[校園][純愛]《身旁的那一個》: 第六十二章

之後我哋喺尖沙咀行咗陣

跟住都返咗嚟，

呢程我哋喺巴士好無聊

我記得因為冇位坐

我同佢就喺地下揸住扶手啦，





之後撳電話

無啦啦見到佢WhatsApp我

跟住我又WhatsApp佢

冇㗎，

我哋講埋啲嘢係冇內容





打埋啲嘢都係無聊嘢

我都係第一次見到真人但係用WhatsApp溝通

之後打下打下又會變返我哋現實喺度傾計

我:「陣間送份嘢畀你」

嵐嵐:「送咩呀





尋晚你講auntie嗰啲提子」

我:「梗係唔係啦

我記得嘅生日禮物呀嘛」

嵐嵐:「你條友終於記得

咩刺激啟發到你」

我:「冇任何刺激

認真籌備啫」

嵐嵐:「係咪咁堅呀





講嚟聽下」

我:「落車你咪知囉」

嵐嵐:「搞到我都唔知係咩喎

係咪整蠱人㗎」

我:「痴線嘅點會

你咁大方激嬲你就唔好啦」

嵐嵐:「係呀係呀我都覺得自己幾大方」





我:「你知就好啦」

嵐嵐:「講開生日，

你知唔知愷晴幾時生日呀」

我:「唔知喎真係

冇問佢」

嵐嵐:「搞錯呀係咪鍾意人呀

咁都唔問」

我:「關事嘅咩」





嵐嵐:「唔關事嘅咩

你知唔知呀，

大把男仔呀好緊張自己鍾意個女仔嘅生日」

我:「可能係我對生日呢回事唔係好緊張啫

心諗屌咪又係咁

最緊要有得食朱古力蛋糕」

嵐嵐:「你真係好特別





唉唔識講」

我:「不過陣間嗰樣嘢真係有諗過

去到你就知㗎喇」

話說我屋企附近個商場就有間琴行嘅

又唔係話真係好近我屋企

我慢慢行嘅話都要成半個鐘，

同埋小弟細個係曾經學過鋼琴

大約一二年班左右

都學咗一兩年跟住放棄咗

個原因係因為教開我嗰個miss走咗

個miss好靚女㗎

好正呀坐佢隔離一齊彈琴

後尾唔記得咗咩原因離開

咁我都冇學啦

我同身邊好熟嗰啲有講過，

細個嘅時候有學過鋼琴

不過佢哋當我吹水

問心，

我依家仲識彈嘅

係咪好叻一定唔係

不過起碼都仲知道點樣睇譜

起碼會知道c大調音階係咩一回事

會知道鋼琴上邊一粒掣等於邊個音

利申先，

我喺呢度一定講得唔好有啲含糊嘅

甚至會講錯某啲嘢，

咁就唔好意思先

因為真係好耐冇接觸過，

如果大家睇唔明我頭先講乜嘅

我依家簡單啲講，

就係我識彈生日歌

我上網打生日歌琴譜

搵到之後我對住琴譜就識彈，

成件事就係咁啦

又咁啱呢間我有iphone

我尋晚已經影咗張生日歌琴譜嘅相，

基本上我唔使刻意去練

因為生日歌真係唔難

呢個就係我講嘅道具，

我:「帶你過嚟啦」

嵐嵐:「去呢度做咩呀」

我:「送一首好認真嘅生日歌畀你

自彈自唱」

嵐嵐:「下

你講笑呀話」

我:「呃你做乜

都話細個學過」

嵐嵐完全呆撚左

我:「我依家開始啦，

Happy birthday to you，

Happy birthday to you，

Happy birthday to you~，

祝你生日快樂，

唔好意思

遲咗兩個月嘅生日歌自彈自唱」

嵐嵐:「好勁呀痴線

多謝多謝多謝」

喺琴行我哋唔會講得咁大聲

但係我feel到佢嗰下好激動好開心

嵐嵐:「痴線架原來你冇吹水

真係識彈」

我:「呃你做乜」

嵐嵐:「好熟呀你

頭先嗰下上咗身好似第二個人

估唔到你可以咁型」

我:「生日歌輕鬆啦」

嵐嵐:「嘩真係好驚喜

好多謝你呀巫澤軒」

我:「你估我求其送禮物嘅咩

諗過度過㗎嘛大佬

又要冇乜人送過

又要知道你會鍾意，

真係諗過嚟㗎」

好彩臨時鳩噏到到原因啫

畀佢知道其實係唔記得咗

咁就柒到冇朋友

嵐嵐:「多謝，

你而家有電話

個鏡頭好過我嗰部呀，

用你部機影相」

跟住呢我同佢就坐喺鋼琴張凳上面影左張自拍

佢揸機，

嵐嵐:「好多謝你呀

冇諗過你會畀份咁嘅禮物我」

我:「呢啲嘢送一次㗎咋

下年做就唔驚喜㗎啦」

嵐嵐:「係呀頭先真係好surprise

我真係諗都冇諗過會咁」

依家回想返起，

其實佢都真係一個幾容易滿足嘅女仔

喺我眼中，

有人自彈自唱畀我聽就當係禮物嘅話，

我覺得係hea到爆

你話我衰都係咁講

估唔到佢係咁珍而重之，

我基本上好少見佢呢個反應

好亢奮，

唔怕同你哋講埋，

其實佢真係教識咗我好多嘢

原來好似佢呢種女仔，

鍾意嘅嘢要嘅嘢可能係好平凡，

你哋可以話佢戇居話佢傻，

有個男仔自彈自唱一首咁容易嘅生日歌，

佢竟然會咁感恩

最後佢仲用我部電話拍咗兩條片，

第一條係叫我好似頭先咁自彈自唱

第二條係淨係彈

跟住send畀佢，

佢仲講笑話好彩我依家有電話

覺得呢個係一個好好嘅memory

好想記錄呢一刻

冇問題嘅我咪照彈，

跟住send畀佢，

冇啦呢次之後我都冇乜點彈琴

個原因同我頭先講嘅一樣，

之後再做就唔surprise

我唔想因為我重覆做，

而破壞咗我今次呢個咁難忘嘅感覺

對佢對我嚟講都係，

相處係真係會相互關係

我見到佢咁鍾意咁開心，

其實都影響咗我

我都覺得好滿足，

即使我唔係好認真係籌備，

不過出到嚟個效果係喜出望外

原來有個人係會咁鍾意或者欣賞你做緊嘅嘢

呢段回憶對今日嘅佢就唔知啦

我希望佢仲係好似當日所講，

呢個對佢嚟講係一個好好嘅memory

對我就肯定係一個好好嘅回憶，

呢一點係無庸置疑嘅，

多得佢叫我影嗰兩條片

我先發覺原來以前嘅自己係會做啲咁嘅事，

或者彈琴方面唔夠爐火純青，

可能歌喉方面唔夠細膩光滑，

兩方面結合時唔算得心應手，

不過原來係可以好真摯咁打動到佢

點差都好，

身邊仍然仲有一位觀眾.