[校園][純愛]《身旁的那一個》: 第六十三章

講下講下，

其實都已經去到中五

返半年跟住就已經會考

所以返到去學校都唔敢玩嘢，

上堂就真係認真上





學校嗰陣都好撚多補課

基本上一個禮拜五日，

我可能只係得一日準時走

其他四日都要補課，

至於大家心目中嘅中學回憶





唔使問其中一樣肯定係上堂撳電話

靜靜雞望住同你WhatsApp緊嘅嗰個對象

之後大家有眼神交流，

好靦腆咁笑

之後繼續靜靜雞喺枱底WhatsApp





我同好多人傾過

大部分人都有呢啲片段

咁啱呢我就冇嘅

第一我傾嚟傾去都係嗰幾條友

佢哋又真係專心上堂嗰啲人

嗰陣真係feel到個重要性

我都聽得幾認真，

所以就冇頭先我講嗰啲片段出現囉





話說年年開學都選班會㗎啦，

不過我唔記得之前有冇講喇，

我哋上年選嗰個班會

今年係會原班人馬繼續

直至到會考之前，

所以呢就唔使選

壁報呀又或者其他雜項，





嗰啲嘢都係照做冇特別

之不過咁，

主席話讀書都要抖下氣㗎

所以佢諗住遲下搞返個班會活動

一直以嚟佢都用唔少時間

去維繫我哋呢班同學，

你見呢個故事開頭嗰章就知道喇

讀緊書嗰陣佢已經做開㗎喇





我哋嗰班讀書年代冇乜紛爭

會考之後各散東西又可以keep住，

其實真係多得佢

最後Miss Cheung即係我哋班主任，

佢都話可以喺班主任堂講下

有咩活動佢都想參加喎，

依家上堂就教書先咁樣





而嗰陣我哋班對呢個班主任好滿意嘅

有咩活動盡量都預埋佢

大前題係佢得閒嘅話，

有啲同學就好期待唔知去邊度玩

你哋睇呢個故一段時間都知㗎啦

我不嬲冇乜所謂，

唔好去啲好遠嘅地方乜撚嘢離島咁囉

其實咁已經得.


最後上班主任真係傾

大家傾下傾下，

最後決定去miss個屋苑

miss都話冇問題

佢可以喺會所book定房

類似party room咁樣

到時我哋班友仔可以打機唱歌傾計玩board game

原本話可以book埋燒嘢食

係我哋懶話唔想燒

先推卻咗呢個主意，

到時食咩咪叫外賣囉

都係嗰啲啦係咪先，

miss話如果身邊有朋友想上嚟而又係呢間學校嘅

都歡迎join埋一齊玩

不過大家都有共識，

今次係班會活動，

所以就唔會亂叫人嚟啦

包括Teresa男朋友，

一樣冇份嚟玩

之後miss無啦啦好感觸

就話好希望我哋呢半年可以頂住，

佢話佢都讀過書

都經歷過係咁補課嘅階段

明白一定係好辛苦，

所以佢都話我哋算係咁

又好希望我哋咁多個遲啲會返嚟探佢

考試成績高分低分係重要，

不過唔係致命性

高分唔使講啦，

條路好行好多，

最重要係低分嗰啲同學，

出咗成績之後點樣處理

用咩心態去行之後嘅路，

當時嘅我對於呢類說話真係聽唔明

不過去到今時今日，

畀歲月不經意洗禮過嘅我

就真係好感觸

的而且確，

我覺得唔同年紀嘅人都有能力去做任何嘢，

唔係取佢哋嘅天份佢哋嘅能力

最緊要真係個心態，

同埋對自己嘅信任，

可能係我錯覺啦，

我有個諗法係香港好多人都會因為受到其他人而動搖

無論嗰個人你識唔識，

同你熟唔熟都好，

佢講完某啲言論之後，

都會對你自己造成一個衝擊

所以我覺得心態真係好緊要，

讀書又好將來做嘢好，

私生活好甚至呢個社會都好，

唔會全部都十全十美啱晒你自己心水，

過程中一定有落差會有失望嘅時候，

我哋最需要做嘅就係調整自己嘅心態

好似以公開試為例，

miss講嗰啲說話，

我今時今日先徹徹底底明白佢講嘅訊息係乜嘢

喺度可以透露少少嘅，

我哋畢業之後，

有同呢位miss Cheung保持聯絡

故事之後可能會提及到嘅

的而且確回顧返我嘅中學生涯，

呢位miss都有製造過唔少回憶畀我，

我都好多謝佢

男人係咁㗎，

呢啲說話唔會公開對住當事人講

所以咁多位讀者真係唔好意思喇，

無啦啦喺度講咗咁多廢話.