[校園][純愛]《身旁的那一個》: 第七十七章
任何嘢加咗最後兩個字，
唔知點解好多人覺得個意義就會深咗一重
今次呢個唱歌比賽都唔例外
我哋呢班中五學生，
有唔少都因為擔心遲啲唔可以原校升讀
所以好多人嘅心態同嵐嵐一樣
正正因為咁，
嗰年報名係十分踴躍
老師有問過我做唔做多次司儀，
跟住我問嵐嵐
點知佢話今年唔做得，
因為佢都有份玩
又要準備呀呢樣嗰樣，
既然我嘅拍檔唔係佢
咁我都同老師講唔做喇
講開又講，
嵐嵐唔知點解今次對呢個比賽咁上心
好積極去準備，
我都識咗佢四五年，
我又唔認為佢好熱衷於唱歌比賽
真係好熱衷嘅話，
就唔會今年先玩啦
我費事當面問佢點解喇
第一佢九成唔會講懶神秘
第二都尊重返佢啦，
佢唔講都一定有佢嘅理由
咁多年同佢相處嘅模式都係咁，
亦因為咁，
去到我依家拍拖對住愷晴
我嘅做法都係咁，
從來都唔會逼愷晴做啲乜講啲乜
佢想講就自然會講，
佢有啲嘢想一齊做佢亦都會出聲，
我就從來都唔會要求我女朋友點點點
甚至故事提及講到嘅後來，
對異性都係咁，
搞到我都有啲期待佢嗰日唱成點
我亦有將呢個心情同愷晴分享，
大家唔好以為愷晴會唔會呷醋呀，
喺佢面前係咁講另一個女仔
事實上佢哋的確係好friend嘅
愷晴自己都好緊張，
好想嵐嵐贏亦都覺得佢做到
臨比賽之前嗰晚，
我都有WhatsApp嵐嵐叫佢加油，
贏咗請食蛋糕
因為知佢條友鍾意，
跟住佢會唔會唔係咁好
我話呢啲嘢唔好驚啦
大家行得正企得正
其他人要亂諗嘅，
我依家同你WhatsApp都可以亂諗成出軌
愷晴又唔係唔知我同你熟，
我聽日先再同佢講，
所以最尾佢都接受咗
仆街掛住同佢WhatsApp，
盡快要覆返愷晴嗰邊先.
去到比賽當日，
今年係放咗學先舉行
所以我哋成班唔使好似往年咁，
一定要一班一班咁坐好似去禮堂聽talk咁
我哋今年可以自由坐位
既然係咁我梗係同返我熟嗰啲人坐啦，
愷晴呀海狗呀主席呀佢哋
仲要好好彩，
我哋最後一堂個miss準時放我哋
因為知道我哋嗰班都有幾個人參加比賽
今日唔補課喇咁樣，
所以我哋落到去大把位揀
梗係坐前面啦係咪先唔使畀人阻住
同埋唔坐前面嘅話，
喺台上面嘅嵐嵐點睇到我個banner
其實我個banner都係一啲好無聊嘅嘢啫，
開個word嗰度打「嵐嵐加油」呢四個字,
跟住個字嘅size整到好大，
再print出嚟
唔好意思講返規則先
今次好似係一場過，
冇分初賽決賽嗰啲，
我記得嵐嵐中段先開始唱
老實講唔係佢玩我唔會嚟睇嘅，
既然唔使補課返屋企做嘢啦係咪先，
不過算啦既然佢唱就畀下面
當然，
一首歌都係三四分鐘
好快就已經去到嵐嵐，
佢呢啲靚女呢就肯定大把人歡呼
我特登望一望後面，
班仆街師弟呀係咁喺度叫囂
我偷聽佢哋講
佢哋知道有嵐嵐呢個師姐，
淨係知佢靚
不過唔知佢叫咩名
跟住痴撚線有條友指住我
我聽唔清楚喇，
好似話準備唱歌個靚女同佢好熟㗎
我屌班師弟都柒下柒下，
無啦啦指住我梗係鬧返佢啦係咪先
跟住愷晴叫返我唔好玩喇聽嵐嵐唱歌啦
我先收咗口，
講下啲花生嘢先
話說賓仔買撚咗支柑桔水
佢話諗住等嵐嵐唱完之後畀佢飲，
我真係服咗佢
條友食咗咁多次檸檬都好似冇事，
心理質素好好
佢嘅行為可能好多人都覺得好癲，
不過不惜一切都要做呢個心態
看似自私同時又真係需要好大勇氣，
打從心底佩服
再望一望就見到籃球佬都有同佢啲friend坐喺度睇，
跟住就聽到司儀講
依家有請xx班嘅鍾曉嵐同學，
為我哋演繹佢揀嘅歌--鍾無艷，
https://www.youtube.com/watch?v=qLtQ18hE3wI
個帳幕一打開就見到佢企咗喺度揸住支咪
就開始唱啦，
我冇諗過佢會揀呢首，
第一我從來冇聽過佢唱
我哋之前去親唱k，
佢都冇點過
以前未拍拖嗰陣同佢行嘅時候，
又唔覺佢有哼過唱過
首歌都出咗一段時間㗎喇，
真係咁鍾意平時冇理由唔唱丫
不過心諗佢比賽又點會玩嘢呢，
所以我聽到佢唱呢首係好surprise
首歌唔易唱嘅，
啲字既多且密，
佢都handle得好好，
節奏啱音準啱歌詞冇錯，
我估㗎咋
嗰陣我都唔識呢首歌嘅歌詞
見佢唱得咁順我先估佢冇錯，
唱唱下佢有望住我，
驀然間我諗起以前講過嘅嘢
我:「咁都係，
屌到時你驚嘅話咪望住我.」
嵐嵐:「咁好啦我上到去就眼甘甘望住你.」
可能佢真係驚
所以望住我，
老實講佢啲音都咁穩
起碼同唱k差唔多，
其實我覺得算好撚勁
直至佢唱完最後一句，
佢就彎低身鞠躬同咁多位多謝，
我同埋附近啲人梗係起勢咁拍手
唱得咁好聽係咪先，
當我大個咗回想起呢段經歷
先發覺我以前搞錯啲嘢，
我以前成日話嵐嵐呢次係最後一次參加，
所以先咁認真準備，
其實唔係，
嵐嵐呢次係第一次喺學校玩唱歌比賽
可能係想透過歌曲，
去傳達信息畀一位，
佢想畀嘅人，
係嗰個人愚昧無知，
冇留意到呢樣嘢，
真係責無旁貸
我以前咁都搞錯第一次同埋最後一次，
真係錯得好離譜.
沒有得你的允許 我都會愛下去
互相祝福心軟之際或者准我吻下去
我痛恨成熟到不要你望著我流淚
但漂亮笑下去 彷彿冬天飲雪水
被你一貫的讚許卻不配愛下去
在你悲傷一刻必須解穢找到我樂趣
我甘於當副車 也是快樂像唏噓
彼此這麼了解 難怪注定似兄妹一對