《愛在。貴族學園》: Ch 28 ~ 唯一 Part 4

Ch 28 ~ 唯一 Part 4（連載日期：2024/04/07）

張太覺得唔對路之後就即刻質問「咦，小喬，點解會變去咗圖書館咖？！我記得你今日出去嘅時候，你係話有兩個同學出咗事咖喎，之後就好匆忙咁跑咗出去。然後你依家就好似平時咁，去完圖書館返嚟咁笑得咁開心……！」
 
「小喬呀，雖然媽媽我讀書冇你咁叻，但你都唔好當你呀媽我係傻婆先得咖？明明出門口嘅時候仲憂心忡忡咁，仲差啲要喊埋出嚟。但係喺你返到嚟屋企之後，你就一直喺度笑，笑到連我問你兩個同學有冇事你都冇答我，你話啦，唔係你有問題就係我撞鬼囉！」
 
「講啦呀女，你知道我都唔會鬧你咖！如果你真係有男朋友，然後去拍拖嘅話，你咪坦白認咗佢囉，拍拖又唔係咩殺人放火唔見得光嘅事，呢個年紀嘅女仔有男朋友嘅話，其實都好閒啫！」張太一輪嘴咁，講咗一大堆說話畀韻喬聽，目的都係想韻喬同自己坦白講出真相。

「我….邊有嘢可以認喎！根本……都冇！」韻喬發現自己頭先所講嘅說話，居然可以引起張太咁多疑問，於是喺恐懼嘅潛意識影響之下，下意識咁開始同張太拉開距離，同時語調都變得緊張。至於塊面，就當然就比頭先更加紅啦。





「哈哈哈哈！緊張得你呀，小喬唔通你……你真係……有男朋友？真係唔怕坦白講畀我知喎，女！」張太今次收起取笑嘅語氣，稍微壓低自己嘅聲線，然後輕輕捉住韻喬嘅手，非常慈祥咁講。

而韻喬見到張太嘅表情唔同咗之後，自己都壓低聲線同媽媽講「媽咪呀！我……真係冇呃你呢！我真係冇男朋友呀。你…..就唔好諗得太多啦。」

「好啦，一陣仲要飲你碗靚湯，我都係去沖涼先啦！廢事整到凍哂唔好飲，就浪費哂你嘅心機啦！」之後韻喬就返入睡房，然後拎住自己套睡衣去洗手間沖涼。

韻喬喺入到洗手間之後，就留返張太自己一個喺廳，凝望住洗手間道門，好無奈咁同自己講「呢個傻女呀，真係聰明過頭，當正自己真係可以呃到哂身邊所有人……明明自己都笑到發哂春咁，都唔肯認自己拍拖，真係當你呀媽我係傻嘅，正一傻女嚟！」然後自己一邊飲湯一邊睇電視。

「但係依家都好嘅，小喬真係有男朋友嘅話，至少依家個女都有人要，如果唔係我同爸爸都唔知點算…」張太繼續講「不過，我都要睇下到底個男仔係邊個先，至少都要知道個男仔係唔係同小喬玩玩下先，所以都係唔好同爸爸講住先啦！」





至於頭先畀張太狂問嘅韻喬，喺入到洗手間之後，自己終於都鬆一口氣「嘩！好在冇畀媽子chok到我咋！如果唔係，畀佢發現到我拍拖就麻煩啦！都唔知媽媽會同邊個講，再喺度問三問四添呀！」然而，韻喬自己都唔知道，其實頭先嘅說話，張太已經識穿咗自己。
 
但係，韻喬轉個頭就諗起，其實自己同俊軒嘅情侶關係，都只係有短短兩個禮拜嘅時間，於是最近被情感壓抑得好緊要嘅理智，突然之間上身，韻喬就同鏡入面嘅自己講……

「唉，就算講唔講都好，我同小軒咪得最多兩個禮拜嘅時間。過咗兩個禮拜之後咁又點呀？我咪又係變返一隻單身狗！然後再睇住佢同嘉惠…」然後韻喬雙眼就開始紅起嚟，淚水亦都開始慢慢滲出…

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer