《愛在。貴族學園》: Ch 28 ~ 唯一 Part 2

Ch 28 ~ 唯一 Part 2（連載日期：2024/03/30）

俊軒見到韻喬情緒突然間咁激動，甚至比自己頭先更加激動嘅時候，就將對方抱得更實，然後好溫柔咁，出手將韻喬面上嘅眼淚拭去，再錫咗韻喬嘅額頭一啖。

而韻喬又再一次將自己個頭，埋入俊軒心口之中，因為韻喬自我意識到，嗰度係一個可以安定自己情緒嘅地方，而且，仲要係專屬於自己嘅地方。

「乖啦小喬，唔好喊啦！你再喊呢就唔靚女咖啦！」俊軒講完呢句之後，韻喬就開始收聲，而俊軒就將韻喬捉得更實。「其實小喬呀，你都唔好怪責自己啦，因為我自己都做錯好多嘢，先會引起到今日嘅局面。」

「如果我一早就知道，其實你都對我有意思嘅時候，我就應該早啲修心養性，同其他女同學保持距離，至少等你對我嘅印象唔好咁差先，然後先等你可以慢慢咁喜歡我，再等機會同你表白，等你接受我嘅時候就同你一齊，早啲過住幸福同青春嘅校園生活…」





「而且同你一樣，我都對愛情呢樣嘢好遲鈍，如果唔係有天殷同禮謙嘅提醒，可能我連同你講嘢，甚至表白嘅機會都唔會有。但係，正如你所講，我地呢幾個月經歷咁多，我都開始對你有好感…」

「雖然最後係因為咁多嘢，先令我地遲咗少少先開始，但我對你嘅感情，都只會冇少有多。我可以發誓，我，林俊軒，一生一世，呀唔係，係永生永世，都只會認定張韻喬你，係我唯一愛嘅人……」

韻喬聽到之後瞪大眼望住俊軒，因為佢都冇諗過，俊軒愛自己愛到，可以對自己發誓。

韻喬為咗可以唔想喺兩個禮拜之後失去俊軒，所以韻喬都好快做同俊軒一樣嘅嘢「小軒，我都可以同你發誓，我，張韻喬，永生……」

「唔好，而且唔可以呀小喬！」俊軒好快就打斷咗韻喬嘅說話，但韻喬就唔知點解俊軒會咁做。





「點…點解呀？」「因為你喺感情嘅路上，仲有一輩子嘅路要行。但係我，我呢個可憐蟲嘅命運就已經注定，呢一世只可以同黃嘉惠一齊。」

「喂呀！我都未講完，難得我有feel做咩打斷人地喎！你仲要喺度講埋啲掃興嘅人出嚟！」韻喬即刻扁住嘴咁，同俊軒喺度抗議「對唔住呀喬喬，你繼續啦…」
 
俊軒道歉之後，韻喬再一本正經對俊軒講「我，張韻喬，永生永世，都只會認定林俊軒，係我唯一愛嘅人!」俊軒聽到之後露出一股甜絲絲嘅表情，然後再雙手捧住韻喬塊面，蜻蜓點水一吻。
 
放開口之後，韻喬又開始同俊軒講「小軒呀，唔知你信唔信……呢個世界會有奇跡呢樣嘢呢？不如呢，我地都試下一齊等待奇跡嘅出現啦，好唔好呀？」呢次到韻喬緊緊捉住俊軒嘅手。

「為咗你，我又點會唔信呀。不過，就算真係有都好，奇跡嘅出現，實在太過微乎其微啦……」俊軒又一盤冷水倒向韻喬度，覺得韻喬都只係喺度氹自己開心。但係當俊軒講完呢句之後，就發現韻喬嘅表情有少少奇怪。
 




不過，好在有平時喺學校，之前同班女同學相處嘅經驗，俊軒嘅flirt功都有返咁上下，所以喺經驗搭救嘅情況下，俊軒又點會讓韻喬失望呢，俊軒就唯有補飛話「但係點都好啦，呢層我會諗辦法解決咖啦，小喬你就等我嘅好消息，同埋你就唔好太擔心啦！我都一定會努力，創造奇跡畀你同自己，好冇？」然後就摸摸韻喬個頭。
 
韻喬喺聽到俊軒會努力咁，為自己希望創造奇跡之後，就咬唇微笑，然後吻向俊軒塊面上話「嗱林俊軒，唔係我逼你咖，係你自己話ok咖。我地又喺度搞咗咁耐啦，咁你快啲返屋企啦，我都返入去啦，你唔好搞太夜啦，知道未呀？記得我會等你電話哦！」
 
俊軒於是就點頭答應韻喬嘅要求，不過俊軒都知道，今晚自己都會好夜，先會打到電話畀韻喬「知道啦，小喬，一陣間返到去之後，我就即刻打畀你陪你啦。不過，喺臨走前，我可唔可以要求多一樣嘢啊？」

（待續 ~ ）

IG link https://instagram.com/bear_big_big_writer 
Threads https://www.threads.net/@bear_big_big_writer