[校園][純愛]《身旁的那一個》: 第八十章

去到第二日，

其實我都唔知點氹

大佬咁多年都未試過

冇經驗之下其實好難有頭緒

算啦到時都係諗住用錢搞掂，





買樣嘢送畀佢當係陪罪禮物

你哋知啦，

有啲女仔好著重物質背後嘅意思

你就咁送一份禮物畀佢

佢可能會叫你唔好送





慳返啲錢，

你知啦我哋嗰陣仲係讀緊書

經濟方面的而且確冇依家咁好

當然開口問老母拎都得

不過費事煩啦





拎完之後到時佢又會問做乜

咁不如一開始就唔好問，

仲有一點，

依家講開老母嗰度先記得

就係我冇同過我屋企人講依家拍緊拖

第一就係我頭先講嗰個原因

真係費事煩，

到時老母又問邊個嚟㗎





叫佢上嚟食飯啦

我好肯定老母唔會制止我拍拖

同時間我都確信佢會嚇親愷晴，

愷晴佢話對住啲唔熟嘅人會比較怕醜

有時唔識點應對

所以好多時都畀人話冇反應串柒柒

佢對住我梗係唔係咁啦





不過有時我同佢一齊嘅時候，

撞到啲冇咁熟嘅人，

佢個反應真係好似佢講嘅咁

同埋大家都係啱啱拍拖啫，

見家長呢啲嘢有排先啦

我feel到佢又唔係特別想，

我自己又傾向唔見

所以呢方面就好容易就有共識





講返件事先，

諗諗下都係唔好喇

都係搵下智囊團幫手，

睇下佢可唔可以幫我走出眼前嘅困局

海狗就唔好啦

佢條仆街淨係識扑嘢

問佢都唔識㗎啦，





嚟嚟去去都係嗰個嘅啫.


我:「有樣嘢懇請你幫手」

嵐嵐:「做咩呀」

我:「話說我激嬲咗愷晴」

嵐嵐:「唔係啩衰咩呀

講嚟聽下」

跟住我就照直講啦

嵐嵐:「你放心啦，

愷晴好易氹嘅啫

有時鬧下交都好嘅

特別你哋呢啲咁細單，

當係磨合下囉」

我:「你睇你幾黑心

咁都叫好」

嵐嵐:「真係㗎傻仔，

唔發生呢啲嘢你點知對方要啲乜

你知啦嬲呢啲嘢，

個個都唔同嘅」

我:「咁我依家應該點搞呢」

嵐嵐:「簡單啦，

愷晴有冇同你講過佢鍾意啲乜」

我:「佢好似講過話鍾意收到手寫嘅文字

佢成日話我啲好肥好大隻，

細路仔字咁樣」

嵐嵐:「咁你咪寫啲嘢畀佢囉

你呢啲吹水佬唔使我教你啦，

放心啦冇嘢呀

好細單嘢咋嘛」

我:「多謝嵐嵐」

跟住我就依足教學

扮晒嘢求其搵張a4紙

寫咗封道歉信送畀佢，

內容我唔記得咗呀

總之都係係咁讚佢大方，

發生啲咁嚴重嘅嘢都只係嬲

算好大方架喇

畀著第二個已經拎刀斬我

又話我知錯喇下次唔會咁

跟住出嚟佢見到張紙就好開心

即刻冇嬲爆爆咁

所以你哋話係咪好易氹

不過易氹還易氹，

都唔想再有多次

平平穩穩就算

跟住佢話會keep好呢張紙，

話我啲字好得意喎

同埋一封道歉信竟然冇對唔住三個字

佢覺得好搞笑，

愷晴:「咁醒嘅識咁樣氹返我」

我:「犀利呀呢

我記得你講過㗎嘛」

愷晴:「肯定有軍師啦」

我:「我女朋友真係醒嘅啫」

愷晴:「如果唔係嵐嵐打救你，

一定唔會咁啦

係咪先快啲講」

我:「咁你都知邊個做我軍師」

愷晴:「仲有邊個丫」

我:「咁又係」

睇到佢依家咁開心，

好快就將本來嬲緊嘅嘢拋諸腦後，

不得不佩服嵐嵐

次次有嘢搵親佢，

佢都唔會令我失望

我送完愷晴返屋企之後，

我都有WhatsApp嵐嵐話畀佢知已經搞掂咗

我:「多謝嵐嵐

其實點解你咁勁」

嵐嵐:「叻過你少少咁啦」

我:「我呢啲獎罰分明嘅，

你幫咗我就一定要請嘢畀你」

嵐嵐:「唔使請啦

而家身份尷尬唔方便呀.」

我:「痴線

點會尷尬

拍咗拖啫唔通同你聯誼下都唔得咩

佢話唔得嘅我都唔理佢㗎喇」

嵐嵐:「無啦啦咁型嘅

你估佢咁小氣咩

點會唔得，

係我諗多咗啫」

我:「請你食lunch囉

下個禮拜班籃就開，

到時你肯定喺學校食啦」

嵐嵐:「年年都睇㗎啦

打籃球又真係幾型嘅，

唔好意思呀呢樣就冇你份呀」

我:「我都想型呀不過冇本事

聽講籃球佬摩拳擦掌

趁住最後機會，

趕及喺你面前表演」

嵐嵐:「係呀我都聽佢有講過

其實我係想睇咋喎

冇話睇特定邊個」

我:「最弊佢唔係咁諗呢

佢肯定諗撚多咗

幻想你好似卡通片嗰啲女主角咁，

半場休息喺場邊遞水畀佢

同埋好落力幫佢加油」

嵐嵐:「會唔會呀

你又喺度諗到咁衰

其實係咪你想咋」

我:「你信唔信丫

BTW我撚有玩運動咩」

嵐嵐:「咁又係

你條友跑又唔得玩又唔得

死淨把口」

我:「我都想玩運動好撚型又多女歡呼

奈何唔係我嗰科」

嵐嵐:「放心啦就算你乜都唔玩，

愷晴都係咁鍾意你」

我:「咁我就唔知喎.」

嵐嵐:「有啲人鍾意講feel講其他嘢㗎嘛

唔係淨係講玩運動嘅，

係鍾意你嘅

你乜做都唔掂都係咁鍾意

你信唔信丫」

我:「又抄我」

嵐嵐:「小學雞

呢樣我可以肯定，

你信唔信丫」

我:「梗係信啦，

你講嘢我幾時唔信」