《愛在。貴族學園》: Ch 30 ~ 思念（下） Part 4

Ch 30 ~ 思念（下） Part 4（連載日期：2024/10/20）

「係啦，你地兩個頭先做咩見小喬出完去返嚟之後，就一直癡住人地啊？乜你地唔見小喬佢個樣好困擾、好難為情咖咩？」

而喺呢個時候，韻喬就配合俊軒嘅氣勢，個人就稍為向後退，改為企喺俊軒後面少少嘅位置，就好似要俊軒保護自己咁。

子豪同道明對於俊軒突然之間對佢地惡言相向，表示非常奇怪，因為兩個根本就唔知道，俊軒同韻喬拍緊拖。

不過，口水戰嘅嘢當然唔可以一開始就認輸，於是子豪用一個少少寸嘅口吻去回應俊軒……





「喂林俊軒，小喬佢又唔係你嘅邊個，大家都係同學嘅關係，你又有咩權去介入甚至阻止小喬佢同邊個同學傾計呢？」此時俊軒喺聽到之後，塊面已經將所有不滿寫咗上去，班房裏面嘅氣氛突然之間變得有少少緊張。

但係韻喬就覺得，眼前保護自己嘅俊軒好有型，不但深深咁吸引住自己，而且都感受到俊軒對自己嘅愛同真心，絕對唔同之前同其他女同學相處嘅時候，嗰種輕佻嘅player性格。

不過，為咗解決當前嘅尷尬局面，於是韻喬就用講笑話去化解…

「小軒呀，你尋日係咪同auntie去咗新界啲果園度呢，參加任食生果嚟呀？點解我依家喺你身上，聞到很大陣嘅酸味咁嘅？」
 
「講！你尋日係咪喺屋企，自私咁食咗好多提子，所以酸到依家隔咗一晚，你個身都仲有陣味喺個身度啊？！」之後韻喬就故意用手掩住自己個嘴，同時喺到望住俊軒甜笑。





「你喺度講咩呀小喬，咩嘢去果園自私食提子呀？」因為時間實在太早嘅關係，俊軒一時之間都load唔到韻喬嘅意思。

韻喬就繼續不停咁喺度笑，而且都用眼神喺度話自己男朋友好蠢。
 
不過，反應再遲鈍都會有反應，一聽到“提子”兩個字嘅時候，俊軒就成個人都好緊張....

「小……小喬呀，其實依家都已經冬天啦，邊度會有果園有任摘提子呀？而且我邊……邊度有提子你同其他男同學傾計呢？！」

而喺呢個時候，道明都發覺俊軒同韻喬之間嘅眼神有少少唔對路，覺得俊軒同韻喬應該有啲嘢，於是就試探性咁問...





「林俊軒，你自己都認咗你冇權去管住小喬啦，咁你就唔好阻住我同子豪啦。不過林俊軒啊，你唔係以為小喬真係會鍾意咗你呢個全校都知嘅花心player啊嘛？」

俊軒同韻喬聽到道明咁講，之後就好有默契咁一齊相望對方一下，然後呢對小情人就喺衆人面前好幸福咁甜笑，再進一步韻喬都輕輕咁，用手指尾拖住俊軒嘅手指。

道明對於俊軒同韻喬兩個之間嘅眼神接觸，以及韻喬嘅小動作，就知道眼前呢兩個人嘅關係，已經提升到情侶嘅等級，於是就再問...

「喂！咪住先，你地兩個……唔會係講真咖嘛！？你地兩個……依家真係拍緊拖？！」兩個人聽到之後就同時點點頭承認。
 
子豪見到之後有少少難以置信，不過都講咗句「咁恭喜你地兩個啦，咁我地都係唔阻住你同小喬啦，祝你地兩個幸福啦！」然後就當佢準備拉走道明嘅時候，俊軒就好大方咁講咗句...

「多謝你地先，不過唔都緊要啦，其實可以好似平時咁相處就得。只係我希望其他人唔好再flirt小喬就可以啦，雖然佢今日又真係好靚嘅哈哈。」
 
但係，道明同子豪冇再答到俊軒，就自己行返埋位。而喺見到俊軒能夠如此大體咁處理之後，韻喬内心對俊軒嘅好感度都增加咗，然後兩個人對望一眼之後，就一齊行番埋位。

當然，5A嘅其他同學，喺得知俊軒同韻喬真係拍拖之後，都即刻望住呢對金童玉女。





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer