[校園][純愛]《身旁的那一個》: 第七十六章

話說我同愷晴都有共識，

就係返學校嘅時候

盡量都低調處理

大家喺校園裏面嘅活動，

會好似未拍拖之前咁





佢平時會搵佢班friend玩，

而我食飯都係同返我圍內嗰班一齊

我唔計嵐嵐佢，

我估都應該仲有啲人會知道我哋拍拖呢件事

呢方面我就冇深究





可能你哋會問，

讀書拍拖唔係應該會好高調嘅咩

又或者一對情侶喺戀情嘅初期，

正常都應該周圍同人share

睇下你係真人講出口丫定係擺上去social media





咁可能真係我同佢嘅性格問題

我哋真係想低調啲

其實我唔覺得我哋高調會引起啲咩麻煩，

咩年代呀係咪先

係純粹性格問題

有時放學我同佢都唔係一齊走

講起放學呢個問題，

之前我咪喺度分享過，





我同嵐嵐好多時都會揀禮拜五放學後去食下午茶嘅

呢個活動就真係因我同愷晴拍拖後而取消咗

係嵐嵐決定嘅

要食都唔緊要，

不過就叫埋愷晴

係有時佢話唔想做電燈膽

依家基本上禮拜五放學得閒嘅話，





我都會拎嚟陪愷晴，

其實冇㗎都係周圍行下

之前我都喺度講同佢拍拖嘅生活啦，

唔算多姿多彩，

平平淡淡不過大家都安於現狀

當然夜晚就日日都講電話咁濟，

每日除咗返學時間，

就真係瘋狂WhatsApp





我唔知點同佢講我都想放鬆下呢個問題，

唯有拖住先啦，

有時我諗係咪自己做壞規矩

一向都秒回開

搞到今時今日咁，

其實有樣嘢好奇怪，

佢從來都冇要求我秒回





係拍咗拖之後我逼自己盡快覆，

有時隔咗一兩個字，

佢見我冇覆佢都只係問下我，

而從來都冇因為咁鬧我或者發脾氣，

係我自己驚咗呢方面

唔知點解，

不過呢啲都係要學嘅嘢嚟嘅，

我成日都話同一個人拍拖

互相遷就係必然嘅事

唔好先入為主覺得遷就係衰嘢嚟先，

遷就亦都唔一定辛苦，

大家同步努力其實目的都係得一個嘅啫，

就係經營呢段關係囉.


話說今年嘅唱歌比賽又舉行啦

年年都係放完聖誕假就玩，

上年嵐嵐講過話今年一定玩

因為都最後一年，

純粹留返個紀念

贏輸都唔重要，

愷晴:「加油呀嵐嵐」

嵐嵐:「愷晴你唔玩呀

Teresa都玩喎」

Teresa:「係囉愷晴你真係唔玩」

愷晴:「唔啦我唱歌唔好聽

對住咁多人又怕醜，

我幫你哋打氣啦」

我:「係囉嵐姐

到時一定有咁大聲得咁大聲幫你打氣

我記得呀

話過會整定個banner畀你

嵐嵐:「愷晴你聽到啦唔係我叫㗎

係呀東哥自己忽上腦無啦啦咁講」

愷晴:「我冇佢咁大聲啫不過都會好落力幫你打氣.

Teresa:「係喎你揀咗歌未」

嵐嵐:「我未呀仲諗緊.」

我:「嵐姐你有咩好揀丫

咪又係關心妍」

嵐嵐:「你咁講我就唔唱」

我:「唔好鬥氣呀如果唔係陣間輸左入我數就唔好」

嵐嵐:「我想自私一次

揀一首我好鍾意嘅歌唱，

贏好輸好都唔緊要」

我:「揀歌有咩咁自私呀」

愷晴:「係囉，

不過既然係最後一次，

咁就真係揀一首你想唱啦」

我:「其實我都覺得係

屌你都最後一次，

梗係自己想揀咩就揀咩

使乜理人」

嵐嵐:「多謝你兩個咁鼓勵

特別你呀死人頭

以為你潑冷水添」

我:「不嬲都冇話過你唱歌難聽

淨係話你人格有問題」

嵐嵐:「我人格好正常」

愷晴:「真係冇你兩個收」

我:「當然如果今年輸咗，

下年天才表演你試下返嚟唱都得嘅

應該有情講掛話晒都舊生」

嵐嵐:「呢啲比賽贏輸真係冇所謂

純粹係最後一年想留返個紀念

以後都冇機會㗎喇，

認認真真唱一次得唔得都好，

起碼無憾先.」

我心諗佢講得咁誇張

搞到我都有啲興趣佢揀咩歌

明明佢條友嚟嚟去去都係關心妍

聽佢口氣好似想搵第二個歌手，

我就放長雙眼睇下你揀咩歌.