【校園】【愛情】A0毒男的愛情史: 【日常3】
【最近越寫越怪，越嚟越唔知自己寫緊乜】
前往學校附近商場的路上。
她們美少女三人正在並列走在我們前方。
左面是張靖欣，中間是汪芷晴，右面是陳曉彤，她們有說有笑地走著。
我們三人跟隨其後，對這場莫名其妙的偽聯誼感到前所未有的期待感。
我看著眼前的啊晴一步一步走著，馬尾隨著步伐輕輕擺動，看得我非常入神。
豪：「喂，究竟發生咩事，點解會變成咁。」
我：「喔，識朋友吖嘛，你講嘅。」我笑道。
豪：「我頂你個肺啦，點睇都似係去聯誼。」
我：「放鬆喎，冇事嘅，食餐飯啫。」
豪：「咁你又冇講錯嘅，食餐飯啫，不過都應該幾尷，平時同佢哋又唔係好熟，無端端東湊西拼聚埋一枱，都唔知會發生咩事。」就係遲啲你會發生嘅愛情故事。
我望向處於左手方的魚蛋，他因為緊張，臉上的汗珠佈滿在他臉頰和額頭上，他還時不時用手腕抹乾淨。
我：「魚蛋，唔使咁緊張喎。」我嘗試緩解他的心情。
魚蛋：「你唔明啊。」你唔講我真係唔明嘅。
魚蛋：「今次係我第一次同曉彤女神食飯，我唔可以出任何差錯㗎。」唉，沉迷女神真的是一條不歸路，各位小心為上吧。
我：「嘩，使唔使咁誇張啊，食餐飯啫，又唔係要你去上戰場打仗。」
魚蛋：「依家情況仲嚴重過上戰場啊，點解你好似一臉輕鬆冇事㗎。」
我：「係你太誇張咋。」
魚蛋：「唔知啊，總之你依家唔好再騷擾我住，我唔想一陣有咩行差踏錯。」
我：「好，好，好，你加油啦吓...」
一眨眼的功夫，已經到底了大家樂門口。
彤：「我哋去揾位坐先，你就同我做咕哩排隊啦。」
我：「係嘅師傅，遵命。」還擺出了一個軍人行禮手勢。
彤：「你睇Whatsapp啦，轉頭我會send曬我哋三個要食咩㗎喇。」話語剛落曉彤姐就消失在我眼前。
當然排隊在我身後的魚蛋看得呆若木雞，畢竟我同曉彤姐喺課室連話都不會說上兩句，難以見得現在卻好像跟熟人一樣聊天。
魚蛋：「點解你會叫佢做師傅㗎，你兩個咩關係啊。」魚蛋雙手按著我肩膀不斷前後晃動。
我：「咁曉彤姐放學有份幫我手練陸運會，我咪叫佢師傅囉，表示尊重嘅稱呼啫。」
我：「同埋你唔好再搖我好冇，著緊校服㗎我哋，一陣又有街坊打去學校投訴話我哋影響人食飯，如果真係嘅第一個掉你出嚟祭旗。」
魚蛋：「呼，幾驚你同我爭女神，好彩啫。」魚蛋長歎鬆了一口氣。
我：「我心目中淨係得啊晴一個，已經容納唔到其他人㗎喇。」
魚蛋：「係喎，都唔記得你兩個拍緊拖添。」
聽到拍拖呢兩隻字不禁心酸，在外人眼中可能是非常羨慕，無緣無故追到個女神級同學，但對於我而言，每次聽到卻是一種無形的打擊。
我：「你都想拍拖嘅咪去追師傅囉。」
魚蛋：「我唔得㗎。」屌，我真係睇唔過眼。
我：「我問你吖，有冇睇Fhproduction啊。」
魚蛋：「FH啲咩？？咩嚟㗎？？？」
我：「熊仔頭啊！！」
魚蛋：「我未聽過喎。」
我：「頂你個...你跟住我讀呢句嘢出嚟。」
「冇人話你唔得，係你話你自己唔得。」
魚蛋：「冇人話你唔得，係你話你自己唔得。」
「邊個講㗎？」
我：「你唔好理，總之記住呢句說話就得。」
「然後懷住必敗嘅心情去追你女神啦。」
魚蛋：「頂你吖，得唔得㗎。」
「細路，唔好掛住謦欬好冇，你後面仲有人排隊㗎。」
我：「喔，Sorry，Sorry。」我連忙打開Whatsapp，幸好她們三人已經決定好。
我：「唔該，要個兩個一哥焗豬扒飯，一個芝士肉醬意粉，同埋一個粟米肉粒飯。」
「飲啲咩？」
我：「4個紅豆冰，唔該。」
「收你175蚊。」
我拎完飛就去咗揾啊晴。
睇吓佢哋搵位搵成點。
中午繁忙時期嘅大家樂一席難求，而有六人枱呢樣嘢簡直係奇跡。
我：「搞咩啊三位，有位點解都唔坐嘅？」
彤：「你係咪練傻埋個腦，咁都唔知？」
晴：「阿圓你係咪唔記得今餐飯嘅目的。」
欣：「喂呀，你兩個唔好再講喇，好怕醜啊。」
彤：「放心喎，呢個傻仔係同我哋一陣線，佢嚟幫你手㗎。」
欣：「真係嘅，多謝你啊。」
我：「唔使，舉手之勞啫。」反正我都有著數。
我：「咁點解有位都唔坐嘅？」我望住眼前嘅一張四人枱，隔兩張枱仲有張有兩個位嘅枱，心生疑惑地問。
彤：「你真係蠢唔係扮㗎喎，一陣我哋要靖欣同你老死坐，轉頭你老死坐埋嚟四人枱點算。」喔，原來係擔心呢樣嘢，咁簡單啦。
我：「唓，你驚呢樣嘢咋，好少事啫，一於包喺我身上。」
晴：「阿圓你有方法？」
我：「轉頭你咪知，你哋三個坐住先，轉頭張靖欣你記得自己執生。」簡單到一個點。
我交代完畢後就轉身去揾豪哥，同佢講咗三四句之後，我又翻去四人枱坐低。
好快佢哋兩個都拎完飛，之後揾到我哋。
我：「魚蛋，你過嚟陪我坐吖。」我向佢打眼色，表示佢女神曉彤會喺呢張枱到食飯。
魚蛋：「好啊，好啊，冇問題。」魚蛋連忙點頭，我嘅助攻，佢自然明白。
豪：「咁我坐邊呢？」
我：「靖欣姐，你介唔介意同阿豪哥坐啊？」
欣：「冇問題啊，如果佢唔介意嘅話。」可攻可退。
我：「就咁話啦，唔好意思喇兩位。」
彤：「幾醒喎。」
我：「使乜講。」
功成身退。
依家淨翻魚蛋，唔知佢呢餐飯會做啲咩呢。
目前座位編排，林梓圓vs汪芷晴。
魚蛋vs陳曉彤，丘君豪vs張靖欣。
而當中兩對有一個人都是懷有目的吃這餐飯。
不過搞手也是我和啊晴，也沒有什麼怨言。
現在回想起來也覺得很有趣。
我：「有號碼喇喎，我去拎餐先，啊晴，使唔使幫你拎埋。」
晴：「好啊，唔該你喇。」
我：「行多轉啫。」
彤：「徒弟，幫我拎埋啦。」
我：「師傅，你又唔係冇腳。」
彤：「唔拎就算，重色輕友，啊晴，睇住呢啲男人啊，通常都唔方好嘢，你小心啲。」 曉彤一手攬住啊晴膊頭，我也想成為你現在的位置啊，師傅。
晴：「哈哈~~」臉上小酒窩又再度出現。
魚蛋唔知係咪見到我呢個模板，也自發告勇地說：「我...我幫你...拎埋吖...」
曉彤姐應該估唔到魚蛋會咁講，聽到之後也呆住了，隨後回答：「咁又唔係幾好意思嘅。」
