[校園][純愛]《身旁的那一個》: 第七十九章
如果大家有拍過拖嘅話
有個課題一定有上過，
拍拖嘅必經階段
我講緊嘅係鬧交
而鬧交呢就分好多種嘅，
第一種就梗係互鬧啦
隔住個WhatsApp鬧，
用電話鬧
甚至乎面對面開拖，
係呢種嘅話，
基本上都衰九成
因為呢個情況之下，
大家好容易就會失去理智
繼而提高講錯嘢個機率
你知啦，
有啲人特別對字眼敏感㗎嘛
我唔講男方定女方喇，
費事畀人話我性別歧視
咁呢啲人如果一聽到某啲唔啱聽嘅說話，
佢就會牢牢緊記
到下次又開拖嗰陣，
再拎返今次嘅舊帳
然之後嗰本相簿不停咁寫野落去
所以話呢種對鬧點會唔輸咗九成呢
第二種就好啲，
就係其中一個嬲咗對方，
另一個就成個死狗咁
呢種鬧交呢我就覺得冇乜殺傷力
因為已經分咗上下靶，
地位低嗰個只要係咁認錯，
甘於承認自己地位冇對方咁高嘅話
其實真係好易搞，
唔通佢係嬲你一世咩
嬲人你估唔攰嘅咩，
當然只係個人意見，
不喜勿插
大家睇故事都知我呢條友咩性格啦
首先冇脾氣其次易話為
所以我第一次經歷情侶鬧交
就係上文講嘅第二種，
絕對唔會咁衝動對鬧，
其實諗返起都好無謂
喺度略略講下嗰次咩事啦，
話說唱歌比賽完之後
返多兩三個禮拜就會放新年假，
放完新年假之後呢，
已經係study leave時間
話說嗰陣都仲係返緊學，
咁有一個禮拜六呢，
有個小學同學就約我出嚟食飯
佢話已經約咗我哋小學嘅班主任啦，
跟住再有幾個男同學咁樣
問我一唔一齊，
咁我同呢班躝癱都叫做friend嘅
起碼有嘢講先，
所以我就話盡快覆啦咁，
點解唔當場覆
因為要問女朋友，
呢個咪又係我之前做壞規矩囉
啱啱開始嗰陣貪好玩
做乜鳩都問佢先
跟住就變咗常態
咁講真其實我feel到愷晴佢都係玩嘅啫，
次次都話你去啦咁樣
我哋拍拖嗰段時間，
從來都冇話唔畀我去邊度
又唔會問約邊個，
有冇女仔在場呢啲問題
咁嗰次我就好似平時咁照問愷晴啦
我都係照直講，
話約咗小學同學同埋小學呀sir出嚟食飯，
之後佢都話ok呀去啦咁，
可能睇緊嘅你哋心諗
冇女仔咁佢又點解會嬲呢
因為通常呢啲情況，
都係衰個男仔冇匯報有女在場
跟住自己個女朋友就懷疑你係咪出軌呀偷食諸如此類
既然我今次講真話又肯定冇女仔，
咁點解會出事
我諗返起都覺得奇怪.
我記得我哋嗰晚約咗七點半食，
臨出去之前呢
我就同緊愷晴講電話，
我:「我哋今晚唔會食好耐嘅
應該食到十點零就差唔多㗎啦
」愷晴:「好呀
」我:「食緊嗰陣我費事係咁拎電話出嚟，
我知你會體諒嘅
」愷晴:「知啦男朋友，
你放心食啦
我夜晚都係食下飯啦，
跟住上下網冇乜嘢做
」我記得我哋拍拖嗰陣，
我最開心係聽到愷晴佢講有嘢做
因為佢有嘢做嗰陣，
代表我可以專心做自己嘢
人都係犯賤
單身就諗住拍拖，
拍拖就掛住單身
我記得我單身嗰陣就真係冇諗住拍拖
不過我亦都好記得，
拍拖嗰陣係好掛住單身
我唔知你哋有冇同感，
認真起上嚟做一樣嘢呢，
係覺得連覆WhatsApp都好煩
我自己一人之境嗰陣，
真係全部都係做嘢
因為我都想盡快搞掂啲嘢，
如果你一路做一路覆電話
咁樣其實真係會拖低我嘅效率
都係嗰句啦，
我就從來冇同愷晴佢講過
費事一講佢又亂諗，
「咁我唔搵你囉.」
「你係咪嫌我煩唔鍾意我啦.」
老實講佢就冇講過呢啲嘢嘅
係我聽身邊啲朋友講再加埋自己嘅意見，
寧願唔好講出口
辛苦自己算數
費事有更加多嘅野煩到我
講返故事先，
我:「多謝女王
」愷晴:「得喇你食啦，
你哋散咗之後再傾過好唔好呀
」我:「好呀
」愷晴:「大約幾點呀?
我都想就時間沖涼
」我:「十點幾乜撚都食完啦
」愷晴:「好.」
咁我最後衰咩呢
就係我同小學嗰班仆街食到九點九，
之後諗住散水啦，
點知有同學話傾得好過癮，
買啲嘢飲去附近球場再傾多陣
而我嗰陣就唔記得咗，
同愷晴講大約十點幾就完呢樣嘢，
結果我哋一路飲一路吹，
最後十二點先完
跟住返屋企嗰陣我望一望電我已經知出事，
因為我見到愷晴係咁搵我，
我睇返啲WhatsApp，
佢以為我係咪出咗事
做乜唔覆嘅，
我嗰陣就照直講我頭先個情況，
之後呢佢就嬲左喇
冇呀，
跟住我咪再打過去係咁講對唔住
跟住呢我就已經feel到佢態度已經軟化咗，
我喺度講少少嘢啦，
愷晴或者好容易就會嬲，
但佢係好撚容易就氹到
呢樣嘢就遲啲先講啦
之後我就約咗佢聽日出嚟，
我扮晒話可唔可以畀機會我改過
唔該你丫畀次機會我呀咁樣，
我呢條友扮死狗最叻㗎啦
之後佢都話好，
呢次就係佢第一次嬲咗我，
問心講我真係唔覺得我好錯
如果今次我同佢嘅角色調轉，
我一定唔會嬲佢呢樣嘢
咁傾計食飯好難預時間，
有時興起想吹多啲都係人之常情啫，
你估返工返學可以計到時間咩係咪先
我最多咪衰在十點幾嗰陣，
冇同佢update我個情況
除咗呢樣我真係覺得我冇錯
不過我好細個就明白
咁樣同女仔喺度據理力爭呢，
結果得一個嘅啫
就係輸
有咩好拗啦係咪先
佢要嬲就嬲啦，
快啲嬲完咪搞掂咗件事囉
喺度同對方辯論只會令個情況越嚟越差，
有樣嘢我當刻冇同任何人講過
就係點解我今次會咁快扮死狗嘅原因，
老老實實我唔係驚同佢分手
而係我知道我同佢仲喺同一個圈子相處，
我唔想大家面阻阻
搞到他日我自己都覺得尷尬，
我自己最撚憎就係窒息嗰種氣氛
為免呢個情況出現，
所以我先希望可以盡快氹得返佢.