《愛在。貴族學園》: Ch 29 ~ 思念（上） Part 8

Ch 29 ~ 思念（上） Part 8（連載日期：2024/07/27）

就當俊軒打完呢幾句嘅時候，天殷嘅chatroom裏面，居然出現”輸入中……”字眼，於是俊軒就再補多句
 
「5A林俊軒：殷殷乜你……咁夜都仲未訓咩嘅？       01:00」

「5A李天殷：林俊軒！你個死人頭你仲好講！咪就係要等你呢個衰人解釋，所以先會等到咁夜囉！！       01:00」
「5A李天殷：你唔解釋清楚嘅話，我就當你蝦小喬咖！哼！           01:01」

「5A林俊軒：哎呀殷殷呀！我真係傾到唔知時間呀，我都覺得我媽好煩呀！        01:01」




「5A林俊軒：而且聽日嘅quiz我都仲未溫呀頂！都唔知幾點鐘先有得訓呀 ！        01:02」

「5A李天殷：我唔理你啦！總之你聽日返到班房，你自己同你女朋友解話啦！早抖！        01:02」

「5A林俊軒：我會啦，聽日番學見。btw，呢排真係多謝你同禮謙陪我胡鬧啦！之後一定會再請你同謙謙食飯                  01:03」

「5A李天殷：我聽住先啦！都唔知你幾時先會請！       01:03」
「5A李天殷：係咁先啦！我好眼訓呀！聽日先再講啦！晚安！       01:04」天殷講完之後，就真係冇再上線。
 
而喺呢個時候，俊軒仲要睇埋來自嘉惠嘅訊息。不過俊軒一打開，就發現今次不得了，甚至可以話用驚嚇嚟形容。





因為萬萬都估唔到，嘉惠傳畀俊軒嘅，全部好多都係性感照片，當中包括有一啲着住校服、私服擺出非常誘人嘅姿勢。

甚至再進一步，有清涼嘅bikini同内衣照。就喺呢堆令俊軒血脈沸騰嘅相片之下，嘉惠都留咗一堆文字畀俊軒：
 
「5A黃嘉惠：親愛嘅軒軒，唔知道你鐘唔鍾意你老婆我嘅相呢？     23:45」
「5A黃嘉惠：嗱！講明先呀，呢堆相得老公你一個先有咖咋，比你夜晚自己用嘻嘻(魔鬼奸笑emoji)！！希望你鍾意啦。            23:45」
「5A黃嘉惠：軒軒老公，我好掛住你呀！我好想你打電話畀我陪我訓呀！  23:46」
「5A黃嘉惠：腦公，你係咪唔得閒呀？嗚嗚嗚！        00:10」
「5A黃嘉惠：如果你忙嘅有時間就覆我啦！聽日返學見啦！I Love you        00:10」





俊軒其實平時都唔會唔覆人signal，正如雖然已經咁夜都好，俊軒都有去回覆天殷嘅signal。
 
不過，雖然嘉惠堆相如果畀普通男仔睇到嘅話，生理上點都會有反應。

但既然俊軒嘅心無論如何都唔屬於嘉惠，所以俊軒反而覺得呢堆相好嘔心，於是俊軒都二話不說，直接喺電話上面，刪除同嘉惠嘅呢段對話紀錄，然後直接上床休息，結束漫長但係又值得紀念嘅一日。

當然，俊軒喺床上面，諗到自己終於都可以同自己心中嘅女神-張韻喬-喺埋一齊之後，心裏面再一次都感受到無比嘅激動，哪怕就算只可以同韻喬一齊兩個星期都好，都叫做有同自己鍾意嘅人一齊過。

但係，俊軒心裏面除咗要解決嘉惠嘅問題之外，眼前劉家嘅事有需要自己去幫手留意韻喬，當俊軒意識到如果真係有恐怖事發生嘅時候，大家微妙嘅角色轉變，或者都對將來有好大影響。不過眼前最需要處理嘅，就係要點樣氹返韻喬啦！

因為俊軒一個唔小心，就將一個唔理女朋友嘅罪名扣上自己度，甚至已經閙到天殷度。

雖然俊軒之前都有唔少次激嬲過韻喬，但係喺一齊之後，韻喬要嬲俊軒嘅話，都真係好似理所當然咁，似乎都畀之前更加難搞，結果俊軒就算再攰，都要好耐先訓得着。





（Ch 29  思念（上） ~ 完）

IG link https://instagram.com/bear_big_big_writer 
Threads https://www.threads.net/@bear_big_big_writer