魚蛋：「唔係啊...係我...我想...幫你拎...」講嘢講到口震震咁，掂唔掂㗎魚蛋，溝女唔係咁玩㗎，仲要係溝女神，你咁樣實收好人卡啦。
我當下睇唔過眼：「師傅，你咪當係男仔嘅風度囉，畀個面人哋拎啦。」
彤：「你講到咁我都唔好意思拒絕，唔該你喇阿駿。」
我同魚蛋兩個慢步走向擺餐台。
我：「阿魚蛋兄，女唔係咁溝㗎，你把聲緊張到連我都聽得出啦。」
魚蛋：「咪真係咩！？不過頭先曉彤女神佢記得我個名啊，你有冇聽到啊，佢叫我阿駿啊！！」魚蛋對於被叫名異常興奮。
我：「唉，總之你盡量表現得自然啲，唔好當師傅係女神先，當佢係你朋友一齊食飯，你再好似頭先咁樣肯定會嚇親人㗎。」
魚蛋：「表現得自然啲，我盡力啦。」
拎餐盤返去個陣眼尾瞄到張靖欣同邱君豪謦得不亦樂乎，睇嚟個計劃幾成功。
我：「啊晴，睇佢哋兩個好似好有機會喎。」我放低啊晴盤芝士肉醬意粉。
晴：「咁就好喇，冇白費到心機。」啊晴飲咗一淡紅豆冰。
我：「祝佢哋成功啦。」我又行多轉去拎自己嘅一哥豬扒飯。
餐飯謦咗啲咩真係唔記得喇，都應該係講無聊嘢，先生壞話之類，總之就非常普通。
魚蛋嘅表現就......不堪入目，可能係因為太過緊張啦，成程飯都搭唔到嘴，魚蛋vs陳曉彤，呢對組可以稱得上失敗告終。
我：「豪哥佢哋兩個呢？」張靖欣同邱君豪消失咗。
晴：「係喎，去咗邊啊佢哋？」
我：「唔通係私奔逃學？」
彤：「你瞓醒未，進度邊有可能咁快。」
魚蛋：「你哋講緊乜嘢啊？」
我：「我講唔講得㗎？」我望向兩人。
彤：「應該都冇咩所謂嘅。」
我：「魚蛋兄，你千奇唔好亂咁講出去啊，其實呢場飯係有目的性㗎，我哋要成功湊合頭先嗰兩位，先至會有啲餐飯出現。」
魚蛋：「咁邊個鐘意邊個啊？」
我：「咁八卦嘅你，係張靖欣鐘意人。」
晴：「都差唔多係時候返學校喇。」
我：「咁行啦。」
返到課室仲有一陣小息時間嘅，邱君豪同張靖欣佢兩個有講有笑咁走入嚟。
嘿嘿，睇嚟發生咗啲嘢喎，等我去八卦下先。
佢哋兩個分開返埋位之後，我同啊晴見狀講好一人去問一個，睇下佢哋到底消失做咗啲咩。
我：「呢位同學， 依家唔係事必要你答，而係你必須要答，請問你頭先消失去咗邊，做咗啲咩呢。」
豪：「結他鋪，睇結他。」
另一邊廂。
晴：「靖欣，你哋兩個頭先去咗邊啊？」
欣：「結他鋪，睇結他。」
係做完偽檢控官審犯之後，我同啊晴返埋位喺度互相交換情報。
我：「照咁睇，我估豪哥都應該對張靖欣有少少好感。」小弟柯南上身。
晴：「何以見得呢。」
我：「就你所講同我聽返嚟嘅，佢哋兩個食完飯去睇結他，呢個舉動係我識咗豪哥咁多年都未見過嘅舉動，仲要係同女仔，佢向來行事不嬲都低調，好少會同人講佢會彈結他嘅事，就呢次事件，我覺得佢哋兩個非常有機會。」
晴：「嗯，靖欣都同我講佢哋頭先喺度一齊試結他，成件事好青春。」
我：「掂㗎喇啊晴，我相信如果咁樣繼續，不出一個月，佢兩個會有成果。」
晴：「哈哈，咁我喺度提早祝福佢哋先。」
未完待續…………