【校園】【愛情】A0毒男的愛情史: 【日常2】

上完bio堂。

我：「唉，無端端多咗份抄書功課㗎。」

晴：「邊個叫你上堂唔專心聽先生講書。」

我：「明明你同魚蛋都有份傾計，點解受罪嘅只有我。」埋頭苦幹抄緊bio書。

到底係邊個弱智編輯發明bio書，每版都密密麻麻，啲字又水蛇春咁長，圖又多，到底想讀死邊個。





晴：「我有一邊聽書一邊傾計㗎。」啊晴拎住佢份精美notes喺我面前晃來晃去，激氣啊，點解我唔可以學女神一樣一心二用啫。

我：「…」硬擠出一個笑容繼續抄bio書。

好彩今日bio堂係一邊講下筆記一邊講下書啫，唔係嘅話抄到手殘都未完。

上堂放break抄下，小息抄下，轉堂又抄下，最正係今日第四、五堂有宗教堂，上堂抄到落堂，Miss Wong 都好體諒我，同佢講完要抄嘅範圍之後，佢都唔阻我繼續講聖經、教書。











我：「呼，終於都抄完喇。」我側頭僕低喺檯面，望住啊晴喺度冥想緊。

話咩祈禱用內心同上主對話，佢會聽到你嘅請求，我就抱著半信半疑嘅心態，雙眼閉上，誠心祈禱「主啊主，求下你令到呢段意外嘅關係變成真實，多謝。」重複咗三次。

我再次將開雙眼，乜事都冇發生，乜嘢聲都聽唔到，睇嚟上主冇聆聽到我嘅禱告。





「靠上主做咩呢，不如靠自己喇。」我暗道。

Miss Wong：「好~依家我哋打開雙眼~~諗下自己頭先嘅祈求~~係幫家人？朋友？自己？其實都唔緊要~~最緊要係上主會聽到~~不過佢唔會直接幫你~~要靠你自己領悟~~」Miss把聲勁溫柔，會有種處於極度放鬆嘅狀態，完全唔覺得自己其實係上緊堂。

我：「啊晴，你向呢個上主求咗啲咩？」

晴：「唔講得，講咗會唔靈。」

見啊晴唔肯講，我咪追問魚蛋。

我：「魚蛋，你又你向呢個上主求咗啲咩？」

魚蛋：「我求咗遲啲同曉彤女神表白個陣，一定會成功。」OKAY……睇嚟係個重度沉迷女神患者，同我不相伯仲。

魚蛋：「咁你呢，女朋友你又有喇，仲有啲咩要祈求啫。」





我聽到女朋友呢三個字不禁苦笑，呢段假嘅情侶關係，其實對自己嚟講只不過係個笑話「冇啊，一個好奢侈嘅祈禱啫，不過都希望有日會發生喇。」

魚蛋：「做百萬富翁？上市公司CEO？ 定係做二世祖？」

我：「全部都唔係啊，唔好問啦，講咗出嚟唔靈㗎。」

魚蛋：「咁我頭先……你仲問我。」

我：「一種傳說啫，唔使咁認真嘅。」

「我都想同汪芷晴真真正正咁喺埋一齊啊。」我用唇語講，一粒聲都冇發出嚟。











上緊第六堂癡線婆嘅中文堂，啊晴佢失驚無神嚇我一跳。

晴：「阿圓，一陣一齊去食飯？」

我：「吓…！？」我唔敢相信自己對耳仔。

晴：「唔係啊，叫埋你班兄弟佢哋啊，上次咪講過囉，靖欣佢想主動下。」

聽到靖欣個名之後，成件事都合理曬，咁的確一個女仔約另外一個平時冇咩交集嘅男仔單獨食飯，係傻嘅都知咩事啦，不過如果有多幾丁友咁去，起碼等個氣氛冇咁尷尬吖嘛。

我：「冇問題，我轉頭同佢哋兩個講。」





晴：「唔該你曬你啊。」







「林梓圓，答我，呢篇文作者點解要不斷提及先帝。」依家教緊出師表，我當然係冇聽書啦。

死火，點解提及先帝，我鬼知咩，求其吹下睇下啱唔啱囉。

我：「Er...因為劉禪又蠢又廢又無能，淨係識得靠諸葛亮，同佢講下自己老豆劉備以前幾咁威水，話唔定會令佢敬仰，搞到佢肯學下自己老豆咁治理國家，威下風，唔好再頹廢落去。」





癡線婆：「又錯唔曬，坐低。」

我：「哇，嚇死我，亂噏廿四都答得啱，睇嚟今日幾好彩。」我撫摸著自己心口鬆了一口氣，通常答錯就等死都嚟。

晴：「亂噏都答得啱，某程度上你都算得上係個天才。」

係啊，都算㗎，搗亂嗰陣同做埋曬啲古靈精怪嘢嘅時候就會變得特別天才，鬼主意特別多。

我：「唔好攞我嚟講笑啦。」

晴：「我講真㗎。」

我：「聽住先。」

話咁快就過咗一堂中文堂，唔知係咪因為有得同啊晴傾計嘅緣故，時間真係過得特別快。

我：「豪哥，食唔食飯啊。」

豪：「你條粉皮終於識得揾我哋喇咩，仲以為你真係有異性冇人性添。」

我：「講呢啲，仲有其他人㗎。」

豪：「其他人？」

我：「我哋班嘅偽娘娘們啊。」

豪：「頂你，揾我去湊數，算，識下朋友都冇壞。」

我：「咁我去問埋阿謙。」

謙：「收爹，死現充，現充撚，男人嘅恥辱，戀汪癖， 我不齒與你為伍。」

我：「食個飯啫，使唔使咁啊。」

謙：「躝啊，我去揾Sherman食飯。」

我：「啊晴，你嗰邊點啊。」

晴：「佢哋兩個都冇問題，你呢？」

我：「出咗啲意外少咗個force仔。」

晴：「咁點算啊，咪變咗五人行囉。」

呢刻我同啊晴電波都好似有共鳴：「魚蛋！」

好彩魚蛋仲未走，仲留得切佢，同佢講咗餐飯有曉彤姐出現，諗到冇諗就應承咗。

就係咁，六丁友，三男三女去咗食大家樂。

未完待續…………