《愛在。貴族學園》: Ch 29 ~ 思念（上） Part 1

Ch 29 ~ 思念（上） Part 1（連載日期：2024/04/26）

就喺同天殷喺電話裏面吹完水之後，韻喬就繼續喺飯廳裏面，好好咁品嘗張太煲嘅雪梨湯，當然都係韻喬同張太賣口乖嘅時間啦「好滋潤呀媽咪！呢碗湯正好可以幫手解返頭先啲毒！」
 
「阿女你做咩要解毒呀？頭先你地食過咩熱氣嘢嚟呀？」同頭先一樣，張太非常疑惑咁望住韻喬，而且都嘗試喺韻喬嘅說話裏面搵出破綻。

因為張太依然覺得，韻喬今日係去同男朋友拍拖。
 
「哦，頭先我地幾個喺中央圖書館走咗之後，我地就去咗希慎廣場，食嗰間好想去好耐嘅大阪燒呀嘛，所以燒完之後，咪覺得有少少熱氣咁囉！」韻喬一邊飲湯一邊回答張太。張太之後都冇再出聲，繼續喺度睇電視。
 




「媽，我飲完啦！我返入房溫書先啦！」「好啦！阿女你加油啦，不過你都唔好太辛苦太夜啦，知道未呀？」

「知道啦！」飲完湯，韻喬先去厨房放低隻湯碗，然後就返入自己間房度溫書，準備定第二日嘅quiz。

當韻喬打開課本嘅時候，韻喬就見到自己同俊軒、天殷同埋禮謙，上緊堂好無聊嗰陣畫嘅公仔。
 
呢堆公仔就係自從喺Ms張安排佢地四個坐埋一齊之後，上堂無聊嘅時候畫嘅。

而且有時候，佢地幾個人偶爾都會各自交換書用（但係原因不明，可能天殷同禮謙想用韻喬同俊軒嘅notes吧？），所以韻喬本書出現有天殷同禮謙嘅手稿都唔出奇。
 




而當韻喬自己望住堆公仔嘅時候，自然就記起上堂無聊嗰陣嘅情景，仲記起咗上堂嘅時候，俊軒對自己嘅微笑，記起俊軒佢喺堂上握起咗自己嘅手，教自己要點樣去畫個公仔先會好睇，諗到一半，韻喬就不已其然咁甜笑起嚟。
 
然之後諗諗下，韻喬就回憶起今日所發生過嘅所有事情，包括天殷打電話畀自己話俊軒出事、瑪麗醫院裏面揭發真相、同俊軒去中央圖書館、去食飯，以及頭先喺屋企門口出面嘅事，韻喬不其然咁心跳加速起嚟，而且個人都越來越熱...

「小軒，我真係好鍾意好愛你呀！」韻喬好細聲咁，同俊軒送嘅豬熊大公仔講。
 
不過，當韻喬收拾好心情，準備去溫習嘅時候，課本上面嘅字突然間唔見哂。取而代之嘅，竟然係俊軒嘅笑臉。

「啊啊啊啊啊啊！！到底發生咩事呀！！點解…..點解本書啲字會唔見哂咖？」韻喬於是就好驚慌失措咁，不停喺本書度揭來揭去，但本書依然都仲係充滿俊軒嘅笑臉...





「死啦，點解全部都會變咗…….變咗小軒個樣咖！仲要聽日就要quiz啦，但係個課文就唔見哂，點算呀？我唔想聽日放學留堂呀嗚嗚嗚！」
 
不過，經過自己細心一諗之後，聰明嘅韻喬似乎搵到一個理由，去解釋點解本書會突然之間搞成咁「會唔會係，因為我太掛住小軒，所以本書嘅課文，都變咗做小軒個樣呢？」
 
「但係，點解我明明都已經收拾好心情準備溫書啦喎，點解仲會咁掛住佢嘅？就算我調整好心情都好，如果本書都唔轉番做字嘅話，今晚我都會好麻煩喎...」

「不如，我都係打個電話畀佢啦！唔知本書會唔會還原呢？」於是，韻喬就拎起自己部電話，然後直接打畀俊軒，而好快俊軒都有聽到電話…

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer