《愛在。貴族學園》: Ch 28 ~ 唯一 Part 6

Ch 28 ~ 唯一 Part 6（連載日期：2024/04/21）

「不過啊仔啊，媽媽都有責任提醒你都應該要好好珍惜你同張小姐……」
 
「媽！我諗你可以停，我知道你想同我講咩……」俊軒此時打斷林太嘅說話，而且表情都由頭先嘅甜蜜笑容，變成依家臉如死灰嘅樣...

「你係想叫我，好好珍惜埋可以同小喬一齊嗰兩個禮拜，然後叠埋心水，要同黃家千金一齊啊嘛，係咪？」
 
「果然係我地林家二公子，寧舍聰明過人(當然同韻喬比就係例外啦)。冇錯，我之所以咁急叫你過嚟PP，就係想睇對訂婚戒指。」





「我頭先喺屋企嘅時候，都睇過一陣online catalogue咖啦，而且有幾個款我諗你都應該鍾意嘅，所以見仲有少少時間，咪叫你過嚟睇下實物囉！」林太終於同俊軒道明來意。俊軒就冷冷咁哦咗一句，就同林太入去唔同鋪頭睇戒指。
 
「呢個款好似都幾好睇，你一陣可以試下叫sales姐姐同你戴上隻手度，睇下襯唔襯你？」

「嗯嗯！」但係，俊軒喺同林太睇咗兩三間鋪頭之後，都冇一個款係俊軒睇得啱嘅，於是，林太就帶俊軒行埋一邊。
 
「媽，做咩突然之間捉我嚟一個暗角度呀？」俊軒對於林太突然之間嘅行為大感不惑。

「仔，其實今日……除咗黃家上嚟，要求你同嘉惠訂婚而依家出嚟同你睇戒指之外。喺黃家一行離開大宅之後，貴為全香港第二有錢嘅劉家，都突然之間上嚟搵過我地…」
 




「你話劉家？咁咪即係……佳澄小姐屋企？咪住先媽媽，劉家佢地搵我地做咩？唔係又要搵我訂婚下話？！」俊軒突然之間對於呢類有錢家族拜訪自己屋企嘅事，突然變得非常緊張。
 
「哈哈，啊仔，你真係得意。我都應承咗黃家囉，仲點會應承劉家呢？你就唔好太敏感啦。」林太試圖安撫俊軒嘅不安感「而且，媽媽其實都清楚知道，你係真心鍾意張小姐嘅。但礙於黃氏嘅生意份額佔我地公司個比例太大，變咗你爸爸好難去推卻黃家嘅要求……」

「如果唔係，萬一發生咩事，你爸爸都好難同公司董事會仲有班投資者，仲有出面班小股東同埋港交所交代。而黃uncle其實都私下都同我地講咗，都係黃家千金鬧脾氣，所以先要做到呢一步。」
 
「不過媽媽我想講，如果你能夠堅持你自己嘅想法，說服到黃家千金放棄你，以及你對張小姐係100%真心嘅話，搞不好你地兩個，以後都仲有機會再行落去…」

呢番說話，俊軒覺得同韻喬頭先講嘅非常相似，冇錯，就係韻喬今日所講嘅奇跡。
 




「不過，因為你同黃家千金嘅訂婚禮，都會如期舉行，所以你依然要揀定一對訂婚戒指。」

「至於劉家嘅事，我會遲啲再同你講，因為呢件事比較敏感，唔方便喺街同你講清楚佢。」林太繼續同俊軒講。
 
「我知點做咖啦，媽咪，真係多謝你繼續支持我嘅想法！咁不如我就當…係揀畀小喬啦！」

「隨你喜歡啦！媽媽唔干涉你呢樣嘢，始終我自己都相信自由戀愛，就好似你家姐揀咩男朋友我都冇太大干涉，所以之後會點，就睇你自己嘅能力啦！」俊軒嘅想法終於轉向正面，於是就繼續同林太睇戒指。

正因為俊軒以揀戒指畀韻喬為心態，所以節奏都明顯加快，而且都比頭先上心，皆因俊軒都可以將最好嘅嘢，可以送畀自己最愛嘅人手上。

當然，俊軒都不時拎韻喬嘅相出嚟做參考，去睇下邊一隻先係最適合韻喬戴上。

（Ch 28  唯一 ~ 完）

IG link https://instagram.com/bear_big_big_writer 




Threads https://www.threads.net/@bear_big_big_writer