《愛在。貴族學園》: Ch 29 ~ 思念（上） Part 2

Ch 29 ~ 思念（上） Part 2（連載日期：2024/05/04）

至於喺俊軒嗰邊，佢就一直同林太揀訂婚戒指，不過過咗咁耐時間，而且喺聽完頭先林太嘅說話，俊軒其實都已經努力喺度揀，至少都叫做收窄咗範圍，基本上就已經喺度揀緊款式，務求令到隻戒指最襯自己。
 
「點啊，小軒，你揀好未呀？」「未呀！想睇多幾個款啊！」俊軒一邊細心睇一邊答林太。

「你真係呀，身為一個男仔，但係點解你揀隻戒指，都可以揀到婆婆媽媽咁！」林太有少少唔耐煩道。
 
「哎呀，媽媽呀，結婚呢啲嘢，一生人只得一次機會，就當然要揀一隻最襯自己咖啦，點可以話係婆婆媽媽呢？」俊軒有少少不爽咁講「不過，我見呢隻好似唔錯，就等我試下戴上手，睇下靚唔靚？」
 




「好，咁你自己問下sales姐姐，然後畀你戴上手睇下啦。呢隻……我見都幾好嘅，我估應該都幾fit你，咁你就快啲試下佢啦！」林太於是就細心打量呢隻1卡嘅鑽石戒指。
 
「唔該，我可唔可以試下呢隻戒指？」俊軒好有禮貌咁向店員查問。

「可以呀，林公子！咁麻煩請林公子，將隻手放上枱面，就好似隻假手咁放，然後由我幫你戴上手指度，唔該。」
 
於是俊軒就好似個假手咁放好自己隻左手，然後店員就好小心翼翼咁，將名貴嘅鑽石戒指，套入俊軒嘅手指上...

「林公子呢度有塊鏡，你可以自己睇下鐘唔鍾意呢隻戒指，或者同你媽咪傾下個款啱唔啱你！」店員略帶微笑同俊軒講。
 




於是俊軒同林太就開始“研究”呢隻戒指嘅效果「睇落唔錯喎小軒！個光線打落去粒鑽石上面，都好shinny！」林太一臉滿意，同時都笑到四萬咁口咁講「但係小軒呢個size啱你嘛？」
 
「我都覺得幾好睇呀媽媽，而且個size，啱啱好就係我手指個size！唔錯唔錯！」俊軒一邊照鏡一邊同身後嘅林太講「如果我着埋套禮服嘅話，我估出嚟個效果應該都會好好睇吧！」
 
「可能啦，不過最重要呢，個款都要係你自己鍾意嘅。不過小軒，既然都喺度囉，你要唔要順便試埋另外嗰兩隻呀？」林太指一指另外兩隻戒指道。初時俊軒都唔明白林太咁做嘅用以，但林太只係再話「搞不好會有意想唔到嘅驚喜呢！」
 
於是，就喺林太慫恿之下，俊軒都試埋另外兩個款。不過都係唔夠原先第一隻咁鍾意。
 
就係呢個時候，俊軒就諗到韻喬，經過一陣思考震蕩，俊軒都覺得第一隻戒指都會fit到韻喬...





“呢隻真係好襯我同小喬，如果可以親手幫小喬戴上，就好啦”俊軒喺心裏面同自己講，於是就問林太「媽咪，我想問我地會唔會買埋嘉惠嗰隻？」
 
「傻瓜，呢個梗係要啦。而且喺訂婚禮當日，你仲要幫黃小姐親手戴上呢！」林太好尷尬咁笑道「所以你都要睇清楚，究竟呢隻啱唔啱黃小姐。不過，小軒你知道黃小姐手指個size未？」
 
俊軒聽到林太咁問，心裏面都即刻嚇一跳，因為自己根本就唔知道嘉惠手指個size係咩。

但為免林太知道自己其實係想買畀韻喬，而自己都勉強知道韻喬手指個size大小，於是就同林太作咗個大話「我知道呀，之前大概都知道嘉惠咩size……」

“是誰的心呀……孤單地留下……他還好嗎……我多想愛他…..”

就喺呢個時候，俊軒嘅電話響起，俊軒望都唔望個電話，就知道係韻喬打嚟。

因為喺同韻喬一齊之前，俊軒已經喺電話度，set咗韻喬打嚟個鈴聲，係F.I.R.嘅經典歌曲《月牙灣》。

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer