[校園][純愛]《身旁的那一個》: 第七十五章

至於消費嗰度

諗返起都要多謝愷晴

話說我咁多年極少送嘢畀佢，

講明先真係唔係我孤寒

有時寧願我唔食飯，





又或者我嗰陣做緊part time賺返嚟嗰啲錢

畀佢用都冇問題

我之前咪講過我有份part time係用屋企電腦做嘅

係佢堅持唔要我請，

我請得最多嘅





就係有時放學去無印

可能買文具呀嘢食呀之類，

佢就好開心㗎喇

反而堅持要請嗰個係我

雖然呢啲唔係啲咩特別嘢





咁但係拍緊拖嗰陣我最想嘅，

都係希望幫到女朋友，

特別我呢啲唔係好識營造驚喜

手工又十分之差，

如果有啲嘢我知佢有需要，

咁就真係perfect

起碼我會有方向知道點做

就係送畀佢，





因為知道佢需要呢件嘢丫嘛

咁就唔驚買錯啦係咪先

所以我成日覺得，

如果伴侶肯同你講邊啲嘢想要又或者需要，

簡直係人生一大樂事

除非嗰樣嘢你買唔起啦

如果唔係就真係簡單到爆





煩少幾多嘢呀知唔知

不過調返轉，

我就叫佢唔好送嘢畀我

第一我知道佢冇返part time，

啲錢梗係留返自己用

第二我個性格都係衰

成日都唔想欠咗人，

你當我仆街啲諗衰啲





我驚有一日我同嗰個人嘈嗰陣，

佢會用呢啲原因嚟撻我

所以咁多年我都唔係好鍾意人哋送嘢畀我，

次次都話唔好唔好

事實上，

我讀書嗰陣我收得最貴嗰份禮物，

就係嵐嵐送畀我嗰隻企鵝仔





嗰隻唔計啦因為真係好得意

同埋嵐嵐呢條友咁厚面皮

佢要搵嘢嚟撻我根本就唔使理由

呢兩個就係我堅持叫愷晴唔好送嘢畀我嘅原因.



可能你哋都會問，

拍咗拖之後，

我仲有冇同嵐嵐聯絡

唔使問梗係有啦

初頭嵐嵐佢話我依家身份唔同咗

如果我同佢繼續好似之前咁，

兩個人一齊出嚟呀成日WhatsApp呀，

驚會令到愷晴亂諗

所以佢話我同佢盡量都唔會單獨出嚟

傾計嗰邊都盡量少啲㗎啦咁

某程度上我都同意嘅

我同意我同佢盡量都唔好單獨出嚟，

呢個case真係好容易令人遐想

特別有時我同愷晴傾計嗰陣，

真係間唔中都講起嵐嵐，

好似有一次傾電話，

我行出去諗住飲水

跟住屋企冇人，

我咪一路行一路唱歌

唱邊首真係唔記得喇因為真係求鳩其噏兩三句

返到嚟拎返個電話講嗰陣，

愷晴就問我係咪好鍾意關心妍，

我話唔係呀有啲鍾意聽囉

佢問我係咪因為嵐嵐

我話係呀佢條撚樣成日洗我腦

又有一次佢再問我，

你當都係傾傾下嘅話題牽涉到嵐嵐啦，

佢再三講佢覺得我同嵐嵐真係好熟

咁多年有冇諗過一齊，

我即刻話冇

我答得咁快係因為我驚佢亂諗

當然唔等於我鳩噏，

我喺度都一再講，

要一齊嘅，

一早一齊咗啦

我都有將呢啲嘢同返嵐嵐講

但係點解會咁

冇呀，

咁多年慣咗都會同佢講我自己嘅嘢

我又唔係講啲乜，

我哋兩個嵐嵐又唔係唔識

同埋我知佢守得秘密

咁咪同佢講囉，

之後佢都話小心啲，

佢話我喺愷晴面前不斷咁講另一個女仔

的而且確好容易令佢胡思亂想，

我係咪同呢個女仔超越咗朋友嘅關係

我咪同佢講真係冇，

之後嵐嵐佢話佢信

我好記得佢咁講，

嵐嵐:「我知你對我冇嘢

你對我有嘢的話，

件事嘅發展就唔係咁㗎啦」

我:「咁咪就係」

嵐嵐:「但係愷晴唔係咁諗吖嘛

佢依家算好，

都只係問下你

更加容易亂諗嗰啲人，

可能已經諗埋一邊

甚至以為我同你係咪背住佢偷食」

我:「唔係咁嚴重呀嘛」

嵐嵐:「佢就應該未去到呢個程度嘅，

不過巫澤軒你醒啲啦

你兩個我都咁熟

我唔想你哋因為我呢個人，

搞到有咩誤會」

我:「你咁講我就信你啦，

不嬲你捉人心理都咁撚勁」

所以後來我就聽咗佢嘅教誨啦，

的而且確，

做人男朋友原來真係好多嘢學.