第八十一章

既然講開班際籃球，

咁就不如講下呢單嘢啦

我之前都有講過，

不過依家喺度講多次

我哋嘅last day係放新年假之前嗰日





而當日就係舉行班際籃球嘅決賽，

同好多學校一樣啦

我哋學校都係分咗初級組同埋高級組，

初級組唔關我事就唔講啦

高級組我哋嗰陣好似有十幾隊，





好似係玩淘汰賽

我呢啲廢柴就冇份打啦

因為真係冇能力唔好意思

同埋我哋班啲人好撚勁

個個唔係好高不過爆炸力好撚勁





死衝爛衝入到去就可以擺個波入網

所以就一路遇神殺神咁樣殺到入準決賽

咁啱嗰日我哋就係對住籃球佬嗰隊

話說準決賽當日，

我哋係放學後先打

全班就落晒去打氣，

有個畫面我好撚記得

就係籃球佬對住嵐嵐





喺度做手勢

尷尬都暈呀

嵐嵐:「佢

喺度做咩呀」

我:「你話呢

我講咗㗎啦」

嵐嵐:「痴線我一定唔應佢





扮睇唔到算」

我:「你個仆街」

愷晴:「其實咁都幾甜

如果係鍾意嘅人做嘅話」

我:「依家好明顯唔係」

嵐嵐:「如果巫澤軒呢條友對住愷晴你做呀

即刻互動啦係咪先」

愷晴:「係囉你又唔玩籃球」





我:「鬼叫我垃圾

我都想玩呀不過費事拖累自己班」

嵐嵐:「收皮啦明明自己唔玩」

我:「你睇下班友都冇性

成隻牛咁樣死撞爛撞，

我落到去盞畀人撞扁」

愷晴:「咁都可以話人」





嵐嵐:「因為佢冇份玩囉

你試下佢有份玩，

佢會唔會咁講

一定唔會話自己似隻牛」

我:「唔該唔好踢爆」


咁多位真係唔好意思

要我喺度形容返嗰場比賽嘅片段，

我真係做唔到

第一真係冇印象

始終唔係親自落場打呢

感受唔係特別深

我淨係記得我畀咗包薄荷糖嵐嵐食

費事佢條友係咁問我拎

我直情成盒畀咗佢，

等佢喺度食算，

愷晴佢就唔係特別鍾意食

所以我就冇畀

最後我哋班贏少少，

跟住成班就衝出去歡呼

贏咗唔攞彩唔通輸咗先攞咩

之後miss都話我哋好犀利

希望入到決賽可以贏埋，

同埋佢都訂咗啲party食物

準備咗喺小食部嗰度喎

跟住有人問佢miss你知贏梗呀

咁快訂食物準備慶祝

不過miss嘅智慧真係好犀利

二話不說就化解咗呢條問題

miss:「贏咗咪慶功宴

輸咗咪慰勞下你哋咁多位囉，

贏輸都唔緊要啦落咗力就得」

好彩我哋贏咗咋

如果輸咗再聽到呢句說話，

真係想打佢

跟住打波嗰班人就入咗去更衣室換衫

其他同學就喺度佈置場地，

印象中，

呢次係我哋最後一次舉行嘅大型活動

真係齊人咁坐晒喺度

畢咗業之後，

雖然主席好努力維繫，

而我覺得佢已經算做得好好

咁多年都叫到唔少人出嚟參與

不過始終好難真係齊齊整整，

有啲讀書好忙，

有啲返工就多嘢做唔得閒，

甚至乎有啲根本就唔喺香港

講緊疫情之前呀

所以好難好似讀書嗰陣咁，

一班人鳩下鳩下又過一日

老實講啦，

你估party啲嘢好好食咩

大家都唔係志在食㗎啦，

都係成班一齊玩一齊吹水，

正當我哋嘻嘻哈哈嘅時候

我聽都唔知邊個人同我講

「喂，

Oliver搵你呀東仔」

跟住我就見到喺遠處企咗喺操場嘅籃球佬，

企咗喺度望住我.