[校園][純愛]《身旁的那一個》: 第六十八章

正如我之前所講啦，

中五嗰年我哋真係瘋狂溫書係咁補課

好多時放假都拎嚟溫書，

之不過咁，

有時都需要放鬆下嘅





人之常情嚟嘅，

所以有一日我都收到愷情個WhatsApp

佢問一齊去睇戲好唔好

佢話想睇鬼片

不過身邊啲friend唔敢睇





所以就約我啦

可能你哋會問，

唔係啩咁你都feel唔到

咁可能我嗰陣真係太天真

我覺得佢真係想搵條友陪佢睇鬼片





不過我覺得有個問題，

就係佢班friend入面，

應該有一個唔驚鬼片

嗰條友識咗佢四五年

我都未聽過佢話驚鬼片嘅

於是我就直搗黃龍

上去踩佢場問佢，

其實即係WhatsApp啫





我:「我真係未聽過你話驚鬼片」

嵐嵐:「我唔係咁講點樣畀位你上」

老老實實佢條友真係幾醒目

咁快就知我講乜

我:「好大犧牲喎咁樣」

嵐嵐:「又唔係嘅，

我唔驚啫不過又唔係話好想睇鬼片咁囉」





我:「老老實實我興趣都唔係好大

叫做唔介意咁囉」

嵐嵐:「有人約你睇呀

套戲講乜都唔係重點㗎啦

扮嘢」

我:「就到時間咪去囉係咪先」

嵐嵐:「係係係你啱」

我:「不過我又衰嘅，





頭先上網check咗呢排有咩戲

愛麗絲蒸發奇案小弟有啲興趣」

嵐嵐:「嘩我都想睇The Disappearance Of Alice Creed喎

最近喺香港上映

本身套嘢係上年㗎」

我:「原來個正名係咁

我唔知呀純粹見到個名有啲興趣





其實我想睇呢套多啲

不過愷情佢約先嘅就費事改」

嵐嵐:「體貼喎」

我:「講明先我就唔介意一個人睇嘅

不過我睇戲個地步又未去到一個人都會照去嗰種

所以都係算」

嵐嵐:「唔知幾時落架呢」

我:「你頭先係咪話你都想睇」

嵐嵐:「係呀」

我:「即刻跑依家出去睇」

嵐嵐:「痴線咁緊張做乜鬼」

我:「講笑啫，

幾時得閒約你一齊睇」

嵐嵐:「下

你講真㗎」

我:「梗係啦你以為講笑咩

你幾時得閒」

嵐嵐:「我聽日返學校補課

十二點半應該ok㗎喇」

我:「係喎你哋星期六返學校補課唔使著校服」

嵐嵐:「係呀，

所以補完之後應該得閒」

我:「好約實你

去apm睇

咁近」

嵐嵐:「咁我補完搵你」


唔知你哋睇緊嘅時候有冇發現

我好多時都係揀禮拜六出去，

係因為禮拜六玩完之後，

可以喺禮拜日休息返一日先再返學

去到禮拜六嗰日我就等嵐嵐柯打先出發

佢就話佢哋平時補課就準時放嘅，

咁就易夾時間

我費事喺學校等佢啦

佢話冇所謂係我自己唔鍾意啫，

畀人見到又話乜乜物物

我唔係介意人哋講乜而係覺得真係好煩

為免呢個情況出現

所以我哋約好咗喺apm等，

結果佢放咗學之後半個鐘以內已經嚟到apm

佢都係孭住個細袋笠咗件牛仔恤衫加條黑牛仔褲

我:「我以為你返學著到好撚暴露搞到籃球佬亂咁諗添」

嵐嵐:「你真係快啲去收皮呀

你梗係想啲女仔著得暴露啦變態佬」

我:「痴線亂屈」

嵐嵐:「買飛啦食屎狗」

我:「係嘅食屎狗」

我哋好彩喎，

好快已經有一場

嵐嵐:「使唔使買嘢去食

爆谷爆谷」

我:「其實我食得唔多不過要多啲嘢飲

水呀汽水就得㗎喇」

嵐嵐:「唔使食嘢呀淨係飲」

我:「屌爆谷到時你畀一兩舊我咪

我真係食得唔多，

反而嘢飲緊要啲囉」

嵐嵐:「你講㗎咋到時唔好話我虧待你

問咗你㗎」

我:「你估我係你咩秋後算帳」

嵐嵐:「痴線點會咁做

係喎趁呢個機會塞啲錢入你袋啦」

我:「做乜春」

嵐嵐:「同你遲啲同女神去睇戲吖嘛」

我:「有何高見呀」

嵐嵐:「其實冇嘅唔使刻意做咁多嘢

你上網咪成日見到啲人話又話要帶褸呀驚凍呀，

準備紙巾呀諸如此類嘅

咁其實都要睇下你約嗰個女仔係點㗎嘛

好似愷晴咁佢本身日日都有帶紙巾

可能你會問，

唔係喎咁如果佢拎起上嚟嗰陣冇會點呀

咁你都可以帶定

咁但係愷晴唔係傻㗎嘛

佢出門前會check咋嘛

至於褸嗰度，

佢又唔係第一次睇戲

又唔係第一次同你出街

你平時都冇帶褸嘅

無啦啦帶都唔係唔得，

不過有啲驚佢會覺得做多咗囉

你知你幾『鍾意』拎嘢出街㗎啦」

我:「聽你咁講我放心

紙巾我就不嬲自己都會帶嘅

不過係純粹for自己而唔係畀佢

褸就真係唔帶」

嵐嵐:「可能女仔睇野唔同

其實佢平時鍾意個男仔相處係因為自然

當然啦你約一個唔係咁熟嘅

準備呢啲嘢呢，

可能會令佢覺得你細心

咁但係如果熟嘅話又唔係第一次約，

有時你特登做多咗而佢同時又feel到

咁就會同佢期望有落差」

我:「幾撚pro果然係女仔」