【校園】【愛情】A0毒男的愛情史: 【日常】
經歷一系列慘痛訓練，唔知係咪因為有拉筋嘅緣故，感覺雙腿緊繃程度已經減少，至少唔再需要拐杖行路。
不過為安全起見，我都係掛住佢哋喺背囊帶埋返學。
課室。
一如既往同啊晴傾下閒偈，之後又無端端畀阿曉彤姐鄙視。
喂，我追你姊妹女神啫，唔使鄙視我嘅，平時你都有堆二等兵圍住你轉啦。
雖然唔知靚女係咪諗法都特別唔同，佢哋雖然畀人稱為娘娘，但都會極力抵制收兵行為，啲身體接觸絕對唔會做多，傾計內容都係正經到一個點，所以大部分人都係只敢遠觀，從來都冇人真正夠膽行動過，所以佢哋仲係單身。
另一個就係張靖欣，唔知點解會鐘意咗自己老死，可能感情呢啲嘢只係講兩個字－感覺，有感覺就大曬 ; 冇感覺就係一攤地底泥，你做幾多嘢都唔會成功，永無翻身之日，好翻嚟先，講翻正題。
班主任節，無端端有個震撼消息衝擊我，依家我非常苦惱，雙手抱頭，完全想象到自己陸運會接下來嘅悲劇。
Paul：「學校唔知搞乜春天，琴日開會話15週年要玩大佢，同呢區學校一齊搞陸運會，係咪食飽太得閒冇嘢做，嗰日仲要冇糧出。」
「吓，即係比賽要同其他學校一齊爭冠軍？」
Paul：「咁又唔使，都係自己學校鬥，純粹係為咗搞個氣氛同熱鬧啲，你勁抽嘅咪去隔離學校溝下啲女同學囉，不過睇你滿肚肥腸都應該唔太會成功㗎喇。」
「吓，咁一齊搞嚟做咩呀？」
Paul：「咪話咗學校on99囉，冇嘢揾嘢嚟搞，無啦啦多多間學校，校長條粉皮，啲嘢又係留番畀我哋做，搵日真係諗方法去搶咗個校長佢個位嚟做。」阿先生，你咁爆粗得唔得㗎。
「撲哧……」勁多人啞然失笑，估唔到阿Paul講嘢咁mean，雖然平時都知佢玩得開，呢刻嘅感覺似係亦師亦友關係多啲，雖然平時都係友嘅部分佔多啲。
而阿Paul都意識到自己好似講錯嘢，就即刻補鑊：「我啱先乜都冇講過，咁多位收唔收到。」
Paul：「啞曬呀成班，應機啦。」
我：「係嘅阿sir，我哋成班頭先聾咗三秒。」
Paul：「一陣校長問責我就搵你哋所有人嚟祭旗，再秋後算帳一年，睇你哋夠唔夠膽死。」哇，呢個先生，講嘢真係精彩，不過都應該係亂噏，唔會認真嘅。
就係咁，我苦惱嘅事情就係呢樣，我望住份死人通告上面嘅學校名，一瞬間就諗到嗰一個人嘅樣－【冰女王】好死唔死同佢咁有緣，睇嚟我前世都真係做得幾多壞事。
「唔係掛，有冇咁橋呀，難得陸運會都要見到佢。」簡單講下同冰女王目前嘅關係先，自從上次捉完棋拎翻部手機，我部手機畀佢強行下載咗隻象棋online game，隨時隨地都可以捉餐飽。
開頭我都仲係無視佢嘅，邊得閒嘥時間陪佢顛，不過事情邊有咁簡單，一開始冰女王就信息轟炸，呢方面都冇咩事，我習慣封存人，所以唔會發出「叮叮叮叮叮」嘅煩人訊息聲，咁冰女王見唔奏效，使出電話攻勢，放假一時三刻打一次過嚟，某一日終於我都頂唔順，直接封鎖咗佢。
但係呢個女人唔可以用常理嚟進行判斷，佢竟然直接嚟我學校門口堵我，好似啲黑社會大佬接人放學咁，不過睇佢個身高，啲街坊仲以為係我接佢放學，我都唔想再拖拖拉拉落去，直接問佢想點。
冰：「你唔會唔知㗎。」知，我緊係知啦，你想我好似個奴隸咁，日日陪你捉棋吖嘛。
我：「阿冰女王，其實我好多嘢做㗎。」陸運會已經煩死我。
冰：「一日淨係捉一場，如果唔係我日日嚟你學校揾你，斷估你都唔想你女朋友誤會啦。」
我：「唉，好喇好喇，你自己講㗎，一日淨係捉一場，冇得反口。」我都唔想啊晴見到我同佢有咩誤會。
就係咁，我同冰女王開始咗呢個一日一場嘅地獄戰爭，不過其實上網捉棋都幾好玩，睇住各路神仙打架，都幾正。
完全非物理性嘅回憶篇完結，畫面翻去課室先。
晴：「你個樣做咩咁愁嘅。」
我：「頭先阿sir講嗰單嘢，嗰間學校有個我識得嘅麻煩友。」
晴：「唔通係之前喺學校門口揾你嗰個女仔？」
我：「啊晴你咁聰明嘅，唉，條友肯定帶埋副棋過嚟，發曬癲咁揾我捉，我唔想成個充滿熱血同汗水嘅陸運會變成文靜捉棋遊戲。」
晴：「哈哈，你啲比喻咁奇怪嘅。」
魚蛋，都幫佢整翻個名算，喺坐喺我整前面嘅一位肥仔，為人溫和，待人有禮，好人兩個字概括得了，只不過個樣生得有少少猥瑣，同埋講嘢太生硬，搞到冇咩女同學肯同佢傾計。
魚蛋：「我會唔會喺呢次陸運會遇到我嘅真命天女呢。」OKAY……不予置評……
我：「會嘅，魚蛋兄，話唔定隔離學校有人識得欣賞你嘅內在美呢。」
魚蛋：「算啦，呢個社會外貌協會嚟，冇人會睇內在美㗎喇，我呢啲咁嘅肥仔，都係算吧啦。」講講下佢都眼濕濕，你唔好真係喊啊。
只不過咁，如果真係由小學到中學最後一日都要做單身寡佬，都真係幾傷心。
晴：「唔會嘅，女仔揀對象嗰陣都通常會從啲小細節入手，例如係夠唔夠細心啦，識唔識得尊重人啦，總知有好多方面因素，唔會淨係單方面睇樣咁簡單嘅，不過通常有樣合眼緣都會加分嘅。」啊晴，你係咪講畀我聽㗎？
魚蛋：「女……女神啊……！」
晴：「魚蛋你又唔使咁誇張，我只係好客觀咁分析你聽啫。」
我：「係囉魚蛋，你仲有希望嘅，肥肥地好有安全感㗎，琴日上高登睇到個post話啲女仔鐘意有少少肚腩嘅男仔。」講出嚟我都想笑。
魚蛋：「真……真係嘅。」
我：「珍珠都冇咁真，你依家有冇目標先。」
魚蛋：「其…實，我有目標。」
晴：「真係嘅！？邊個嚟㗎？邊個嚟㗎？呢班嘅？我哋識唔識㗎？」
我：「識你咁耐都未聽你講過，邊個啊？」
魚蛋：「好尷尬，我唔想講。」
晴：「唔緊要啦，我哋兩個會守口如瓶㗎喇， 再唔係幫你諗埋計仔追女仔。」
我：「…」我點頭示意。
魚蛋：「其實係XYZ……」
晴：「你講真㗎！？呢個真係有少少難度。」
我：「呢個人情緒變化程度極唔穩定， 要幫你真係用少啲腦都唔得。」
魚蛋：「你兩個千祈唔好講出去呀。」
我：「但係點解會係曉彤姐嘅？」
魚蛋：「咁故事就要翻去上年，有一日放學落鬼死咁大雨，咁啱嗰日朝早我又唔記得睇天氣預報，所以冇帶遮，就係呢個時候，曉彤女神佢出現咗，佢唔介意同我一齊擔遮返屋企，咁因為佢唔係住喺呢區，佢上咗車之後仲借埋把遮畀我，就係咁，我鐘意咗呢個女仔。」
不過等陣先，點解魚蛋所講嘅曉彤，同我所認識嘅曉彤咁大出入嘅？曉彤姐，身高165，體重正常，頭髮中長及肩 ，因為係田徑隊所以身材fit爆，話係女神都不足為奇，但係呢幾日之下相處後性格方面就……
我：「借把遮畀你，咁樣你就鐘意人，有冇咁簡單啊。」
魚蛋：「你最近唔係同女神行得好埋㗎咩，可唔可以幫下我。」
我：「我真係唔知，同阿曉彤姐同班三年啫，但係最近先開始傾得埋，你問啊晴啦，佢哋做姊妹嘅，應該對你女神熟悉啲。」冇錯，我冇講大話，真係最近先開始熟，拋波畀啊晴算。
魚蛋：「芷晴女神，可唔可以拯救下我。」
啊晴見狀都唔好意思拒絕：「你想知啲咩。」
魚蛋：「就興趣佢嘅入手先啦，等陣我拎本新筆記寫低佢先。」
我：「使唔使咁誇張呀。」其實真係要。
晴：「阿彤佢鐘意啲鐘意做運動嘅……最緊要有禮貌同細心……」
魚蛋：「鐘意運動，有禮貌，細心，仲有冇其他？」
晴：「其他就係……佢鐘意五月天啲歌，鐘意食甜品，尤其係去市區嗰條分叉路左手面嗰間餐廳。」
魚蛋：「五月天啲歌，仲有甜品……多謝你啊，我覺得人生充滿希望啊依家，我返屋企即刻聽曬五月天啲歌佢。」
晴：「你加油啦。」
我唔想魚蛋咁快就絕望，其實我估都估到曉彤姐唔會接受佢，所以唔敢出聲講，就喺本簿上面寫字畀啊晴睇「你覺得魚蛋會唔會成功？」
「唔知㗎，試下都冇壞 」(≧ω≦)
「我驚佢期望越大，失望越大 」(⊙︿⊙)
「你咁講，即係覺得冇可能啦」(ー_ー)!!
「我只係好客觀分析成功率」=,=
我仲準備繼續寫個陣，無端端有「啪」一聲，喺從我側面傳嚟，先生佢一隻手拍落我檯面。
先生：「傾得好開心呢，我上咁耐堂你就傾足咁耐。」
我：「唔係啊先生，我頭先有幾秒唔係用把口傾，係用手寫㗎。」駁嘴。
「撲哧~」啊晴佢喺隔離忍唔住揞嘴笑，接著講咗句唔好意思就畀人原諒咗。
先生：「即係唔專心啦，同我抄曬今日教嗰幾頁bio書，放學之前交上嚟。」
我：「唔係掛……咁大鑊，我……」
先生：「你係咪仲想預習埋下個chapter，我唔介意收多一份。」
我：「我……今日放學之前交畀你。」
先生：「坐番低上堂。」
意外添加一份額外功課。
未完待續…………