《愛在。貴族學園》: Ch 29 ~ 思念（上） Part 4

Ch 29 ~ 思念（上） Part 4（連載日期：2024/05/25）

「定係其實……小軒去咗買嘢畀嘉惠同學，準備訂婚禮嘅嘢？」
 
一諗到嘉惠，韻喬就即刻記起下晝喺瑪麗醫院嘅時候，林太打電話嚟同俊軒講，話要同嘉惠訂婚嘅事，韻喬然後又開始唔開心，又一次好似頭先喺洗手間嘅時候，喺度埋怨自己點解咁遲先意識到，自己鍾意俊軒。
 
但係好快，韻喬都調適好自己嘅心情，因為自己曾經喺開始嘅時候，應承咗俊軒，呢兩個禮拜都要好好咁愛對方。

所以韻喬選擇再一次向正面去看待嘉惠嘅事，因為覺得自己應該要信任自己個男朋友，先係愛對方嘅表現。
 




「定其實會唔會小軒只係同屋企人出去買嘢，所以依家先會唔方便同我講電話呢？定係其實……小軒係出去買嘢畀我呢？」之後韻喬嘅嘴角再一次向上揚，露出幸福嘅微笑。
 
「咦，本書嘅字全部翻番嚟啦喎！哈哈！果然係因為自己太掛住個衰人，所以堆字先會唔見哂咋！」韻喬之所以咁講，係因為喺同俊軒收線之後，本書嘅課文重新出現，而唔再係林俊軒個樣。
 
不過，到底係因為自己太掛住俊軒，定其實有魔法將本書嘅字變走，甚至跌入所謂虛質科學裏面提及過嘅近距平行時空裏面，就無從得知啦...

「好啦，張韻喬，你要加油啦，繼續保持你嘅全級第一吧！」之後韻喬就開始quiz嘅final revision。
 
至於去完買戒指嘅俊軒，喺上車之後，就一直若有所思，不發一言。就算頭先已經買到，屬於自己同韻喬互訂終身嘅信物都好，俊軒成個人都好唔開心。





因為俊軒覺得，自己頭先掛住買嘢冷落韻喬，搞到韻喬唔開心。正因為咁，所以俊軒就想盡快返到屋企，然後打電話畀韻喬，同對方道歉。
 
「小軒，做咩唔出聲嘅？你係咪唔舒服？」林太突然嘅一句，將俊軒由沉思中帶返出現實...

「唔係呀媽媽，只不過突然覺得有少少攰啫，而且聽日返到學校，我地仲有個quiz，一陣間都要溫陣書先可以訓…」俊軒望向林太道，然後再勉強擠出一個微笑，明眼人都知道，其實俊軒唔開心。
 
「原來呀。不過小軒呀，一陣番到屋企之後，我仲有另一件事要同你講。」俊軒聽到之後就好奇怪，於是就一臉疑惑咁問林太「媽媽，係咩事？」

「哦，就係劉家嘅事……」林太好認真咁答返俊軒，然後再繼續話…





「雖然媽媽都知道你聽日返學要測驗，但係你都要知道，劉家喺香港嘅地位有幾舉足輕重咖啦。所以我頭先話有關佢地嘅事，我都唔方便喺出面講，而要留番一陣喺你間房講…」
 
俊軒聽到之後，雖然心裏面有十萬個唔情願，但始終由自己媽媽開口，俊軒都冇辦法拒絕。

只不過，俊軒都唔知道點一陣同韻喬交代，所以只係喺車裏面，輕輕“嗯”一聲回答林太之後，就冇再出過聲。

喺座駕返到林家大宅之後，林太少有咁直接帶俊軒返去俊軒間房，然後就閂埋房門...

「媽，有咩要講可唔可以快少少講？因為我真係好攰，而且我一陣間仲要溫書。」俊軒表明要林太長話短說。
 
「我都明，而且你都應該要陪張小姐，咁我唔咁多廢話啦。劉家今日上嚟同我同你Daddy講，自從上次郭氏party之後，劉auntie就懷疑劉家嘅獨生女，佳澄小姐並唔係自己所出！」

林太一開始就講出呢句爆炸性發言，令到俊軒瞪大對眼，表示震驚同不可置信...

「點…點解會咁？佳澄小姐居然被懷疑唔係劉家千金？！」





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer