[校園][純愛]《身旁的那一個》: 第六十一章

第二日我就同佢去咗尖沙咀K11

唔知點解我哋有好多活動都係喺尖沙咀呢個地方發生

學校嗰次硬性規定要參加嘅舞會啦

唱k嗰次啦，

之後就今次





呢間舖頭依家已經執咗㗎啦，

因為早幾年前經過K11已經唔見咗呢間舖頭

唔知佢去咗第二度開

定還是真係執咗笠

嵐嵐:「就喺呢度呀」





我:「嘩幾撚多嘢揀」

嵐嵐:「尋日死蠢唔記得提你，

其實你可以畀幅圖佢

等佢可以整一個屬於你嘅case咁囉」

我:「我求其得啦使鬼整呢啲嘢咩」





嵐嵐:「咁又係哈哈哈哈」

跟住喺度揀咗一輪，

見到有個幾靚

所以我就買咗喇，

其實個case唔係話好特別

都係有啲動物喺上面

個底色就係白色，

係咁㗎咋





之後諗住喺嗰度買mon貼

因為可以順便叫佢黐埋，

好死唔死嗰陣無啦啦有幾個人入咗嚟

咁個店主就梗係要serve其他客人啦

佢就叫我哋等陣，

處理完其他客人就會返嚟幫我哋黐

咁我哋費事等啦，





嵐嵐話佢幫我黐

所以我哋就走咗

喺商場求其搵個位坐低就黐mon貼

嵐嵐:「靚仔晒啦依家」

我:「今次堅係唔該晒」

嵐嵐:「唔係你估

仲話我衰」

我:「呢樣嘢真係好撚難」





嵐嵐:「知你手工野廢啦」

我:「上家政嗰度你都見識過啦」

嵐嵐:「我知呀

你整嗰啲嘢出嚟全部都肥佬

不過我又覺得幾搞笑喎」

我:「痴線我特登嘅咩」

嵐嵐:「就係認真做先搞笑」





我:「我記得我以前上家政嗰陣最期待就係煮嘢食嗰part」

嵐嵐:「咪就係囉搞到我好似你工人咁

淨係負責煮嘢畀你食」

我:「又係你自己話帶返屋企唔好食

叫我食埋佢，

而家話返我轉頭」

嵐嵐:「係呀其實好麻煩

熟食嘅話帶返屋企攤凍咗再叮返真係唔好食

有時整甜品嗰啲呢，

行返屋企冇得雪住又驚出事

所以都係搵條友喺學校搞掂咗佢就算」

我:「我就冇所謂呀最鍾意幫人執手尾」

嵐嵐:「得喇知你叻喇」

我:「唔怕同你講，

陣間帶你去一個地方

走嗰陣提一提我」

嵐嵐:「做咩事呀」

我:「到時你咪知囉」

嵐嵐:「懶神秘」

我:「你哋啲女仔鍾意驚喜丫嘛

即刻學到嘢喇」

嵐嵐:「犀利喎而家叻咗」

我:「多得你從旁指導啫」


其實我想做咩呢，

依家就可以講啦

唔知大家記唔記得喇，

嵐嵐其實係6月尾生日嘅

626好易記

今年佢生日呢，

我哋咁啱係試後活動

當日我記得係聽talk

所以朝早我淨係同佢講生日快樂就算啦

之後晏晝知道佢同班女仔friend一齊，

我就冇份去嘅

費事阻住佢哋班姊妹啦

同埋咁多年佢生日都唔會好高調咁搞

即係唔會特登開個party慶祝嗰種囉

我唔知你哋身邊嘅女性生日係點樣處理

我淨係講佢呢，

佢就真係好求其

生日正日同班女仔過啦

生日之後我同佢食咗餐飯，

仲要喺屋企附近

就係咁啦冇特別，

點知佢條友今年竟然學人追數

佢話我生日嗰陣呢

佢就送嗰隻企鵝仔畀我，

到佢生日我就冇表示

淨係請食飯

我心諗佢都前後矛盾嘅，

佢都講明有請食飯

咁又點算係冇表示呢

雖然餐飯唔係好貴

屌我哋呢講誠意㗎嘛係咪先

同埋我嗰次同愷晴去迪士尼嗰陣

咪買咗個盒畀佢

攞嚟裝化妝嘢呀洗面嘢嗰啲盒呢

我當時功虧一簣呀

就係唔記得講明係呢份生日禮物

畀咗個位佢入，

算啦好男不與女鬥

所以我嗰陣就話爭住先爭住先

有拖冇欠呀咁樣，

咁樣佢先肯放過我

跟住就冇咗件事

亦好好彩嘅係，

佢自己都冇提返呢件事

直至我係尋晚先醒起，

係喎

我仲未還禮畀佢添，

所以尋晚瞓覺

同埋今朝出嚟嗰陣我都係諗緊呢件事，

究竟送咩畀佢呢

因為買禮物真係好煩

佢又麻撚煩喎

又唔知鍾意啲乜

呢啲唔同一大班人嗰啲交換禮物party

可以亂咁買呀嘛

最慘就係冇規矩，

太多選擇咁先難

跟住我喺度諗唱生日歌都得唔得呢

你哋冇睇錯呀真係生日歌

第一，

我年年都冇唱畀佢聽

對佢嚟講都算新鮮

第二，

唔使講啦就一定係唔使錢

第三，

我可以避免到揀禮物呢個咁麻煩嘅過程

第四呢樣嘢我唔抗拒

種種原因結合埋，

唱生日歌真係冇得輸

當然啦我唔會就咁唱

我梗係需要一啲道具啦，

費事又話佢冇誠意呀唔撚鍾意呀乜乜物物

你知佢啦成日都嫌三嫌四

所以一定要搵道具幫手，

好彩去到最後都諗到，

如果我咁做，

你個鍾曉嵐都話冇誠意嘅

咁我真係唔知點喇.