《愛在。貴族學園》: Ch 29 ~ 思念（上） Part 5

Ch 29 ~ 思念（上） Part 5（連載日期：2024/06/02）

「點…點解會咁？佳澄小姐居然被懷疑唔係劉家千金？！」
 
林太估計到俊軒會有呢個反應，所以都點點頭講話「而劉auntie之所以會懷疑，就係因為當日你女朋友張小姐嘅出現……」

「你話我同小喬出現？關事咩媽媽？我唔明！」林太見到俊軒更加緊張嘅反應之後，就開始解釋成件事…

「因為當日劉家喺見完你同張小姐之後，劉太就覺得張小姐喺好多方面，都同年輕時嘅劉auntie好相似，包括身型、輪廓，以及眼神，都好相似…」
 




「所以之後劉auntie就同劉uncle講，但劉生初時都冇懷疑之餘，仲話劉auntie自己多疑，甚至唔抵得張小姐比自己靚...」

「本來劉auntie之後都冇再諗咩嘢，但直到劉uncle最近一次body check嘅時候，就發生咗一件樸索迷離嘅事。」
 
俊軒聽到呢度，已經完全冇任何反應，只係由得林太繼續講落去...

「當日劉uncle喺公司開會期間，突然喺大家面前暈倒，於是畀救護車送入醫院急症室，經過簡單治療之後就出院。但當時急症室嘅醫生，建議劉uncle喺出院之後，去做一次詳細身體檢查。」
 
「下，我唔明喎媽媽，劉uncle自己身體出現問題，咁關我地屋企同埋小喬咩事先得咖？」俊軒已經聽到一臉懵剩剩咁，所以都忍唔住打斷媽媽嘅說話，但係...





「林俊軒，你都係冷靜少少咁，聽埋媽媽講先得唔得？」林太有少少不滿咁講，所以都唯有聽埋落去。
 
「劉uncle嘅驗身報告指出，因為劉uncle長期勞累嘅關係，劉Uncle個肝出咗問題，需要動手術去治療。小軒你都應該知道進行肝手術，係需要近親以及血型相符先可以。」俊軒於是就點點頭同意林太嘅說話，而林太就繼續解釋落去。
 
「不過，就喺驗血嘅過程之中，報告結果意外發現到佳澄小姐，居然同劉uncle同劉auntie嘅血型完全唔同。」

「雖然劉uncle冇即時換肝嘅需要，但因為血型唔同嘅關係，佳澄將來都冇機會救到佢爸爸。但呢個都唔係重點。」
 
「重點就係，如果之後份驗血報告係真實無誤嘅話，佳澄小姐就好大機會，根本就唔係劉家嘅千金。真正嘅劉家千金，可謂真係另有其人。」





「而劉auntie所懷疑嘅人，就係你個女朋友，張小姐。」
 
俊軒聽到之後用手掩住自己個嘴，表示不敢相信「媽媽你嘅意思係，小喬可能先至係真正嘅劉家千金？但小喬同佳澄小姐兩個有咩關係先？而且劉家有冇提出證據去證明佢地嘅推論係真嘅先得咖？」
 
「暫時就未有，依家劉家正安排佳澄小姐，稍後時間做DNA親子鑒定測試，搞清楚到底佳澄同劉家有冇血緣關係先……」林太回答俊軒...

「如果最後證實，佳澄小姐唔係劉家千金，劉家到時候就可能會去佳澄出世嘅醫院，搵返醫療記錄去查，睇下到底當時發生咩事。」
 
「不過其實，依家劉家仲等緊化驗結果，所以小軒你可以唔洗太過上心住。如果最後真係有咩重大發現嘅話，我就會話你知。」

「係啦，小軒呀，呢度就係劉家幅相，裏面三個人其實你都識嘅。唔知你有冇發覺，佳澄小姐同埋劉uncle劉auntie，個樣其實真係唔太似？」林太就將一張劉家嘅相，交到俊軒手上。
 
俊軒喺拎住劉家全家幅細閱嘅時候，突然醒起之前喺韻喬屋企，曾經見過張家嘅全家幅。

當時俊軒都已經覺得奇怪，點解韻喬同張生張太個樣唔太似。





不過因為俊軒冇嗰張相喺身嘅關係，所以俊軒都冇同林太講起呢件事「係就係有少少唔似嘅，不過依家都係等佢地嘅DNA報告出咗先算啦，依家我地屋企都幫唔到劉家太多嘢。」

同之前唔同，今次俊軒好冷靜咁同林太講。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer