《愛在。貴族學園》: Ch 30 ~ 思念（下） Part 3

Ch 30 ~ 思念（下） Part 3（連載日期：2024/09/21）

而喺韻喬返到學校之後，果然就如同自己喺車上估計一樣，所到之處都有比平時更多嘅男同學望住自己。

至於其他女同學，部分對於韻喬今日靚到dum一聲嘅外貌，都表示非常提子，甚至係直接喺面上表示極度不滿，認為自己已經畀韻喬呢個公認嘅超級校花比下去。

而當韻喬踏入5A班房嘅時候，一衆同班同學都對呢位“女神”投以注目禮。不過韻喬喺返到班房之後，韻喬並冇即刻喺自己位度坐低，而係先跑去洗手間同去水機斟水。但就喺韻喬去咗洗手間嘅時候，俊軒都番到5A班房。
 
而番到班房第一件事，俊軒就係要將尋晚喺金鐘太古廣場，買畀韻喬嘅戒指收好，同時要確保戒指可以避免由韻喬嘅角度見到，之後俊軒就將一包喺小食部買嘅朱古力奶，放喺韻喬嘅枱面上。





整過過程，其他嘅同學當然都有見到，但係，佢地都估唔到，之後嘅發展會咁戲劇性。
 
再過多兩分鐘，韻喬都去完洗手間，一踏入門口，就即刻畀兩個同班嘅男同學截停「啊！做咩啊你地兩個？無端端塞住個門口都有嘅？」

「咦早晨呀小喬，今日嘅你好似幾好睇喎！而且……你做咩今日放長頭髮落嚟，唔扎返平時條馬尾嘅？」第一個男同學道。
 
佢叫做許子豪，其實都係D有錢仔嚟，不過相對於俊軒，子豪喺韻喬心目中就顯得非常平凡，所以同俊軒、韻喬佢地一直就只有點頭之交，最多都係一大班人喺度嘅時候，問韻喬或者俊軒功課。

另一個叫龐道明嘅男同學接住口講「係囉子豪，小喬啊，你平時行出嚟都已經夠哂靚咖啦，今日放埋個頭髮落嚟，簡直就係錦上添花呀！」
 




「不過，點解你今日無啦啦會放頭髮嘅？唔通小喬你依家……有男朋友？定係已經有鍾意嘅人，諗住畀個surprise畀佢啊？」

面對連續兩位男同學不帶好意嘅關照，韻喬就顯得不知所措，紅都面哂又好無辜咁樣。
 
不過呢個時候，喺位嘅俊軒見到韻喬好尷尬，於是就穿過人群，走過去班房門口幫韻喬解圍。

俊軒本來對於同班同學，咁樣調戲韻喬而有少少嬲。

不過，當見到自己個女朋友，着住校服放下長髮個女神狀態之後，俊軒就帶有少少驚訝，然後就好幸福咁甜笑起嚟。





俊軒於是就面紅紅，再含情脈脈咁望住韻喬講「早晨呀小喬！」「早晨呀小軒！」

「喬喬你今日好好睇喎！而且你做咩將你把長到落腰嘅頭髮放咗落嚟嘅？嘿嘿嘿！唔通，連小喬你……今日都想畀個驚喜我呀？」

面對男朋友嘅正面評價，再加上畀俊軒發現自己嘅心思，韻喬塊面比起頭先就更加紅，於是就好怕醜又好細聲講...

「哦，都冇咩驚唔驚喜嘅，就係唔知點解……今朝起身嗰陣，突然之間有呢個想法，於是……於是就放頭髮返學囉！」
 
「哎呀好怕醜呀，唔好再問啦。咁……我今日好唔好睇呀小軒？」韻喬少有地扭扭擰擰咁問俊軒。

而就喺呢個時候，好姐妹天殷都返到嚟班房，但係知道内情嘅佢就冇理到呢班人，而係自己番埋位坐低先。

「傻瓜，頭先咪話咗好睇囉！」俊軒用非常溫柔嘅聲線同韻喬講。不過好快，俊軒就發現道明同子豪，好唔識死咁仲喺度食花生，而且對於頭先兩位男同學調戲韻喬嘅行為，表示非常唔耐煩，於是就話……

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer