《愛在。貴族學園》: Ch 30 ~ 思念（下） Part 1

Ch 30 ~ 思念（下） Part 1（連載日期：2024/08/10）

「鈴鈴鈴鈴…….」好快就去到第二日嘅朝早，鬧鐘發出吵鬧但清脆聲音，正要提示住啱啱開始拍拖嘅韻喬，又要起身準備返學。

而韻喬喺聽到鬧鐘響之後，先喺床上邊伸一伸懶腰之後，就第一時間跑去書枱邊，然後撳一撳個電話，就見到尋晚俊軒喺臨訓之前，傳畀自己嘅signal訊息。

韻喬睇完就露出嫣然一笑，然後再拎起電話，覆男朋友前一晚嘅signal。

不過，因為前一晚俊軒唔記得打電話畀自己嘅關係，所以又到韻喬開始“御夫”嘅時間，喺Signal裏面扮哂嬲咁話：
 




「5A張韻喬：早晨呀小軒！你個衰人尋晚去左邊(紅面嬲爆emoji)！？     06:30」
「5A張韻喬：係咪依家啲人一追到人呢，就唔使理個女朋友咖啦！？         06:30」
「5A張韻喬：我唔理你之後會點做呀！總之我要你今日氹番我！如果唔係我就唔睬你個衰人啊！哼！         06:31」
 
喺打完上面堆字之後，韻喬就離開自己嘅睡房，去洗手間沖涼同刷牙洗面。

當韻喬吹乾個頭之後，腦海裏面突然跑出一個想法「嘻嘻，今日不如……都畀小軒一個小驚喜都好喎！」

韻喬對住鏡裏面嘅自己講之後，就好似平時咁將内衣褲同校裙慢慢着上，再化上一個好淡嘅base做打底。
 




不過，因為尋晚等俊軒電話等得太夜嘅關係，搞到韻喬唔係好夠訓，所以今日韻喬嘅面上，就多咗一對熊貓眼喺度，就算上咗base都好容易見到「呀！點算呀？對熊貓眼就算用base都遮唔到！咁小軒咪見到囉？」

但係，韻喬好快又同自己講「唔係喎，如果我對熊貓眼，畀個衰人見到嘅話，佢咪會後悔點解唔早啲打畀我，要我等到咁夜再生對熊貓眼出嚟？嘿嘿嘿，就等俊軒見到啦！」

於是韻喬就冇再處理對熊貓眼，由得係塊面都先，最多都係等返學校先再處理。
 
不過，之所以話韻喬想搞小小驚喜畀俊軒，就係今日韻喬喺梳完頭之後，就決定唔搵髮圈，扎住自己把長頭髮，而係用髮夾仔夾一夾啲頭髮，凝造出一種少少曲髮嘅效果，而頭髮都散落喺自己膊頭度。當然，有一少部分就搭喺前面，其他都去哂後面。

果然，相畀起平時，今日唔綁馬尾嘅韻喬，整個人就顯得更加有仙氣，更加美艷動人。所以韻喬見到效果之後，就覺得非常滿意，然後再同自己講話...





「原來我放頭髮落嚟，配返條校裙都幾好睇咖喎嘻嘻。唔知小軒個衰佬，一陣間喺返到學校見到我之後，會有咩反應呢？」
 
韻喬於是就暗自喺度偷笑。既然覺得咁滿意，韻喬於是就喺睡房裏面嘅連身鏡度，自拍幾張放頭髮落嚟嘅相。喺自拍之後，韻喬就即刻將張相send去天殷度。天殷見到之後，好快就回韻喬：
 
「5A李天殷：嘩！喬喬你…….你今日咁樣放把長頭髮落嚟……咁靚女得唔得咖！？連我都畀你呢個樣，深深咁吸引住呀！！(色咪咪emoji)              07:03」

「5A張韻喬：有冇咁誇張呀你？！你自己平時啲仙氣啊，都會搞到隔離班同堆低form都走上嚟睇你喎，唔係你誇張啲咩？呀李天殷大小姐？          07:03」
 
此時韻喬其實已經出咗門口，喺買完早餐之後，就去英皇道嘅巴士站等巴士返學。喺一路上，唔少路人都有望過韻喬。

雖然搞到自己周身唔聚財，但至少喺視覺上，韻喬今日嘅外表，就收到一個非常好嘅效果。所以喺韻喬嘅心裏面，其實正喺度暗爽中。
 
而同時間，天殷喺Signal裏面都繼續同韻喬嘅對話……

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer