《愛在。貴族學園》: Ch 29 ~ 思念（上） Part 3

Ch 29 ~ 思念（上） Part 3（連載日期：2024/05/18）

“是誰的心呀……孤單地留下……他還好嗎……我多想愛他…..”

俊軒見到係韻喬打畀自己之後，就即刻自己笑一笑，然後同林太講「媽媽，我去聽一聽電話先，但係可以繼續…」林太以一下ok手勢回應就冇再講嘢，順便都喺度睇其他戒指。

之後俊軒就接聽韻喬嘅電話，用一個好溫柔嘅語氣道「喂小喬？你做咩呀，你掛住我啊？」

韻喬聽到俊軒咁快聽電話之後好開心，不過韻喬就走去壓抑住自己嘅情緒，於是就話...





「唔係喎！做咩講到我好似成個世界，都剩係得你一個咁啊？唔知醜！不過呢，我就係溫書溫到有少少無聊呀嘛，所以咪打電話俾你，想你陪我傾一陣計囉，男。朋。友！」

因為俊軒仲喺街揀緊戒指嘅關係，所以就夾住部電話同店員講「唔該，我想問呢隻有冇我想要嘅size？……」

「有啊！？咁麻煩可唔可以攞埋畀我，再搵個袋同我入住佢呀，唔該你。另外我想揀多對普通少少嘅……係啦小喬，你啱啱講咩話？呢度個電話收得唔係好清楚…….唔好意思呀！」

電話裏面嘅韻喬，喺聽到俊軒同其他人嘅對話之後，就感到非常奇怪，於是就主動問起對方...

「小軒，你依家係咪出面忙緊呀？我頭先係話啊，因為溫書溫到有少少無聊，所以先打電話畀你陪我傾計啫！」





俊軒對於韻喬一下識穿自己喺出面感到驚訝「哦，原來係你溫書溫到悶，所以搵我傾計。不過，呢點解你咁聰明知道我喺街嘅？我……我呢度就冇咩特別嘢呀，啱啱都……處理好啦。」
 
此時，店員將頭先俊軒揀好嘅女裝戒指拎出嚟「林二公子，麻煩請你檢查一下呢隻有冇問題！」

俊軒於是再一次陷入沉默，一直凝視住眼前呢隻，準備送畀韻喬嘅戒指...

「冇咩大問題啦，麻煩幫我包起佢呀，唔該！」俊軒道。「係嘅林二公子！」

呢頭俊軒先同自己講件事已經搞掂，但嗰頭自己又聽到其實俊軒未搞掂，韻喬感覺到俊軒同自己唔坦白，於是好冰冷咁同俊軒講...





「小軒呀，如果你依家真係唔得閒嘅話，不如等你一陣間得閒嘅時候，你先再打電話畀我啦，最多我一邊溫書一邊等你電話啦！但係你都唔好太夜喎！」

俊軒聽到韻喬咁嘅語氣，就知道自己已經出事，但自己又行唔開去繼續同韻喬講電話，唯有死死地氣認錯...

「對唔住呀小喬，我依家仲喺出面，但我都應該就快返去咖啦。咁……你繼續溫住書先啦，我一陣返到屋企之後，再即刻打電話畀你啦！好冇呀？」

韻喬繼續鼓起泡腮道「你係至好呀林俊軒！我同你講呀，聽日我地要quiz咖，你一陣返到去，都要溫一陣書呀知唔知道？咁冇嘢嘅話我自己溫住先啦！bye！」「好啦一陣……」

俊軒都未講完，電話就傳嚟韻喬cut線嘅聲音。聽到韻喬咁樣對自己，俊軒都深知今晚要花心機氹番韻喬。

於是俊軒喺再睇多一次，確定對戒指冇問題之後，就匆匆忙忙咁畀錢，然後前往停車場上車，返回林家大宅。

“奇怪嘞，林俊軒佢從來都未試過咁樣咁冷淡對我咖喎，到底，小軒佢頭先喺度忙緊啲咩呢？”

面對一個突然唔太點理自己嘅男朋友，韻喬頓時感到非常疑惑，而且又有少少嬲咁...





「定係其實……小軒去咗買嘢畀嘉惠同學，準備訂婚禮嘅嘢？」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer