《愛在。貴族學園》: Ch 28 ~ 唯一 Part 3

Ch 28 ~ 唯一 Part 3 （連載日期：2024/04/04）

「不過，喺臨走前，我可唔可以要求多一樣嘢啊？」
 
「做咩呀，你又唔願走呀？」韻喬鄒眉頭道「唔係呀小喬，我只係想走之前，要多個goodbye kiss咋嘛！」

「妖！你份人真係呀…..」俊軒冇等韻喬講完，就將韻喬個嘴封住，然後兩人互相抱住對方腰間，即場來一個激烈嘅濕吻，一錫，就差唔多錫咗成分鐘。
 
然後，俊軒自己主動分番開「多謝你呀，小喬。我愛你！咁我走先啦，你都快啲返入去冲涼休息啦！聽日……返到學校見啦！」然後俊軒又錫咗韻喬個額頭一啖去氹韻喬。
 




「知道啦，小軒，我都愛你！聽日喺班房見啦。記得你都唔好咁夜啦！知道未呀？good night！」韻喬於是對住俊軒揮揮手。

而俊軒就按下升降機，準備離開。而韻喬就等俊軒入咗升降機之後，先開門返入屋企。

喺返入屋企之前，韻喬先嘆一口氣，再喺自己電話裏面，打咗一句“我終於都拍拖啦！”。

當然喺紀錄低自己出pool日子嘅時候，韻喬心裏面依然非常激動，繼而諗起今日所發生嘅一切，之後就喺度傻笑。

於是韻喬就滿面春風咁返到屋企，完全唔記得咗喺出門口嘅時候，自己同張太講話有同學出事，所以全班都要趕去醫院嘅事……





「媽，我返嚟啦！」就喺打開屋企大門之後，韻喬就好似平常咁，返屋企嘅時候一定會向屋裏面大叫。
 
「咦，你返嚟啦小喬？你兩個同學有冇咩事呀嘛？媽子我今晚煲咗湯呀，你一陣要唔要飲一碗先呀？」張太喺厨房行出嚟嘅時候，就問正喺度除鞋、依然喺度傻笑嘅韻喬。
 
「係呀媽媽！咦！今晚有湯飲咁正呀？咁一陣我都飲一碗丫，唔該你呀媽咪！」呢個時侯韻喬喺度除低緊佢見大衣，笑容滿面咁坐喺梳化上面「係喎今晚都唔記得有呢套電視做添！」韻喬於是就坐喺度睇電視。
 
不過，身為精明師奶嘅張太，當然可以發現自己個女嘅心情同今日出去之前有極大嘅出入啦，於是就打蛇隨棍上問，睇下韻喬會唔會同自己講啲咩...

「小喬呀，你今晚做咩好似心情好好咁嘅？唔通你……啱啱去玩去拍拖返嚟啊？」





韻喬聽到張太咁講話自己拍拖之後，就即刻成個人窒一窒，心諗“下，我唔會第一日就畀呀媽識穿咁低B呀嘛？”

但韻喬好快就收拾心情，然後再逃避張太嘅眼神，笑笑口咁話「我冇呀！而且我都冇男朋友，邊有得去拍拖先得咖？媽子你會唔會諗多咗啦哈哈哈！」

張太喺厨房倒完一碗湯出嚟之後，就望到韻喬紅都面哂，而且面色非常尷尬，所以就覺得個女一定係拍緊拖，於是繼續問落去「嘩！你甜笑笑到咁，肯定有問題啦！講畀呀媽知啦啊女，你係咪有男朋友啫？最多我唔同爸B講啦！」

「唔係呢媽子，我真係……真係冇男朋友啦。今日咪就係同殷殷、禮謙仲有……小軒去咗圖書館咋嘛，然後食埋夜晚飯先返嚟囉！」為咗逃避媽媽嘅追問，韻喬唯有作咗個大話，將天殷同禮謙擺上枱。

不過，講大話講得唔好嘅話，百密必有一疏，時間一耐自然就會穿煲。

然而，張太好快就意識到今朝早嗰陣，個女明明唔係話去圖書館，於是又質問話「咦，小喬，點解會變去咗圖書館咖？！」

（待續 ~ ）

IG link https://instagram.com/bear_big_big_writer 




Threads https://www.threads.net/@bear_big_big_writer